ކީރިތި ޤުރުއާނު އަންދާލި މައްސަލައިގައި މި އަހަރުގެ ކުރީކޮޅު ކުށް ސާބިތުވި ރަޝިޔާ މީހެއްގެ މައްޗަށް ދައުލަތަށް ޚިޔާނާތްތެރި ވުމުގެ ކުށުގައި އިތުރު 14 އަހަރުގެ ޖަލު ހުކުމެއް އިއްވައިފިއެވެ.
ކޯޓުގެ ލިޔެކިޔުންތަކާ ހަވާލާދީ ރަޝިޔާގެ ނޫސް އެޖެންސީ ޓާސް އިން ރިޕޯޓްކޮށްފައިވާ ގޮތުގައި ނިކިޓާ ޒުރަވެލްއަށް ހުކުމް އިއްވީ ރަޝިޔާގެ ވޮލްގޮގްރަޑް ސިޓީގެ ކޯޓަކުންނެވެ. އޭނާއަށް ޙުކުމް ކޮށްފައި ވަނީ މެކްސިމަމް ސެކިއުރިޓީ ޖަލު ހަދާފައިވާ ސަރަހައްދަކަށް 14 އަހަރު ދުވަހުގެ މުއްދަތަށް އަރުވާލައި ޖަލަށް ލާށެވެ.
ޒުރާވެލް ވަނީ ޔޫކްރޭންގެ ސިފައިންނަށް ރަޝިޔާގެ އަސްކަރީ ހަރަކާތާ ބެހޭ މައުލޫމާތު ދީފައެވެ. އޭނާ އެކަން ކޮށްފައި ވަނީ 2023ގައެވެ. އޭނާ ވީޑިއޯއާއި ލިޔުންތައް ޔުކްރެއިންއަށް ދިން ކަމަށް ދައުވާގައި ބުނެފައި ވެއެވެ.
މީގެ ކުރިން ފެބްރުއަރީ މަހު ޒުރާވެލް އަށް ތިން އަހަރާއި ބައިގެ ހުކުމެއް އިއްވާފައި ވަނީ 2023 ވަނަ އަހަރުގެ މެއި މަހު ވޮލްގޯގްރަޑްގެ މިސްކިތެއް ކުރިމަތީގައި ކީރިތި ޤުރުއާނުގެ ކޮޕީއެއް އަންދާލި މައްސަލައިގައެވެ.
