ޕާކިސްތާން އިންޓަނޭޝަނަލް އެއާލައިންސް (ޕީއައިއޭ) ޕްރައިވެޓައިޒް ކުރުމަށް ސަރުކާރުން މުހިންމު މަސައްކަތެއްގެ ގޮތުގައި ފެށި މަސައްކަތް ވައިގައި ހިފާ ގޮތެއް ނުވިއެވެ. ބޭރުގެ ބޮޑެތި އެއާލައިން ކުންފުނިތައް ޝައުގުވެރި ކުރުވުމަށް ކުރި މަސައްކަތްވެސް ވަނީ ނާކާމިޔާބު ވެފައެވެ.
މީގެ ހަ މަސް ކުރިން އިސްލާމްއާބާދުގައި ބައިނަލްއަގްވާމީ ފަރާތްތަކުން ޕީއައިއޭ ގަންނާނެ ކަމަށް ގިނަ ވާހަކަތައް ދެއްކިނަމަވެސް އެއްވެސް ކުންފުންޏެއްގެ ފަރާތުން އެކަމަށް ޝައުގުވެރިކަމެއް ނުފެނުމުން ކަމާބެހޭ ފަރާތްތަކުން ދެން ވާހަކަ ދެއްކީ އެތެރޭގެ ކުންފުނިތަކާއެވެ.
ފުރަތަމަ ފަހަރަށް ޕާކިސްތާނު ކުންފުނިތަކުން ޝައުގުވެރިކަން ދެއްކިއެވެ. ނަމަވެސް އެފަރާތްތަކަށް ބޮޑެތި ހުރަސްތަކެއް ކުރިމަތި ކުރުވި އެވެ. ޕީއައިއޭގެ ހޯލްޑިން ކުންފުންޏާއި ޕީއައިއޭ އެއާލައިން ވެސް އޮތީ ދަރަނިވެރި ވެފައެވެ.
އޭގެ އިތުރުން ޓިކެޓު ވިއްކާއިރު ސަރުކާރަށް ނަގާ ޓެކްސް ބޮޑުވުމަކީ މުހިންމު ހުރަހެއްގެ ގޮތުގައި ކޮންސަލްޓަންޓުންނާއި ކުންފުނި ގަތުމަށް ޝައުގުވެރިވި ފަރާތްތަކުން ފާހަގަ ކުރި އެވެ.
ޓެކްސް ކުޑަ ކޮށްފައި ބޭއްވުމަކީ ދަތުރުފަތުރުގެ އަގު ކުޑަކުރުމާއި ފަސިންޖަރުންގެ ޓްރެފިކް އިތުރުކުރުމަށް ކޮންމެހެން ބޭނުންތެރި ކަމެއް ކަމަށް އެފަރާތްތަކުން ފާހަގަ ކުރިއެވެ.
ޕާކިސްތާން ސަރުކާރުން އިންވެސްޓަރުން ލޯބި ޖައްސަން ކުރި މަސައްކަތްތައް އިތުރަށް އުނދަގޫވީ އެސެޓް އަގުކުރުމާ ގުޅޭ މައްސަލަތަކުންނެވެ. އަދި ބޯޑުރޫމްގައި ކަންކަން ނިންމުމުގެ ކޮންޓްރޯލު ސަރުކާރަށް އޮތުމަށް ބާރުއެޅުމާއި، ސިވިލް އޭވިއޭޝަން ރެގިއުލޭޓަރީ ގޮންޖެހުންތަކުން ޑީލް ކުރިއަށް ގެންދިއުން އިތުރަށް އޮޅުން ބޮޅުން ވެގެން ދިޔައެވެ.
ޕީއައިއޭގެ އެންމެ ފައިދާ ބޮޑު ލަންޑަން ރޫޓާއި ޕީއައިއޭގެ ރިއަލް އެސްޓޭޓް ކުންފުނިތައް އަގު ކޮށްފައި ހުރީވެސް ބޮޑު ކޮށް ކަން ފާހަގަ ވިއެވެ. އޭގެ އިތުރުން ކުންފުނީގެ މުވައްޒަފުން ވަޒީފާގައި ހިފެހެއްޓުމަށް ސަރުކާރުން ޞާރުއެޅުމުން ޕީއައިއޭ ގަތުމަށް އެފަރާތްތައް ފަސްޖެހުނެވެ.
މިހިނދު ޕާކިސްތާންގެ ދެ ކުންފުންޏަކުން ވަނީ ވަރުގަދަ ބެލެންސް ޝީޓްތަކާއި ދަތުރުފަތުރުގެ ސިނާއަތުގެ ތަޖުރިބާ ހޯދައިގެން ސީރިއަސް ޝައުގުވެރިކަމެއް ފާޅުކޮށްފަ އެވެ. ނަމަވެސް އެއިން އެއްފަރާތް ފަހުން މި ޑީލުން ދުރުވެގެންފިއެވެ.
އާޚިރުގައި އެއާލައިން ހިންގުމުގެ ތަޖުރިބާއެއް ނެތް ރިއަލް އެސްޓޭޓް ކުންފުންޏަކުން ކުރިމަތި ލުމުން އެކަން ކުރިއަށް ގެންދެވެން ނެތް ކަމަށް ސަރުކާރުން ބުންޏެވެ.
ޕީއައިއޭ ވިއްކާލުމުގެ މަސައްކަތް އަދިވެސް ދަނީ ކުރިއަށެވެ. ކުންފުނީގެ ދަރަނިވެސް ދަނީ އިތުރު ވަމުންނެވެ.
