މޯލްޑިވްސް ޕޮލިޓެކްނިކުން ބޭނުންކޮށް ބައުވެފައިވާ އަދި ހަލާކުވެފައިވާ ބައެއް ތަކެތި ނީލަން ކިޔުމަށް ނިންމައިފިއެވެ.
މި ނީލަން ކިޔުން އޮންނާނީ 2024 ޑިސެމްބަރ 03 ވާ އަންގާރަ ދުވަހުގެ ހެނދުނު 10:00 ގައި ކަމަށް އެ އިދާރާއިން މަޢުލޫމާތު ދީފައިވެއެވެ.
ނީލަމުގައި ވިއްކާލަން ނިންމާފައިވާ ތަކެތީގެ ތެރޭގައި ހިމެނެނީ އެކި ބްރޭންޑްތަކުގެ އިންޖީނުތަކާއި ޓެސްޓް ރިގްތަކެވެ. މީގެ ތެރޭގައި ވޯލްވޯ، ޔަންމަރ، ޕަރކިންސް، ސޭބަރ، ޑޯޓްޒް އަދި ޑެޓްރޮއިޓް އިންޖީނުތަކާއި އިންޑިއާގެ ޓެސްޓް ރިގްތައް ހިމެނެއެވެ. މި ތަކެތީގެ ފެށޭ އަގު 9،252 ރުފިޔާއިން ފެށިގެން 77،010 ރުފިޔާއާ ހަމައަށް ހުރިކަން ފާހަގަކުރެވެއެވެ.
މޯލްޑިވްސް ޕޮލިޓެކްނިކުން މި ނިންމުން ނިންމާފައިވަނީ ދައުލަތުގެ މުދާ އެއް އޮފީހުން އަނެއް އޮފީހަށް ބަދަލުކުރުމާއި، ބައުވެ ހަލާކުވެގެން ނުވަތަ ބޭނުންކުރެވެން ނެތް ދައުލަތުގެ މުދާ ނީލަން ކިޔުމާއި ނައްތާލުމުގައި ޢަމަލުކުރާނެ އުސޫލާ އެއްގޮތްވާ ގޮތުގެ މަތިންނެވެ. މި ތަކެއްޗަށް އެހެން ދައުލަތުގެ އޮފީހަކުން ބޭނުންވޭތޯ ބެލުމަށް ނީލަން ޕޯޓަލުން ކުރި އިޢުލާނަށް އެއްވެސް ޖަވާބެއް ލިބިފައިނުވާތީ، މި ތަކެތި ދުވަހު ނީލަމުގައި ވިއްކާލުމަށް ވަނީ ނިންމާފައެވެ.
ނީލަމާ ގުޅޭ މަޢުލޫމާތު ސާފުކުރުމަށް 2024 ނޮވެމްބަރ 24 އިން 2024 ޑިސެމްބަރ 02 އާ ދެމެދު ސަރުކާރު ބަންދު ނޫން ކޮންމެ ދުވަހެއްގެ ހެނދުނު 9:00 އިން މެންދުރުފަހު 1:00 އާ ދެމެދު މޯލްޑިވްސް ޕޮލިޓެކްނިކަށް ޒިޔާރަތްކުރުމަށް ވަނީ ހުޅުވާލާފައެވެ. އަދި ނީލަމުގައި މުދާ ނަގާ ފަރާތްތަކުން 24 ގަޑިއިރުގެ ތެރޭގައި ފައިސާ ދައްކައި، 7 ދުވަހުގެ ތެރޭގައި މުދާ ގެންދަންޖެހޭނެ ކަމަށްވެސް އެ އިދާރާއިން ބުނެފައިވެއެވެ.
