އިޒްރޭލުގައި އާންމު ވެފައިވާ ރޭޕް ކުރުމުގެ ޖަރީމާތައް ޑޮކިއުމެންޓް ކޮށް ބަލަހައްޓާ އެސޯސިއޭޝަން އޮފް ރޭޕް ކްރައިސިސް ސެންޓަރސް (އާރްސީސީއައި) އިން ނެރުނު ރިޕޯޓެއްގައިވާ ގޮތުން 2023 ވަނަ އަހަރު އިޒްރޭލުގައި ޖިންސީ ގޯނާއާއި ރޭޕް ކުރުމުގެ މައްސަލަތަކުގެ 81 އިންސައްތަ މައްސަލަތައް ނިންމާފައި ވަނީ އެ ޖަރީމާތައް ހިންގި މީޙުންނަށް ދައުވާއެއް ކުރުމަކާ ނުލައެވެ.
ޔަހޫދީ ޕާލަމެންޓް ކެނެސެޓް ކޮމިޓީ ފޯ ދަ އެޑްވާންސްމަންޓް އޮފް ވިމެން އަށް ހުށަހެޅި ރިޕޯޓުގައި ބުނެފައި ވަނީ ޒަޔަނިސްޓުންގެ ފުލުހުންނަށް ހުށަހެޅި 6،405 މައްސަލައިގެ ތެރެއިން ދައުވާ އުފުލާފައިވަނީ އެންމެ 663 މައްސަލައިގައި ކަމަށެވެ. އެ މައްސަލަތަކުގެ ބޮޑު ބައެއް ކަމަށްވާ 68 އިންސައްތަ މައްލަތައް ނިންމާލާފައި ވަނީ ހެކި ނެތުމުން ކަމަށް ބުނެއެވެ.
އަދި 20 އިންސައްތަ މައްސަލަތައް ނިންމާފައި ވަނީ ކުށް ސާބިތު ނުވާތީ ކަމަށެވެ. މީގެ އިތުރުން 17 އިންސައްތަ މައްސަލަތަކުގެ ދައުވާ އުފުލާފައިވާއިރު، 2 އިން ސައްތަ ވަނީ ކޯޓުން ބޭރުގައި ނިންމާފައެވެ.
ރޭޕްގެ މައްސަލަތައް ޒަޔަނިސްޓު ފުލުހުންގެ ތެރޭގައި ގިނަކަމަށްވެސް ބުނެފައި ވެއެވެ. އެގޮތުން ފުލުހުން ކޮށްފައިވާ ރޭޕްތަކުގައި ފުލުހުންގެ އޮފިސަރުންނާ ގުޅޭ ޝަކުވާތަކަކީ ވަކިން ބޮޑަށް އުނދަގޫވާ ޝަކުވާތަކެއް ކަމަށް ވެސް ރިޕޯޓުގައި ފާހަގަކޮށްފައިވެ އެވެ.
ފުލުހުން ތުހުމަތު ކުރެވޭ ރޭޕް ކުށްތަކާ ގުޅޭ 133 ޝަކުވާގެ ތެރެއިން 91 ޕަސެންޓް ޝަކުވާ ތަހުގީގަކާ ނުލައި ނިންމާފައިވެއެވެ.
މީގެ އިތުރުން ރުހުމެއް ނެތި ބަރަހަނާ ފޮޓޯތައް (އޮރިޔާން ކާޑް) ހިއްސާކުރުމުގެ ޝަކުވާތައް 2022 ވަނަ އަހަރު ހުށަހަޅާފައިވާ 171 މައްސަލައިން 2023 ވަނަ އަހަރު 367 މައްސަލައަށް ދެގުނައަށް ވުރެ މައްޗަށް އިތުރުވެފައިވާ ކަމަށް ބުނެފައި ވެއެވެ.
ދުނިޔޭގެ އެންމެ ބޮޑު ކޮންސެންޓްރޭޝަން ކެމްޕް ޣައްޒާގެ ކަށިނަރުތައް ފޫއަޅުވާލައި 7 އޮކްޓޯބަރުގައި މީހުން ނިކުތް ފަހުން އިޒްރޭލުން ފެށި ހަނގުރާމައިގައި ބަސްތީތައް ދޫކޮށް ދާން ޖެހުނު ޒަޔަނިސްޠު ޔަހޫދުން ވަގުތީ ހިޔާތަކަށް ބަދަލު ކުރުމުން އެތަންތާގައިވެސް ގިނަ އަދަދަކަށް އަންހެނުން ރޭޕް ކުރުން އާންމު ވެފައިވާ ކަމަށް ބުނެފައި ވެއެވެ. އެގޮތުން ހިފާފައިވާ ފަލަސްޠީނުގެ އިތުރުގެ ބަސްތީތަކުން ޓެލްއަވީވަށް ބަދަލުވި މީހުން އާދަވެގެން ރޭޕްގެ ޝިކާރައަކަށްވެފައިވާ ކަމަށް ބުނެފައި ވެއެވެ.
