ޓޫރިޒަމް ދާއިރާގެ ވިޔަފާރިތަކުން ޑޮލަރު މާރުކުރަން މަޖުބޫރުކުރުމަށް ހަދާފައިވާ ގަވާއިދަށް އެއްވެސް ބަދަލެއް ގެނެސް ލުއިތަކެއް ދީފައިނުވާނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.
ގަވަރުނަރު މުނައްވަރު މިހެން ވިދާޅުވެފައިވަނީ "ބޭރު ފައިސާއާ ބެހޭ ބިލް" އާންމުންގެ ޚިޔާލަށް ހުޅުވާލުމާ ގުޅިގެން، އެ ބިލް ގާނޫނަކަށް ވުމުން ޑޮލަރު މާރުކުރުމަށް ލުއިތަކެއް ލިބިގެންދާނެ ކަމަށް ބައެއް ނޫސްތަކުން ރިޕޯޓުކުރުމާ ގުޅިގެންނެވެ.
އެމްއެމްއޭއިން މިއަދު ބޭއްވި ނޫސްވެރިންގެ ބައްދަލުވުމުގައި މުނައްވަރު ވިދާޅުވީ ޑްރާފްޓު ބިލެއް އެކުލަވާލީ މިހާރު ހަދާފައިވާ ގަވައިދަށް ގާނޫނީ ބާރުތަކެއް ދިނުމުގެ އިތުރުން ބޭރު ފައިސާ މާރުކުރުމުގެ މަސައްކަތް ވަކި ނިޒާމެއްގެ ތެރެއިން ހަރުދަނާ ގޮތަކަށް ކުރެވޭނެ އިންތިޒާމުތަކެއް ހަމަޖެއްސުމަށް ކަމަށެވެ. އަދި ބިލް ގާނޫނަކަށް ވެގެން އަންނައިރު، މިހާރު އޮތް ގަވާއިދުގައިވާ ގޮތަށް ޑޮލަރު މާރުކުރަންޖެހޭނެ ކަމަށްވެސް އެމަނިކުފާނު ވިދާޅުވިއެވެ.
ގަވަރުނަރު މުނައްވަރު އިތުރަށް ވިދާޅުވީ، ޓޫރިޒަމް ދާއިރާއަށް އަހަރަކު އެތައް ބިލިއަން ޑޮލަރެއް ލިބުނު ނަމަވެސް، އެމްއެމްއޭއަށް ލިބެނީ ގާތްގަނޑަކަށް ބިލިއަނެއްހާ ޑޮލަރު ކަމަށާއި، އޭގެ ތެރެއިން 700 މިލިއަން ޑޮލަރު ދަނީ އަސާސީ ބޭނުންތަކަށް ކުރާ ޚަރަދާއި ލޯނު ދެއްކުމަށް ކަމަށެވެ. އެހެންކަމުން، އަސާސީ ޚިދުމަތްތައް މެދުނުކެނޑި ދިނުމަށްޓަކައި އެމްއެމްއޭއަށް ޑޮލަރު ލިބޭނެ ގޮތްތަކެއް އޮންނަންޖެހޭ ކަމަށް ގަވަރުނަރު ފާހަގަކުރެއްވިއެވެ.
ގަވާއިދުގައިވާ ގޮތަށް ޑޮލަރު މާރުކުރުމުގެ ކަންކަން ކުރިއަށް ގޮސްފިނަމަ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވި ގޮތަށް އާންމުންނާއި ވިޔަފާރިވެރިންނަށް ލިބޭ ޑޮލަރުގެ ނިސްބަތް އިތުރުވެ، ކަޅު ބާޒާރުން ޑޮލަރު ހޯދަންޖެހޭ މައްސަލައަށް ލުއިތަކެއް ލިބޭނެ ކަމަށްވެސް ގަވަރުނަރު ވިދާޅުވިއެވެ.
ބޭރު ފައިސާއާ ބެހޭ ބިލްގެ މުހިއްމު މައުލޫމާތުތައް ހިމެނޭހެން ހަދާފައިވާ ޕްރެޒެންޓޭޝަނެއްވެސް އެމްއެމްއޭ އިން މިއަދު ވަނީ ނޫސްވެރިންނާ ހިއްސާކޮށްފައެވެ
ޕްރެޒެންޓޭޝަންގައި ހިއްސާކުރި މައުލޫމާތުގައިވާ ގޮތުން، ކެޓަގަރީ "އޭ" ގައި ހިމެނޭ ރިސޯޓުތަކާއި، ހޮޓާތަކާއި، ޓޫރިސްޓު އުޅަނދުތަކަށް އަންނަ ކޮންމެ ފަތުރުވެރިއެއްގެ އަތުން 500 ޑޮލަރުގެ ރޭޓުން ރާއްޖޭގެ ބޭންކަކަށް މާރުކުރަންޖެހޭނެއެވެ.
ކެޓަގަރީ "ބީ" ގައި ހިމެނޭ ގެސްޓްހައުސްތަކުން ކޮންމެ ފަތުރުވެރިއެއްގެ އަތުން 25 ޑޮލަރުގެ ރޭޓުން ރާއްޖޭގެ ބޭންކަކަށް ޖަމާކުރަންޖެހޭނެއެވެ.
ގަވަރުނަރު މުނައްވަރު ވިދާޅުވީ، މި ބިލްގައި އިތުރު ކެޓަގަރީއެއް ހިމަނާފައިވާ ކަމަށެވެ. އެގޮތުން، ޓޫރިޒަމް ދާއިރާގައި ނުހިމެނޭ ފަރާތްތަކަށްވެސް އަހަރަކު 20 މިލިއަން އެމެރިކާ ޑޮލަރަށްވުރެ ގިނައިން ބޭރު ފައިސާ ލިބޭނަމަ، އެ ފައިސާގެ 25 ޕަސެންޓަށްވުރެ ބޮޑު ނުވާ އަދަދެއް ރާއްޖޭގެ ބޭންކަކަށް ޖަމާކޮށް މާރުކުރަން ލާޒިމުކޮށްފައިވާ ކަމަށް އެމަނިކުފާނު ވިދާޅުވިއެވެ.
ގަވަރުނަރު އިތުރަށް ވިދާޅުވީ، ޑޮލަރު މާރުކުރުމުގެ ގަވާއިދަށް ބަދަލެއް ގެނެސް ލުއިތަކެއް ދީފައި ނުވި ނަމަވެސް، ޓޫރިޒަމް ދާއިރާގެ ބައެއް ފަރާތްތަކުގެ ޝަކުވާތަކަށް ރިޢާޔަތްކޮށް، އަލަށް އެކުލަވާލި ބިލްގައި އެފަދަ ޝަކުވާތަކަށް ހައްލުތަކެއް ހޯދައިދިނުމަށް މަސައްކަތްކޮށްފައިވާނެ ކަމަށެވެ.
