ދުނިޔޭގެ އެންމެ ބޮޑި ބިޔަ މަޚުލޫގެއްކަމަށް މިހާރު ރެކޯޑް ކުރެވިފައިވާ މަޚުލޫޤަކީ، ސްޕޭސްއިން ވެސް ފެންނަ ވަރުގެ މަޚުލޫގެއް ކަމަށް ސައިންސް ވެރިން ބުނެއެވެ. މިމަޚުލޫގު ހޯދައި ގަނެފައި ވަނީ މިދިޔަ މަހުއެވެ. އަދި އެކަން އާންމުކޮށް އިއުލާން ކުރީ މިދިޔަ ބުދަދުވަހުއެވެ.
ބޮޑުތަކުރުފާނު، އަތޮޅުތަކުން ހޭރިއާ ކުރައްވަމުން ގެންދެވި ދުވަސްވަރުވެސް މި މަޚޫލޫޤު ދުނިޔޭގައި އޮތް ކަމަށް ލަފާ ކުރެވެއެވެ. ބޮޑު ތަކުރުފާނު އަވަހާރަވީ، މީގެ 441 އަހަރު ކުރިން 1583ގައެވެ.
ސައިޒުގެ ގޮތުން ބަލާއިރު މި މަޚުލޫގަކީ، ގަލޮޅު ދަނޑުގެ ސައިޒާ އެއްވަރުގެ އެއްޗެކެވެ.
މިއީ ސޮލަމަން ޖަޒީރާ ކައިރިން ހޯދާފައިވާ ބޮޑު ހިރިގަލެކެވެ. މިގަލަކީ ދިރުން ހުރި ގަލެކެވެ. އޭގައި އަދިވެސް އެތައް މިލިއަން ކޮރަލް ޕޮލިޕްތައް ހުރިކަމަށް ރެކޯޑްކޮށްފައި ވެއެވެ.
މި ހިރިގަލާ ކައިރީގައި އޮންނަނީ ފަޅު ޖަޒީރާއެކެވެ. އެއީ، މަލޯލާއޯ ޖަޒީރާއެވެ. އެ ޖަޒީރާ ބަލަހައްޓާ ޕޯނާޕެއިނާ ގަބީލާ މީހުންވެސް ވަނީ ހިރިގަލުގެ ބޮޑުކަން އެނގި ހައިރާން ވެފައެވެ. މި ހިސާބުގެ ކަނޑުގެ ވެށްޓަށް ފާރަވެރި ވަނީ މި ގަބީލާއިންނެވެ.
މި ހިރިގާ ހޯދައި ގަތީ މިދިޔަ މަހުގައި ނޭޝަނަލް ޖިއޮގްރަފިކްގެ އެކްސްޕެޑިޝަނަކުންނެވެ.
މީގެ ކުރިން ރެކޯޑްކޮށްފައިވާ އެންމެ ބޮޑު ހިރިގަލަކީ، މިގަލުގެ ދެ ބައިކުޅަ އެއްބައި ވަރުގެ ގަލެކެވެ. އެގާ ފެނިފައި ވަނީ އެމެރިކަން ސަމުއާ ޖަޒީރާ ކައިރިންނެވެ.
