މެލޭޝިޔާގެ ބައެއް ޔުނިވަރސިޓީތަކުގައި ކިޔެވުމަށް ދިވެހި ދަރިވަރުންނަށް ޚާއްޞަ ޑިސްކައުންޓެއް ލިބޭގޮތް ހަމަޖައްސައިފިއެވެ.
މި ޑިސްކައުންޓް ލިބެނީ އެޑިޔުކޭޝަން މެލޭޝިޔާ ގްލޯބަލް ސަރވިސަސް (އީއެމްޖީއެސް) އާއި މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓާ ދެމެދު ވެވުނު އެއްބަސްވުމެއްގެ ދަށުންނެވެ.
މި ޑިސްކައުންޓަށް އެދެވޭނީ ވަކި ޝަރުތުތަކެއް ފުރިހަމަވާ ދިވެހި ދަރިވަރުންނަށެވެ. މީގެ ތެރޭގައި ހިމެނެނީ އެދޭ ޕްރޮގްރާމާ އެއްފެންވަރުގެ ނުވަތަ އެއަށްވުރެ މަތީ ފެންވަރުގެ ޕްރޮގްރާމެއް ފުރިހަމަކޮށްފައި ނުވާ ދަރިވަރުންނެވެ. އަދި މިނިސްޓްރީ މެދުވެރިވެގެން މަތީ ތަޢުލީމަށް މާލީ އެހީ ލިބިފައިވާ ފަރާތްތަކުގެ ތެރެއިން އަނބުރާ ދައްކަންޖެހޭ ފައިސާ ޑިފޯލްޓްވެފައިނުވާ ފަރާތްތަކަށާއި، މިނިސްޓްރީ މެދުވެރިވެގެން ލިބެމުންދާ ލޯނެއްގެ ފައިސާ ލިބެމުންދާ ނުވަތަ ލިބުމަށް ހަމަޖެހިފައިވާ މުއްދަތުގައި ނުހިމެނޭ ދަރިވަރުންނަށެވެ.
ޑިސްކައުންޓް ލިބޭ ޕްރޮގްރާމްތަކާއި އެ ޕްރޮގްރާމްތައް ހިންގާ މަރުކަޒުތަކުގެ މަޢުލޫމާތު މިނިސްޓްރީގެ ވެބްސައިޓުން ލިބެން ހުންނާނެއެވެ. ޑިސްކައުންޓަށް އެދި ހުށަހަޅާނީ މައި އީޑިޔު ޕޯޓަލް މެދުވެރިކޮށެވެ. އެޕްލިކޭޝަން ހުށަހަޅާއިރު ޕްރޮގްރާމްގެ ނަމާއި މިނިސްޓްރީން ދީފައިވާ ޕްރޮގްރާމް ކޯޑު ލިޔުމަށް މިނިސްޓްރީން ވަނީ އިލްތިމާސްކޮށްފައެވެ.
އިތުރު މަޢުލޫމާތު ހޯދުމަށް މިނިސްޓްރީގެ ވެބްސައިޓަށް ނުވަތަ 1474 ނަންބަރު ފޯނަށް ގުޅުމަށް އަދި [email protected] އަށް އީމެއިލް ކުރުމަށް މިނިސްޓްރީން ވަނީ އަންގާފައެވެ.
