ބޮލީވުޑް އެކްޓްރެސް ނަރުގިސް ފަޚްރީގެ ދައްތަ، އާލިޔާ ފަޚްރީގެ މައްޗަށް، ނިއު ޔޯކްގެ ކުއީންސްގައި ހިނގި އަލިފާނުގެ ހާދިސާއެއްގައި އޭނާގެ ކުރީގެ ލޯބިވެރިޔާއާއި އެހެން އަންހެނަކު މަރުވުމާ ގުޅިގެން، ފުރަތަމަ ދަރަޖައިގެ މަރުގެ ދަޢުވާއާއި ގަސްތުގައި އަލިފާން ރޯކުރުމުގެ ދަޢުވާ އުފުލައިފިއެވެ.
ކަމާބެހޭ ފަރާތްތަކުން ބުނާ ގޮތުގައި އާލިޔާ ފަޚްރީ ވަނީ ނޮވެމްބަރު 2 ވަނަ ދުވަހު ޑީޓޭޗްކޮށް ހުރި ގަރާޖެއްގައި ގަސްތުގައި އަލިފާން ރޯކޮށް، އެޑްވަރޑް ޖޭކޮބްސް (35 އަހަރު) އާއި އެނަސްޓޭޝިއާ އެޓިއެން (33 އަހަރު) މަރާލާފައެވެ.
ޕްރޮސިކިއުޓަރުން ބުނާ ގޮތުގައި، އެތާ ތިބި މީހުންނަށް ގެއްލުން ދޭން ބޭނުންވާ ކަމަށް ބުނެ ފަޚްރީ އަލިފާން ރޯކުރީވެ. އެޓިއެން ފުރަތަމަ ތިރީ ބުރީގައި ހުރެ، މަތީ ބުރީގައި ނިދާފައި އޮތް ޖޭކޮބްސް ސަލާމަތްކުރަން މަސައްކަތް ކުރިއެވެ. ނަމަވެސް އަލިފާން އިމާރާތަށް ފެތުރުމާއެކު ދެމީހުންވެސް ތަށީވީއެވެ. ދުމުގެ ސަބަބުން ނޭވާ ހާސްވެ އަދި ފިހުމުގެ ސަބަބުން ދެމީހުންވެސް މަރުވީއެވެ.
ތިން ދަރިންގެ ބައްޕައެއް ކަމުގައިވާ ޖޭކޮބްސް ވަނީ އެއް އަހަރު ކުރިން ފަޚްރީއާ އެކު އޮތް ގުޅުން ނިމުމަކަށް ގެނެސްފައެވެ. ނަމަވެސް އާލިޔާ އޭގެފަހުންވެސް ޖޭކޮބްސްއާ ގުޅުން ބާއްވަން މަސައްކަތް ކުރަމުންދިޔަ ކަމަށް ރިޕޯޓުތަކުންބުނެއެވެ. ޖޭކޮބްސްގެ ޢާއިލާއިން ބުނެފައިވަނީ އޭނާ ފަޚްރީއާ ދުރުވުމަށް ތަކުރާރުކޮށް މަސައްކަތް ކުރަމުން ދިޔަ ކަމަށެވެ. ޖޭކޮބްސްއާއި އެޓިއެންއާ ދެމެދު އޮތީ ހަމައެކަނި އެކުވެރިކަމުގެ ގުޅުމެއް ކަމަށްވެސް ބުނެފައިވެއެވެ.
އޯޕިއޮއިޑް ބޭނުންކުރުމުގެ އާދަ ކުރިން ހުރި މީހެއް ކަމަށްވާ އާލިޔާ، މި ކުށްތަކުން ކުށްވެރިވެއްޖެނަމަ އުމުރަށް ޖަލަށްލުމުގެ އަދަބު ލިބިދާނެއެވެ. އޭނާގެ ދެން އޮތް ކޯޓު އަޑުއެހުން އޮންނާނީ ޑިސެމްބަރު 9 ވަނަ ދުވަހުއެވެ. ބޮލީވުޑާ ހުރި ގުޅުމާއި ދަޢުވާތަކުގެ ބާވަތުގެ ސަބަބުން މި މައްސަލައަށް ވަނީ ވަރަށް ބޮޑު ސަމާލުކަމެއް ލިބިފައެވެ.
'ރޮކްސްޓާރ' ފިލްމުގެ ތަރި ނަރުގިސް ފަޚްރީ، އޭނާގެ ދައްތަ އާލިޔާ ފަޚްރީއާ ގުޅުމެއް މިހާރު ނުބާއްވާ ކަމަށް ރިޕޯޓުތަކުގައި ބުނެފައިވެއެވެ.
