ލުބުނާނުގެ ދެކުނަށް ވަދެގަތް އިޒްރޭލުގެ 50 އަށް ވުރެން ޓޭންކުތައް މިސައިލް ބޭނުންކޮށްގެން ނައްތާލާފައިވާ ކަމަށް ޙިޒުބުﷲ އިން ބުނެފިއެވެ. ޙިޒުބުﷲ އިން ނެރުނު ބަޔާނެއްގައި ބުނެފައި ވަނީ މިއީ 52 ދުވަހުގެ ތެރޭހައި ހޯދުނު ކާމިޔާބީއެއް ކަމަށެވެ.
ޙިޒުބުﷲ އިން ދަނީ މެދުނުކެނޑި އިޒްރޭލަށް ހަމަލަ ދެމުންނެވެ. އެހަމަލަތަކުގެ ވަރުގަދަކަމުން ލިބެމުންދާ ގެއްލުންތައް ފޫބެއްދުމަށް އިޒްރޭލުން ހަނގުރާމަ ހުއްޓާލަން ބޭނުންވާ ކަމަށްވެސް ބުނެފައި ވެއެވެ. ޙިޒުބުﷲ އިން ބުނެފައި ވަނީ ހަމަލަތައް ހުއްޓާލާނީ ޙިޒުބުގެ ޝަރުތުތަކާ އެއްކޮށް ކަމަށެވެ.
މުހައްލިމުން ބުނެފައި ވަނީ ޙިދުބުﷲ އިން ދެމުންދާ ޙަމަލަތަކުން ޓޭންކުތައް ހަލާކު ވުމުން އިޒްރޭލުގެ ހަނދާނަށް އަންނާނީ، ޖުލައި 2006 ގެ ހަނގުރާމައިގެ ދުވަސްތައް ކަމަށެވެ.
ޓޭންކުތައް ހަލާކުކޮށްލައި ގޮއްވާލާއިރު އޭގައި ތިބޭ މީހުންވެސް މަރާލައެވެ.
ނޮވެމްބަރު 22 ވަނަ ދުވަހުން ފެށިގެން މިހާތަނަށް ދީފައިވާ ޙަމަލަތަކުގައި ޙިޒުބުން ވަނީ 10 ޓޭންކް އޭގެ ފަޅުވެރިންނާއެކު ހަލާކުކޮށްލާފައެވެ. ޒަޔަނިސްޓު ޓެރަރިސްޓް ސިފައިންގެ އެއްގަމު ސިފައިން ޙަމަލަ ދިނުމަށް ބޭނުންކުރާ މައިގަނޑު ވަސީލަތަކީ، ޓެންކްތަކެވެ. އަދި ގިނަ އަދަދެއްގެ ޓޭންކުތައް ނައްތާލުމުން ހަނގުރާމައަށް ނޭދެވޭ އަސަރެއް ކުރާނެ ކަމަށް ބެލެވެއެވެ.
