އޮސްޓްރޭލިއާގެ ފުރަތަމަ ހަލާލް އިންވެސްޓްމަންޓް އެޕް ތައާރަފް ކޮށްފިއެވެ.
މި އާ ޕްލެޓްފޯމަކީ އިސްލާމީ ޝަރީޢާ އުސޫލުތަކަށް ތަބާވާ އިންވެސްޓްމަންޓްތަކަށް އިންވެސްޓް ކުރަން ބޭނުންވާ މުސްލިމުންނާއި ޣެއިރު މުސްލިމުންނަށް ފުރުސަތުތައް ހޯދައިދީ، އިންވެސްޓަރުންނަށް ދިމާވާ ގޮންޖެހުންތަކަށް ހައްލެއް ހޯދައިދީ، އިސްލާމީ ޝަރުއީ އުސޫލުތަކަށް އިހުތިރާމްކުރާ ވެންޗާތަކުގައި ބައިވެރިވުމުގެ ބާރު އަޅާ ޕްލެޓްފޯމެކެވެ.
އައިޓީ ޙިޖާޒް ކުންފުނިން ތައާރަފް ކުރި އެޕްގައި ހަލާލު މިންގަނޑުތަކަށް ފެތޭ އިންވެސްޓްމެންޓްތައް ބަލައި، ޝަރީޢާއާ އެއްގޮތް އިންވެސްޓްމެންޓްތައް ހިމަނާފައި ވެއެވެ. އޭގައި ރިއަލް އެސްޓޭޓް ކުންފުނިތަކާއި އަދި އިކުއިޓީ ފަންޑުތަކައް އިންވެސްޓްކުރުމުގެ ފުރުސަތު ހިމެނޭ ގޮތަށް ޝަރީއާ އުސޫލަށް ތަބާވާ ތަފާތު އެސެޓްތަކަށް ފަސޭހައިން ހޯދައި ގަނެ، އިންވެސްޓް ކުރެވޭ ގޮތް ހަދައި ދީފައި ވެއެވެ.
ހަލާލް އިންވެސްޓްމަންޓްތައް ހޯދުމަށް ބޭނުންވާ މީހުންނަށް މީގެ ކުރިން ދިމާވި އުދަގޫތައް މި އެޕުން ނިމުމަކަށް ގެނަސްފައި ވެއެވެ.
ޙިޖާޒް ޙަލާލް އިންވެސްޓްމެންޓް އެޕްގެ ޔޫޒަރ ފްރެންޑްލީ އިންޓަފޭސް އާއި ލާމެހިފައިވާ ޝަރިޢާގެ މަޢުލޫމާތު ދޭ އަދި އެޑިއުކޭޝަނަލް ރިސޯސްތަކުގެ ސަބަބުން އިންވެސްޓްމަންޓް ޗޮއިސްތަކަށް އިތުބާރު އުފެއްދުމަށް ވެސް އެހީތެރިވެދެއެވެ.
ވަކިވަކި ޔޫޒަރުންގެ ބޭނުންތައް ފުއްދައިދިނުމުގެ އިތުރުން، ޙިޖާޒް ހަލާލް އިންވެސްޓްމަންޓް އެޕްގެ ސަބަބުން މާލީ ވެށްޓަށް ބަދަލު ގެނަސް، އަޚުލާގީ ގޮތަކަށް އިންވެސްޓްމަންޓުތައް ބަދަލު ކުރުމަށް އެހީތެރިވެދޭނެއެވެ.
މި އިސްނެގުމަކީ ކޮންވެންޝަނަލް ފައިނޭންޝަލް އިންސްޓިޓިއުޝަންތަކުން އެމީހުންގެ އޮފާތައް މުސްލިމުންނާ ގުޅޭ ގޮތަށް ފުޅާކުރުމަށް ބާރުއަޅައި، މާކެޓުގައި ވާދަވެރިކަމާއި އީޖާދީ ގޮތްތައް ކުރިއެރުވުމަށް މަގުފަހިކޮށްދޭނެ ކަމެއް ކަމަށް ޙިޖާޒުން ބުނެފައި ވއެވެ.
މުސްލިމް މުޖުތަމައަށް ހިދުމަތް ދިނުމުގެ އިތުރުން އެތިކަލް ފައިނޭންސަށް ޝައުގުވެރިވާ ގޮތަށް އޮސްޓްރޭލިއާގެ ފުރަތަމަ ހަލާލް އިންވެސްޓްމަންޓް އެޕް ޙިޖާޒުން ތައާރަފް ކުރުމުން މުސްލިމު ކޮމިއުނިޓީން ވަނީ އެކަމަށް މަރުޙަބާ ކިޔާފައެވެ.
މީގެ ކުރިން އޮސްޓްރޭލިއާއިން ވަނީ ޙަލާލު ރެސްޓޯރެންޓްތައް ހޯދައިގަންނަން އެހީތެރިވެ ދޭ އެޕެއްވެސް ތައާރަފް ކޮށްފައެވެ. އެ އެޕް ތައާރަފް ކުރީ މުސްލިމު ވިޔަފާރިވެރިޔާ އަލާއުއްދީން މުޚައްލާތީއެވެ.
އޮސްޓްރޭލިއާގެ 6 ލަކއްކަ މުސްލިމުންގެ މެދުގައި އެ އެޕްވެގެން ދިޔައީ މަޤްބޫލު ވަސީލަތަކަށެވެ.
