އިންޑިއާއިން ދިވެހިރާއްޖެއަށް ކަނޑައަޅުއްވާފައި ހުންނެވި ސަފީރު މަނޫ މަހާވަރު، މިއަދު ހެނދުނު ޚާރިޖީ ވަޒީރު ޑރ. ޢަބްދުﷲ ޚަލީލުގެ އަރިހަށް ވަދާޢީ ޒިޔާރަތެއް ކުރައްވައިފިއެވެ. މި ބައްދަލުވުން ބޭއްވުނީ ފޮރިން މިނިސްޓްރީގައެވެ.
މި ބައްދަލުވުމުގައި ދެ ޤައުމުގެ ގުޅުން ހަރުދަނާކުރުމަށްޓަކައި، ޚާއްޞަކޮށް ވޭތުވެދިޔަ އަހަރެއްހާ ދުވަހުގެ ތެރޭގައި، ސަފީރުގެ މުހިންމު ޙިއްޞާތައް ފާހަގަކުރެވުނެވެ. ޚާރިޖީ ވަޒީރު ޑރ. ޚަލީލު ވަނީ ދެ ޤައުމުގެ ގުޅުން ބަދަހިކުރުމަށާއި، ދެ ޤައުމުގެ ދޭދޭ ފަރުދުންގެ މެދުގައި އަދި ވިޔަފާރީގެ ގުޅުން ބަދަހިކުރުމުގައި ހައިކޮމިޝަނަރު އަދާކުރެއްވި މުހިންމު ދައުރަށް ތަޢުރީފުކުރައްވާފައެވެ.
ވަޒީރު ވަނީ ރާއްޖޭގެ އުމްރާނީ ތަރައްޤީގެ ބިޔަ މަޝްރޫޢުތަކަށާއި، މުހިންމު ރަށްރަށުގެ ފަރުދީ ތަރައްޤީއަށް އިންޑިއާ ސަރުކާރުން ދެއްވާ އެހީތެރިކަން ފާހަގަކުރެވުނެވެ. އަދި ރޫޕޭ ކާޑު އޮޕަރޭޝަނަލައިޒް ކުރުމާއި، ޔޫޕީއައި ތަޢާރަފްކުރުމާއި، ލޯކަލް ކަރަންސީ ޓްރޭޑް އެގްރީމަންޓްތައް ފަދަ މައިލްސްޓޯންތަކަކީ އިޤްތިޞާދަށް އެޅުނު ހަރުދަނާ ފިޔަވަޅުތަކެއްކަމުގައި ވަޒީރު ފާހަގަކުރެއްވިއެވެ.
އިންޑިއާ ސަފީރު މަނޫ މަހާވަރު ވަނީ އެ މަނިކުފާނުގެ މަސައްކަތުގައި ދިވެހި ސަރުކާރާއި ރައްޔިތުން ދެއްވި ފުރިހަމަ އެއްބާރުލުމާއި ބެހެއްޓެވި ގާތްކަމަށް އިޚްލާޞްތެރިކަމާއެކު ޝުކުރު އަދާކުރައްވާފައެވެ. އަދި އިންޑިއާއާއި ދިވެހިރާއްޖޭގެ ގުޅުން ކުރިއަށް އޮތްތަނުގައި ކުރިއަރައި ތަނަވަސްކަންމަތީ ދެމިއޮތުމަށް އުންމީދުކުރައްވާ ކަމަށް ވިދާޅުވިއެވެ.
މި ބައްދަލުވުމުގައި ފާއިތުވެދިޔަ އަހަރުގެ ފާހަގަކޮށްލެވޭ ކާމިޔާބީތަކަށް އަލިއަޅުވާލައްވައި، ރައީސުލްޖުމްހޫރިއްޔާގެ ކާމިޔާބު ފުރަމާނަ ދަތުރުފުޅުގައި އެއްބަސްވެވުނު ކަންކަމާ މެދުވެސް މަޝްވަރާކުރެވުނުކަމަށް ޚާރިޖީ ވުޒާރާއިން ހާމަކުރިއެވެ.
އިންޑިއާ ސަފީރު މަސައްކަތްޕުޅު ނިންމަވާލައްވަނީ ތިން އަހަރަށްވުރެ ގިނަ މުއްދަތަކަށް ދެ ޤައުމުގެ ގުޅުން ބަދަހިކުރުމަށް ޚިދުމަތްކުރެއްވުމަށްފަހުގައެވެ. ބައްދަލުވުން ނިންމަވާލައްވަމުން، ޚާރިޖީ ވަޒީރު ވަނީ ސަފީރަށް ކުރިއެރުމާއި ކާމިޔާބީއަށް އެދިވަޑައިގެން، އަދި ދިވެހިރާއްޖޭގެ ގާތް އެކުވެރި ބައިވެރިއެއްގެ ގޮތުގައި ދެމިހުންނަވާނެ ކަމަށް އުންމީދުކުރައްވާ ކަމަށް ވެސް ވިދާޅުވެފައެވެ.
