ޓެރަރިޒަމްގެ ހަމަލާތައް އެއްތަނެއްގައި ކޮންޓްރޯލުވާއިރު އަނެއް ތަނެއްގައި އެކަން އާންމު ކަމަކަށް ވެދެއެވެ. މިމަހުގެ 26 ވެގެންދާނީ އިންޑިއާގެ މުމްބާއިއަށް މީގެ 16 އަހަރު ކުރިން ދިން ޓެރަރިސްޓް ހަމަލައަށް އަނެއްކާވެސް އަހަރެއް ފުރޭ ދުވަހަށެވެ. ތަފާތުކުރުމާއި ނަފްރަތާއެކު ޓެރަރިސްޓް ހަމަލަތައް ކޮންޓްރޯލެއް ނުވެއެވެ.
އިންޑިއާގެ ނަރިމަން ޕޮއިންޓަށް ދިން ހަމަލައަކީ، މަސްވެރިންގެ އާބާދީއެއްގެ ކައިރިއަށް ލެފި ޑިންގީއެއްގައި އައި ބަޔަކު ދިން ހަމަލާއެކެވެ. ބާހައްޓި ގަޑިރު ވަންދެން އެމީހުންގެ ހަމަލާތައް ދެމިގެން ދިޔައެވެ. 195 މީހަކު މަރުވިއެވެ. އަދި އެތައް ސަތޭކަ ބަޔަކު ޒަޚަމްވިއެވެ.
ހަމަލަ ދިން މީހުންނަކީ ބަލާބެލުމަށް އާދައިގެ ޒުވާނުން ތަކެކެވެ. ބެކްޕެކް އަޅައިގެން ތިބި ބައެކެވެ. ބެކްޕެކުން ނެރުނީ ބަޑިއާއި އަތު ބޮމެވެ.
ހަމަލަތައް އަމާޒު ކުރީ، އާންމުން އެއްވާ ތަންތަނަށާއި ފަތުރުވެރިންގެ މަންޒިލްތަކަށެވެ. މުމްބާއީގެ އޭރުގެ ވިކްޓޯރިއާ ޓާމިނަލް އަށެވެ. ތާޖު ހޮޓަލަށެވެ.
އެމީހުންގެ މިޝަންއަކީ، ހަލަބޮލިކަން ފެތުރުމާއެކު ވީހާވެސް ގިނަ ބަޔަކު ނައްތާލުމެވެ.
ރޭލްވޭ ސްޓޭޝަންގައި 50 އަށް ވުރެން ގިނަ މީހުން މަރާލިއެވެ. ތާޖް މަހަލް ހޮޓެލާއި އޮބެރޯއީ ހޮޓަލުގައި ރެސްޓޯރެންޓްތަކާއި ހޯލްތަކަށް ވަދެ ފަތުރުވެރިންނާއި މުވައްޒަފުންނަށް ހަމަލަ ދިނެވެ. ބަޔަކު މަރާލިއެވެ. އެހެން ބަޔަކު ރަހީނުކޮށްލިއެވެ.
ޕާސްޕޯޓުތަކަށް ބަލައި ގައުމިއްޔަތު ވަކިކޮށްލައި ހަމަލާގެ އަމާޒަކަށް ބައެއް ގައުމިއްޔަތުތައް ހެއްޖެވެ.
ހަމަލަދިން މީޙުންގެ ތެރޭން ގިނަ ބަޔަކު ފުލުހުންނާއި ދެމެދު ބަދަލު ކުރި ހަމަލަތަކުގައި ނައްތާލެވުނެވެ. ދިރި ހުއްޓާ ހައްޔަރު ކުރެވުނީ، އަޖުމަލު ކައްސާބެވެ. ކަޝްމީރުގެ ޒުވާނެކެވެ. އޭނާ އެންމެ ވައްތަރީ ދެންމެ ޔުނިވަރސިޓީއެއްގެ ކިލާހެއް ނިންމާފައި ނިކުމެގެން އައި ޒުވާނަކާއެވެ.
އޭނާގެ އިއުތިރާފުގެ މައްޗަށް ބިނާކޮށް އާންމުކޮށްފައިވާ މައުލޫމާތުން އެނގުނީ، އެ ހަމަލަ ރާވާފައި ވަނީ، ޕާކިސްތާނުގައި އޮންނަ ލަޝްކަރޭ ޠޮއްޔިބާގެ ޖަމާއަތުން ކަމަށެވެ. އޭނާއަށް ދުރުގައި ތިބެގެން މަގުދައްކަމުން ދިޔައީ، ކަރާޗީގައި ތިބި ހެންޑްލަރުން ކަމަށް ފޯނުގެ މައުލޫމާތުން އެނގުނެވެ.
ހަމަލައަކީ، މަސްތަކެއް ވަންދެން ތައްޔާރުކޮށް ރާވާފައިޥާ ޙަމަލައެއްކަން ވެސް އެނގުނެވެ.
ކައްސާބާ ހަވާލާދީ ބުނެފައި ވަނީ، ކަރާޗީން ދަތުރު ކުރީ ޖީޕީއެސް ބޭނުން ކޮށްގެންނެވެ. އިންޑިއާގެ ގުޖުރާތު ފަހަނައަޅައި އަރަބި ކަނޑުން މުމްބާއީއާ ދިމާއަށެވެ. ކައްސާބުގެ ހަތިޔާރު ގުދަނަކަށް ބޭނުންކޮށްފައި ވަނީ ކަރާޗީގެ ގެއެކެވެ. ކައްސާބަކީ މި އޮޕަރޭޝަންގައި އުޅުނު އެންމެ ބޮޑު މީހާ އެއްޔެވެ؟
ކައްސާބުގެ ހަމަލަ ކާމިޔާބުވީ އިންޑިއާގެ ސަލާމަތީ ކަންކަމުގެ ދޯހަޅި ކަމުންނެވެ. މުމްބާއީ އަކީ އިންޑިއާގެ އެންމެ ކާރޫބާރު ބޮޑު ވިޔަފާރި މަރުކަޒެވެ. 24 ގަޑިއިރު ހޭލާ އޮންނަ ސިޓީއެވެ. އެކަމަކުވެސް ޓެރަރިސްޓުންގެ ބަޔަކަށް ފަސޭހައިން އެންމެ މުހިންމު ސިޓީގެ އެންމެ ސްޓްރެޓެޖިކް މަރުކަޒު ރަހީނު ކޮށް ޙަމަލަ ދެވިއްޖެއެވެ.
މުމްބާއީގެ ސަލާމަތީ އިންފްރާސްޓްރަކްޗާގައި ހުރި ދޯހަޅިކަން މި ހަމަލައިން ހާމަވެގެން ދިޔައެވެ.
ރާއްޖެއަށް ނޮވެމްބަރު 3ގެ ޓެރަރިސްޓް ހަމަލަ ދިނުމާ ގުޅިގެން އިންޑިއާގެ ކޮމާންޑޯންނަށް 12 ގަޑިރު ތެރޭގައި އައިސް ފޭބުނު އިރު، މުމްބާއިއަށް 62 ގަޑިއިރު ވަންދެން ދެމުން ދިޔަ ހަމަލަ އިންޑިއާއަށް ކޮންޓްރޯލެއް ނުކުރެވުނެވެ.
މި ހަމަލައަށްފަހު އިންޑިއާއާއި ޕާކިސްތާނުން ބަހުގެ ހަނގުރާމަތައް ކުރިއެވެ. އިންޑިއާގެ ތުހުމަތުތަކެވެ. ޕާކިސްތާނުގެ އިންކާރު ކުރުމެވެ.
17 އަހަރަށް ލައިގަންނަ އިރުވެސް ޓެރަރިޒަމް އަދިވެސް ހަމައެ ގޮތުގައެވެ. އެއްތަނުން ހިނދާ ލެވޭއިރު އަނެއް ތަނުން ބޯހިއްލައެވެ. ޓެރަރިޒަމަށް މަގުފަހިވާ ކަންކަން ހައްލު ކުރުމަށް ފިޔަވަޅެއް ނޭޅެއެވެ. ނަމަވެސް ޓެރިޒަމަކީ ދުލަށް ފަރިތަ ބަހަކަށް ވެއްޖެއެވެ.
