އެޕަލް އިން ދަނީ އެކުންފުނީގެ އުފެއްދުންތެރިކަން ރަނގަޅު ކުރުމަށް އިންޑިއާއިން ސަޕްލައި ކުރާ ފަރާތްތަކަށް އިތުރަށް ބަރޯސާވަމުންނެވެ. އަދި އައިފޯން، މެކްބުކް، އައިޕެޑް، އަދި އެއާޕޮޑްސް ފަދަ ޑިވައިސްތަކުގެ މުހިއްމު ކޮމްޕޯނެންޓްތައް އިންޑިއާއިން ހޯދުމަށްވެސް މަސައްކަތް ކުރަމުންނެވެ.
މަނީކޮންޓްރޯލު ވެބްސައިޓްގައި ބުނެފައިވާ ގޮތުގައި އިންޑިއާގެ 40 އަށް ވުރެ ގިނަ ކުންފުންޏާއެކު އެޕަލް އިން މިހާރު ވަނީ ޕާޓްނަޝިޕް ހަދާފައެވެ.
އޭގެ ތެރޭގައި ޑިކްސަން ޓެކްނޮލޮޖީސް، އަމްބަރ އިލެކްޓްރޯނިކްސް، އެޗްސީއެލްޓެކް، ވިޕްރޯ، އަދި މަދަސަން ގްރޫޕް ފަދަ ފާހަގަކޮށްލެވޭ ކުންފުނިތައް ހިމެނެއެވެ.
މި އިސްނެގުމަކީ ބޮޑެތި ކުންފުނިތަކާއި އައިޓީ ކުންފުނިތަކާއި އިލެކްޓްރޯނިކްސް ސާމާނު އުފައްދާ ކުންފުނިތަކާ ގުޅިގެން އިންޑިއާގެ ތެރޭގައި ސަޕްލައި ކުރުމުގެ މަސައްކަތް ފުޅާކުރުމަށް އެޕަލް އިން ކުރާ މަސައްކަތް ދައްކުވައިދޭ ކަމެކެވެ.
އެޕަލް ކުންފުނިން އިންޑިއާގެ ސަޕްލަޔަރުންނަށް އަމާޒުކޮށްފައި ވަނީ، ޗައިނާއިން ސަޕްލައި ކުރާ ފަރާތްތަކާ އެކު ދިމާވެފައިވާ ގޮންޖެހުންތަކުގެ ސަބަބުންނެވެ. ކުރިން ޗައިނާ ކުންފުނިތަކުން އިންޑިއާގައި އިންވެސްޓް ކުރަމުން ދިޔައެވެ. ނަމަވެސް ދެ ގައުމުގެ ގުޅުން ގޯސްވެ، ގަލްވާން ވާދީގެ ހަމަނުޖެހުމާ ގުޅިގެން، އެޕަލް އަށް ސަޕްލައިކުރާ ޗައިނާގެ ގިނަ ކުންފުނިތަކުން ވަނީ ގާނޫނީ އަދި ޓެކްސްގެ ދަތިތަކާ ގުޅިގެން އިންޑިއާގައި އިންވެސްޓް ކުރުން ހުއްޓާލާފަ އެވެ.
މިސާލަކަށް އައިޕެޑް އުފެއްދުމުގެ ސަޕްލަޔަރެއް ކަމަށްވާ ބީއައިޑީ ކުންފުންޏަށް އިންޑިއާގައި ވިޔަފާރިކުރުމުގެ ހުއްދަ ނުލިބުމުން އެޕަލް އިން ވަނީ އިންޑިއާގެ ބާޒާރުގައި އެހެން ފަރާތްތައް ހޯދަން މަސައްކަތް ކޮށްފައެވެ.
އެޕަލް އިން ވަނީ އިންޑިއާގެ ކުންފުނިތަކާ އެކު މަޝްވަރާތަކެއް ކޮށް، ޗައިނާ، ޓައިވާން، އަދި ޖަޕާން ފަދަ ގައުމުތަކުގެ ހިއްސާދާރުންނާ އެކު ޖޮއިންޓް ވެންޗާތައް ހަދާފައެވެ. މި ޖޭވީތަކަކީ، އިންޑިއާގައި ޑިސްޕްލޭ އާއި ކެމެރާ މޮޑިއުލް ފަދަ މުހިންމު ކޮމްޕޯނެންޓްތައް އުފެއްދުމަށް މަސައްކަތް ކުރާނެ ކުންފުނިތަކެވެ.
އަދި އެޕަލްއިން ގެންގުޅޭ އެކި ކުންފުނިތަކުން އެކި ބައިތައް އުފައްދައި ހޯދުމުގެ ސްޓްރެޓެޖީގެ ތެރެއިން އިންޑިއާގެ ތަފާތު އެކިއެކި ސަޕްލަޔަރުން އަތުން އެޕަލް އިން ދަނީ އެކި ބައިތައް ގަންނަމުންނެވެ.
