ރާއްޖޭގެ ދެކުނުގެ ބައެއް ރަށްތަކަށް ވިއްސާރަކޮށް ގުގުރުން އެކަށީގެންވާ ކަމަށް މޫސުމާއި ބެހޭ ގައުމީ އިދާރާ (މެޓް) އިން ބުނެފިއެވެ.
މެޓުން ބުނީ އެހިސަށް މޫސުން ގޯސްވިނަމަވެސް ރާއްޖޭގެ އެހެން ހިސާބުތަކަށް މޫސުން އާއްމުގޮތެއްގައި ރަނގަޅުވާނެ ކަމަށެވެ.
އެގޮތުން ހުޅަނގާއި ހުޅަނގުއުތުރުން ގަޑިއަކު 8 މޭލާއި 18 މޭލާ ދެމެދު ބާރުމިނުގައި ވައިޖެހޭނެ ކަމަށާއި ދެކުނުގެ ސަރަހައްދުގައި ވިލާގަނޑުގައި ގާތްގަނޑަކަށް 30 މޭލު ބާރުމިނަށް ވައިޖެހުން އެކަށީގެންވާ ކަމަށްވެސް މެޓުން ވަނީ ބުނެފައިއެވެ.
ހަމައެއާއެކު މެޓުން ބުނީ ކަނޑުތައް އާދައިގެ ވަރަކަށް ގަދަވާނެ ކަމަށާއި ވިލާގަނޑުގައި ދެކުނުގެ އަތޮޅުތަކަށް ގަދަވުން އެކަށީގެންވާ ކަމަށެވެ.
އަދި ރާޅުގެ އުސްމިން ހުންނާނީ 3 ފޫޓާއި 6 ފޫޓާ ދެމެދުގައި ކަމަށްވެސް މެޓުން ބުނެފައިވެއެވެ.
