އެމެރިކާގެ އޮފިޝަލުންނާ ހަވާލާދީ ރިޕޯޓު ކޮށްފައިވާ ގޮތުގައި ކޮރަޕްޝަނާ ގުޅުން ހުރި މައްސަލައެއްގައި ޗައިނާއިން ޑިފެންސް މިނިސްޓަރު ޑޮންގް ޖޫން ގެ ތަހުގީގެއް ފަށައިފިއެވެ.
ފައިނޭންޝަލް ޓައިމްސް އިން ބުނިގޮތުގައި މިއީ ޗައިނާގެ ސިފައިންގެ މަތީ ފަންތީގެ ވެރިންނަށް ތުހުމަތު ކުރެވޭ ފުޅާ ދާއިރާއެއްގައި ހިނގާފައިވާ ކޮރަޕްޝަންގެ މައްސަލައެއްގައި ތަހުގީގު ކުރެވޭ 3 ވަނަ މަސްއޫލުވެރިޔާއެވެ.
ޑިފެންސް މިނިސްޓަރު ޑޮންގް ޖޫން މަގާމު ފުރުއްވަމުން ގެންދަނީ މިދިޔަ އަހަރުގެ ޑިސެމްބަރު މަހުން ފެށިގެން ނެވެ. އޭނާގެ ކުރިން އެމަގާމުގައި ހުންނެވި، ދިފާއީ ވަޒީރު ލީ ޝަންގްފޫ އެންމެ ހަތް މަސް ދުވަސް ހޭދަކުރެއްވުމަށް ފަހު ކޮރަޕްޝަންގެ ތުހުމަތުގައި ވަނީ މަގާމުން ވަކިކޮށްފައެވެ.
ޑޮންގް އާއި ލީ ވެސް އައްޔަން ކުރެއްވީ ޗައިނާގެ ލީޑަރު ޝީ ޖިންޕިން އެވެ. ޑޮންގްގެ މައްޗަށް ކުރާ ކޮރަޕްޝަންގެ ތުހުމަތުތަކުގެ ތަފްސީލު ސާފެއް ނުވެއެވެ.
