އަންހެނުންނަށް އަމާޒުކޮށް އެޕްރެންޓިސް ޕްރޮގްރާމުގައި ބައިވެރިވުމުގެ ފުރުސަތު މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އިން ހުޅުވާލައިފިއެވެ.
މި ޕްރޮގްރާމަކީ މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާރޓްސްއާ ގުޅިގެން ކުރިއަށް ގެންދާ ޕްރޮގްރާމެކެވެ.
މި ޕްރޮގްރާމުގައި ހިމެނެނީ ޖުމްލަ ހަތް ދާއިރާއެވެ. އެއީ ވެލްޑިންގ، ކާޕެންޓަރ، މެޝިނިސްޓް، މެރިން މެކޭނިކް، އިލެކްޓްރިޝަން، މެކޭނިކް އަދި އެއަރ ކޮންޑިޝަނިންގ އެންޑް ރެފްރިޖަރޭޝަންއެވެ. މި ދާއިރާތަކަށް ޖުމްލަ 18 ބައިވެރިންނަށް ފުރުސަތު ދޭނެ ކަމަށް އެމް.ޕީ.އެލްއިން ބުނެއެވެ.
ހަ މަސް ދުވަހުގެ މުއްދަތަށް ކުރިއަށް ގެންދާ މި ޕްރޮގްރާމުގެ ބައިވެރިންނަށް ކޮންމެ މަހަކު 5,000 ރުފިޔާގެ އެލަވަންސެއް ލިބޭނެއެވެ. މި ޕްރޮގްރާމުގެ މައިގަނޑު މަޤްޞަދަކީ މަސައްކަތުގެ ދާއިރާތަކުގައި އަންހެނުންގެ ބައިވެރިވުން އިތުރުކޮށް، މީހުން ބިނާކުރުމެވެ.
އެމް.ޕީ.އެލްއިން ކުރިންވެސް ވަނީ މިފަދަ އެޕްރެންޓިސް ޕްރޮގްރާމްތައް ހިންގާފައެވެ. އަދި އޭގެ ތެރެއިން ބައެއް ބައިވެރިންނަށް ކުންފުނިން ދާއިމީ ވަޒީފާވެސް ލިބިފައިވާ ކަމަށް އެމް.ޕީ.އެލްއިން މަޢުލޫމާތު ދެއެވެ.
މި ޕްރޮގްރާމުގައި ބައިވެރިވުމަށް ޝައުޤުވެރިވާ ފަރާތްތަކުން އޮންލައިން އެޕްލިކޭޝަން ފޯމު މެދުވެރިކޮށް ކުރިމަތިލެވޭނެއެވެ. އެޕްލިކޭޝަން ހުށަހެޅުމުގެ ސުންގަޑިއަކީ 24 ނޮވެންބަރު 2024 ވާ އާދީއްތަ ދުވަހުގެ 14:00 އެވެ.
ޕްރޮގްރާމުގައި ބައިވެރިވުމަށް ޝައުޤުވެރިވާ ފަރާތްތަކުން https://rb.gy/dvg46c ލިންކް މެދުވެރިކޮށް އެޕްލިކޭޝަން ފޯމު ހުށަހެޅުއްވުމަށް އެމް.ޕީ.އެލްއިން ވަނީ އެދިލައްވާފައިއެވެ.
