ޑިޖިޓަލް ވަސީލަތްތަކުގެ އަވައިގައި ޖެހުމުގެ ސަބަބުން މީހުންގެ ޢަޤީދާ ގެއްލިޔަ ނުދިނުމަށް ފިޔަވަޅު އެޅުމަށް ތުރުކީގެ ރައީސް ރަޖަބް ޠައްޔިބު އުރުދުޣާން މިއަދު އިލްތިމާސް ކުރައްވައިފިއެވެ.
އިންސާނާގެ ދިރިއުޅުމުގެ ނާރެހުގެ މަރުކަޒަކަށް ޑިޖިޓަލް ވަސީލަތްތައް ވެގެން ދިއުމުން، ބާވައި ލެއްވި ދީންތަކަށް އޭގެ ނޭދެވޭ އަސަރު ކުރަމުންދާ ކަމުގައި އެރުދުޣާން ވިދާޅުވިއެވެ. އަދި ވަކިން ޚާއްސަކޮށް އެފަދަ ވަސީލަތައް މެދުވެރިކޮށް އިސްލާމް ދީނަށް އަމާޒުކޮށް މީހާގެ އަޤީދާ އޮޅުވާލައި ކަސިޔާރު ކުރުމަށް މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
"ޑިޖިޓަލް ހަރަކާތުން ބާވައި ލެއްވި ހުރިހާ ދީނަކަށް އަމާޒުކުރޭ. ވަކިން ޚާއްސަކޮށް އިސްލާމްދީނަށް އަމާޒުކޮށްގެން އައު މަޞްނޫޢީ ދީނެއް އުފެއްދުމަށް މަސައްކަތް ކުރޭ" ތުރުކީގެ ވެރިރަށް އަންކާރާގައި ބޭއްވި ހަތް ވަނަ ދީނީ މަޖިލީހުގެ ކޮންފަރެންސްގައި ވާހަކަ ދައްކަވަމުން ރަޖަބް ތައިބް އުރުދުޣާން ވިދާޅުވި އެވެ.
އަރުދުޣާން ވަނީ، މުސްލިމުންގެ އަގުތައް ހިފެހެއްޓުމަށް ގޮވާލައްވާފައެވެ. އަދި "ޑިޖިޓަލް ވަސީލަތްތަކުން އުފައްދާ ޢަޤީދާއަށް ބޯ ލަނބައި ނުލުމަށާއި" އެފަދަ ވަސްވާހަށް ވެއްޓިގެން ނުދިއުމަށް ފިޔަވަޅު އެޅުމަށް އުރުދުޣާން ވަނީ އިލްތިމާސް ކުރައްވާފަ އެވެ.
"ޑިޖިޓަލް ޢޤީދާ ނިޒާމަކުން މުސްލިމުންގެ ހުރިހާ އަގުތަކެއް ރައްކާތެރި ކުރުމަށް އަވަސް ފިޔަވަޅުތަކެއް އަޅަން ވަނީ ޖެހިފައި، އެކަމަށް އަވަސް ގޮތަކަށް ކަންކަން ތަންފީޒު ކުރަން ޖެހޭ،" ތުރުކީ ރައީސް އިތުރަށް ވިދާޅުވި އެވެ.
