ނ. ހޮޅުދޫގައި ޒަޚަމްތަކާއެކު މަރުވެފައި އޮއްވާ ފެނުނު ޒަކިއްޔާ މޫސާ މަނިކު މަރުވެފައިވަނީ އެއްވެސް މީހެއްގެ ފަރާތުން ލިބުނު އަނިޔާއަކުން ނޫންކަމަށާއި، މަރާލިކަމުގެ އެއްވެސް ހެއްކެއް ނެތްކަމަށް ފުލުހުން މިއަދު ވިދާޅުވެއްޖެއެވެ.
ހޮޅުދޫ، ނިއުލައިފް ގޭގައި ދިރިއުޅެމުން އައި އުމުރުން 50 އަހަރުގެ ޒަކިއްޔާ މޫސާ މަނިކު ޒަޚަމްތަކަކާއެކު މަރުވެފައި އޮއްވާ ފެނުނީ އޭނާ ދިރިއުޅުނު ގޭގެ ގުދަނެއްގައި އޮއްވައި ސެޕްޓެމްބަރު މަހުގެ 10 ވަނަ ދުވަހުގެ ހެނދުނު 10:10 ހާއިރުއެވެ. ޒަކިއްޔާގެ މަރުގެ ތަހުގީގުގެ ބޭނުމަށް އޭނާގެ ހަށިގަނޑު މާލެ ގެނައުމަށްފަހު ހޮޅުދޫއަށް ގެންގޮސް ވަޅުލީ ސެޕްޓެމްބަރު 12 ވަނަ ދުވަހުއެވެ.
މި މައްސަލައާ ގުޅޭގޮތުން މަޢުލޫމާތު ދެއްވުމަށް ފުލުހުން ބޭއްވި ނޫސްވެރިންގެ ބައްދަލުވުމުގައި ފުލުހުންގެ ހެޑް އޮފް ހޯމޮސައިޑް އެންޑް އިންވެސްޓިގޭޝަން، ޗީފް އިންސްޕެކްޓަރ އޮފް ޕޮލިސް މުހައްމަދު ސާމިހު ވިދާޅުވި ގޮތުގައި، ޒަކިއްޔާ މަރުވެފައި އޮތްވާ ފެނުނީ އޭނަ ދިރިއުޅޭ ގޭގެ ގުދަނެއްގެ ތެރޭގައި ވެއްޓިފައި އޮއްވައެވެ. އަދި އޭނާގެ ކަރުގައި ޒަޚަމްތަކެއް ފެންނަން ހުރިކަމަށާއި، އޭނާ އޮތް ދިމާލުން ވަޅިއެއްވެސް ފެނުނު ކަމަށް ސާމިހު މަޢުލޫމާތު ދެއްވިއެވެ.
ޒަކިއްޔާގެ ހަށިގަނޑު މާލެ ގެނެސް ޕެތޮލޮޖިސްޓް ޑޮކްޓަރެއް ބެއްލެވުމަށްފަހު، އޭނާ މަރުވެފައިވަނީ ކަރަށް ލިބިފައިވާ ޒަޚަމްތަކުން ކަމަށް ތަހުޤީޤަށް އެނގިފައިވާކަމަށް ސާމިހު ވިދާޅުވިއެވެ. އެގޮތުން، ޒަކިއްޔާގެ ކަރުގެ ވާތް ފަރާތުގައި ފުން ތިން ޒަހަމެއް އަދި ކަނާތް ފަރާތުގައި ފުން ދެ ޒަހަމެއް އަދި ކަރުގެ މެދާ ހަމާގައިވެސް ތިލަކޮށް ޒަހަމެއް ހުރިކަމަށް ސާމިހު ވިދާޅުވިއެވެ. އަދި ޒަކިއްޔާއަށް އިތުރު ފަރާތަކުން އެއްވެސް އަނިޔާއެއް ލިބިފައިނުވާކަމާއި، އިތުރު ފަރާތެއްގެ އަމަލަކުން މަރުވެފައިވާކަން އެނގެން ނެތްކަމަށްވެސް އޭނާ ވިދާޅުވިއެވެ.
ޒަކިއްޔާ މަރުވެފައި އޮއްވާ ފެނުނުއިރު ލައިގެން ހުރި ހެދުމާއި އެ ތަނުން ފެނުނު ވަޅިއެއްގައި ލޭ ހުރިކަމަށް ފުލުހުން ވިދާޅުވެފައިވެއެވެ. ނަމަވެސް، އެ ވަޅީގެ ފޮރެންސިކް ތަހުލީލް އަދި ނުނިމޭކަމަށް ސާމިހު ވިދާޅުވިއެވެ.
ފުލުހުންގެ މި ބަޔާން އައިސްފައިވަނީ ޒަކިއްޔާގެ މަރާ ގުޅިގެން ހޮޅުދޫގެ ބައެއް މީހުން ތުހުމަތުތަކެއްކޮށް އިންސާފު ހޯދައިދިނުމަށް ގޮވާލާ މުޒާހަރާއެއް ކުރުމަށްފަހުގައެވެ.
ސާމިހު އިތުރަށް މަޢުލޫމާތު ދެއްވަމުން ވިދާޅުވި ގޮތުގައި، ކުށުގެ ވެށިންނާއި ޒަކިއްޔާ ދިރިއުޅުނު ގެއިން އަދި އޭނާގެ ހަށިގަނޑުންވެސް އެއްވެސް އިތުރު ފަރާތެއްގެ ފުށުން ލިބިފައިވާ އަނިޔާއެއް ފާހަގަކުރެވިފައެއް ނެތެވެ. އަދި ޒަކިއްޔާގެ ހަށިގަނޑުގެ ސީޓީ ސްކޭނުންވެސް ހަށިގަނޑަށް އަނިޔާއެއް ނުވަތަ ސުވާލު އުފެދޭ ފަދަ ކަމެއް ކޮށްފައިވާކަން ދައްކާފައިނުވާ ކަމަށް އޭނާ ވިދާޅުވިއެވެ.
ފުލުހުންގެ ތަހުގީގުގައި ޒަކިއްޔާގެ އާއިލާގެ މީހުންނާއި އެހެން ބައެއް މީހުންނާ ވެސް ސުވާލު ކުރެވުނުއިރު، އެއްވެސް މީހަކާ ޒަކިއްޔާއާ ދެމެދު މައްސަލަ ޖެހި ރުޅިވެރިކަމެއް އޮތްކަން އެނގިފައިނުވާ ކަމަށް ސާމިހު ވިދާޅުވިއެވެ. ނަމަވެސް، ޒަކިއްޔާގެ ނަފްސާނީ މައްސަލަތަކެއް ހުރިކަން ފާހަގަކުރެވިފައިވާ ކަމަށް އޭނާ ވިދާޅުވިއެވެ.
