1906 ވަނަ އަހަރު ޖަޕާނުގެ ފަޤީރު ރަށެއް ކަމުގައިވާ ޓެންރިޔޫގައި އުފަންވި ސޯއިޗިރޯ ހޮންޑާ، މޮޓޯ އިންޑަސްޓްރީގެ އެންމެ އާރުލާ ނަމަށް ކުރި ދަތުރަކީ ހައިރާނުން ފުރިގެންވާ ދަތުރުކެވެ.
ޅަފަތުގައި މެޝިންތަކަށް ޝައުޤުވެރިވި ހޮންޑާގެ ދިރިއުޅުން ބައްޓަންވެފައިވަނީ އޭނާގެ ބައްޕަގެ ދަގަނޑު މަސައްކަތްކުރާ ފިހާރަ އާއި ސައިކަލު މަރާމާތުކުރާ ފިހާރައިންނެވެ. ފޯޑް މޮޑެލް ޓީއަކާ އޭނާ ފުރަތަމަ ބައްދަލުވުމުން، ރަސްމީ ތަޢުލީމަށް ޝައުޤުވެރިކަމެއް ނެތް ނަމަވެސް، އުމުރު ދުވަހަށް ކާރުތަކަށް ލޯބިޖެހުނެވެ.
އުމުރުން 15 އަހަރުގައި ހޮންޑާ އޭނާގެ ރަށް ދޫކޮށް ވެރިރަށް ޓޯކިޔޯއަށް ދިޔައީ އާޓް ޝޯކައި ނަމަކަށް ކިޔާ ކާރު މަރާމާތުކުރާ ކުންފުންޏެއްގައި މަސައްކަތްކުރުމަށެވެ. އެކަމަކު އެ ކުންފުނިން ފުރަތަމަ ހަވާލުކުރީ ކުޑަކުދިން ބެލެހެއްޓުން ފަދަ މަސައްކަތްތަކެވެ. ނަމަވެސް އޭނާ ކެތްތެރިކަމާއެކު މަސައްކަތްކޮށް، ފަހުން އިތުބާރު ހޯދައިގެން މެކޭނިކަކަށްވެ، މަރާމާތުކުރުމާއި ވިޔަފާރި ހިންގުމުގައި ކުންފުނީގެ ވެރިންގެ އިތުބާރު ހޯދިއެވެ. އަދި މޯޓަރ ސްޕޯޓްސްގައި ބައިވެރިވުމާއި އިންޖިނިއަރިންގ އީޖާދުތަކުން އޭނާގެ ހުނަރުތައް އިތުރަށް ފުރިހަކުރިއެވެ.
1928 ވަނަ އަހަރާ ހަމައަށް އައިއިރު ހޮންޑާ ހުރީ އާޓް ޝޯކައިގެ ހަމަމަޓްސޫ ގޮފި ބަލަހައްޓާ މީހެއްގެ ގޮތުގައެވެ. އެތަނުގައި އޭނާގެ އަޒުމުގެ ސަބަބުން، ބަނގުރޫޓުވާން ކައިރިވެފައިވާ މަރާމާތުކުރާ ފިހާރައެއް ކުރިއަރާ ވިޔަފާރިއަކަށް ބަދަލުވިއެވެ.
ހުނަރުވެރި ރޭސް ޑްރައިވަރެއްގެ ގޮތުގައި، އޭނާ އަމިއްލައަށް އުފެއްދި ހަމަމަޓްސޫ ރޭސް ކާރުގައި ޖަޕާނުގެ ސްޕީޑް ރެކޯޑެއް ޤާއިމުކުރިއެވެ. ނަމަވެސް 1936 ގައި ނުރައްކާތެރި އެކްސިޑެންޓަކަށްފަހު، ބައްޕަ އާއި އަނބިމީހާ ކުރިމަތިކުރި ޕްރެޝަރުގެ ސަބަބުން ރޭސިންގ ދޫކޮށްލިއެވެ.
ހޮންޑާގެ އަމާޒުތައް އިތުރުވެ، ޓޯކައި ސެއިކި ހެވީ އިންޑަސްޓްރީ އުފެއްދިއެވެ. އެތަނުގައި ޕިސްޓަން އުފެއްދުމުގެ ހުނަރު ދަސްކުރިއެވެ. ދެވަނަ ބޮޑު ހަނގުރާމައިގެ ތެރޭގައި ފެކްޓަރީ ހަލާކުވުމާއި ބިންހެލުމުގެ ސަބަބުން ލިބުނު ގެއްލުންތަކާ ކުރިމަތިލާންޖެހުނު ނަމަވެސް ފަހަތަށް ނުޖެހި، ދެވަނަ ބޮޑު ހަނގުރާމާގައި ސުންނާފަތިވި ޖަޕާނުގެ އެކި ސަރަހައްދުތަކުގައި އުކާލާފައިވާ ޖެނެރޭޓަރު އިންޖީނުތައް ސައިކަލުތަކާ ގުޅުވައިގެން، ހަރަދުކުޑަކޮށް ދުއްވޭނެ ހޮންޑާ ކަބް މޯޓޯސައިކަލްގެ ކުރީގެ ޕްރޮޓޯޓައިޕް އުފެއްދިއެވެ. މި އީޖާދުގެ ސަބަބުން 1948 ގައި ރަސްމީކޮށް ހޮންޑާ މޯޓަރސް އުފެއްދުމުގެ ބިންގާ އެޅުނެވެ.
ސޯއިޗިރޯ ހޮންޑާއަކީ މިއަދު މުޅި ދުނިޔެވެސް ދަންނަ މަޝްހޫރު "ހޮންޑާ" ކުންފުނީގެ ބާނީއެވެ.
ސޯއިޗިރޯ "ހޮންޑާ" ގެ ދަތުރު، ފަޤީރު ދަގަނޑު މަސައްކަތްތެރިއެއްގެ ދަރިއަކުން ފެށިގެން ދުނިޔޭގެ އެންމެ މަޝްހޫރު އޮޓޯމޯޓިވް ބްރޭންޑްތަކުގެ ތެރެއިން އެއް ބްރޭންޑް އުފެއްދި މީހާއަށް ވުމާ ހަމައަށް އައުމަކީ ކެތްތެރިކަމާއި، އުފެއްދުންތެރިކަމާއި، އަޒުމުގެ ނަމޫނާއެވެ.
މަސައްކަތްތެރި ކަމުގައި މިފަދަ މަތީ ކާމިޔާބީތައް ގިނަފަހަރަށް ލިބެނީ ނިކަމެތި ފެށުމަކުން ފެށިގެން، ފޯރިއާއެކު މަސައްކަތް ކުރުމުގެ ނަތީޖާއެއްގެ ގޮތުންކަން ސޯއިޗިރޯ "ހޮންޑާ" ގެ ކާމިޔާބީގެ ވާހަކައިން ސާބިތުވެއެވެ.
