ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އަށް އަލިފާން ނިއްވުމަށް ބޭނުންކުރާ ޑްރޯންނަކާއި ކަނޑުއަޑީގައި ބޭނުންކުރާ ޑީޕް ޓްރެކަރެއް ހަދިޔާކޮށްފިއެވެ.
ބަންޑާރަކޮށީގައި ބޭއްވުނު ޚާއްޞަ ރަސްމިއްޔާތެއްގައި މި ތަކެތި ހަވާލުކޮށްދެއްވީ ސްޓެލްކޯގެ މެނޭޖިންގ ޑިރެކްޓަރ ހުސައިން ފަހްމީއެވެ. އެމްއެންޑީއެފްގެ ފަރާތުން މި ތަކެއްޗާ ހަވާލުވެ ވަޑައިގަތީ ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީއެވެ.
ހަދިޔާ ކުރެވުނު އަލިފާން ނިއްވުމަށް ބޭނުންކުރާ ޑްރޯނަކީ ފެން ހޮޅިއާއެކު 200 މީޓަރު އުހަށް ދަތުރުކުރުމުގެ ޤާބިލުކަން ލިބިފައިވާ ޑްރޯނެކެވެ. މި ޑްރޯނަކީ އުސް އިމާރާތްތަކުގައި ހިނގާ އަލިފާނުގެ ހާދިސާތަކުގައި ބޭނުންކުރެވޭނެ މުހިންމު ވަސީލަތެކެވެ.
އަދި ހަދިޔާކުރެވުނު ޑީޕް ޓްރެކަރަކީ 200 މީޓަރު އަޑިއަށް ދަތުރުކޮށް، ރޮބޮޓިކް އާމެއްގެ އެހީއާއެކު ކަނޑު އަޑިން ތަކެތި ނެގުމުގެ ޤާބިލުކަން ލިބިފައިވާ ވަސީލަތެކެވެ. މި ވަސީލަތަކީ ކަނޑުއަޑީގެ ސާރޗް އެންޑް ރެސްކިއު އޮޕަރޭޝަންތަކުގައި ބޭނުންކުރެވޭނެ މުހިންމު އާލާތެކެވެ.
