ޗައިނާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ވޮންގ ލިޝިން، ޚާރިޖީ ވަޒީރު ޑރ. ޢަބްދުﷲ ޚަލީލްގެ އަރިހަށް ވަދާޢީ ޒިޔާރަތެއް ކުރައްވައިފިއެވެ. މި ބައްދަލުވުން ބޭއްވުނީ ޚާރިޖީ ވުޒާރާގައިއެވެ.
މި ބައްދަލުވުމުގައި ވަޒީރު ޚަލީލް، ސަފީރު ވޮންގ ލިޝިންގެ ދައުރުގައި އެކަމަނާ ކޮށްދެއްވާފައިވާ މުހިއްމު މަސައްކަތްތައް ފާހަގަކުރައްވައި، ދިވެހިރާއްޖެއާއި ޗައިނާއާ ދެމެދު އޮތް ގުޅުން ކުރިއެރުވުމަށްޓަކައި އެކަމަނާ ދެއްވި އެހީތެރިކަމާއި އެއްބާރުލެއްވުމަށް ޝުކުރުއަދާކުރެއްވިއެވެ.
ސަފީރު ވޮންގ ލިޝިން ވިދާޅުވީ، އެކަމަނާގެ ދައުރުގައި ދިވެހި ސަރުކާރުން ބެހެއްޓެވި ގާތްކަން ފާހަގަކުރައްވާ ކަމަށެވެ. އަދި އެކަމަނާގެ މަސްއޫލިއްޔަތުތައް އަދާކުރުމަށްޓަކައި ދެއްވި އެއްބާރުލެއްވުމަށް ދިވެހި ސަރުކާރަށާއި، ދިވެހި ރައްޔިތުންނަށް ޝުކުރުއަދާކުރެއްވިއެވެ. މީގެއިތުރުން، ކުރިޔަށް އޮތް ތަނުގައިވެސް ދެ ޤައުމުގެ ގުޅުން އިތުރަށް ބަދަހިވެގެންދާނެކަމަށް އުއްމީދުކުރައްވާ ކަމަށްވެސް އެކަމަނާ ވިދާޅުވިއެވެ.
މި ބައްދަލުވުމުގައި ވޭތުވެދިޔަ އެއް އަހަރުގެ ތެރޭގައި ކުރިޔަށް ދިޔަ މުހިއްމު މަސައްކަތްތަކާއި ޙާޞިލުކުރެވިފައިވާ ކަންތައްތަކުގެ މައްޗަށް ދެ ބޭފުޅުން މަޝްވަރާކުރެއްވިއެވެ. އަދި މިހާރު ކުރިޔަށް ގެންދާ މުހިއްމު މަޝްރޫޢުތަކުގެ ފަހުގެ އަދާހަމައާއި ކުރިޔަށް ރޭވިފައި ހުރި މަސައްކަތްތަކާ ގުޅޭގޮތުންވެސް ވާހަކަދެކެވުނުކަމަށް ޚާރިޖީ ވުޒާރާއިން މަޢުލޫމާތުދެއެވެ.
ބައްދަލުވުން ނިންމަވާލައްވަމުން، ވަޒީރު ޚަލީލް ސަފީރަށް ކުރިއެރުމާއި ކާމިޔާބީ އަށް އެދިވަޑައިގަތެވެ. އަދި ދިވެހިރާއްޖޭގެ ގާތް ރަޙްމަތްތެރިއެއްގެ ގޮތުގައި އަބަދުވެސް ރާއްޖެއަށް އެ ކަމަނާ ޒިޔާރަތް ކުރެއްވުމަށް މަރުހަބާ ވިދާޅުވިއެވެ.
