ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގައި މަސައްކަތްކުރާ ނުކުޅެދުންތެރިކަން ހުންނަ މުވައްޒަފުން ތަފާތެއްނެތި މަސައްކަތް ކުރަމުންދާކަމީ ނުހަނު ފަޚުރުވެރިވާ ކަމެއް ކަމަށް އެ ކުންފުނީގެ މެނޭޖިންގ ޑިރެކްޓަރު ޙުސައިން ފަހުމީ ވިދާޅުވެއްޖެއެވެ.
އިއްޔެ ފާހަގަކުރެވުނު ބައިނަލްއަޤްވާމީ ނުކުޅެދުންތެރިކަން ހުންނަ މީހުންގެ ދުވަހާ ގުޅިގެން ފަހުމީ ދެއްކެވި ވާހަކަފުޅުގައި، އެކި ބާވަތުގެ ނުކުޅެދުންތެރިކަން ހުންނަ 50 މުވައްޒަފުން ވަރަށް ހީވާގިކަމާއެކު އެހެން މުވައްޒަފުންނާ އެއްފަދައިން ސްޓެލްކޯގައި މަސައްކަތްކުރަމުންދާކަން ފާހަގަކުރެއްވިއެވެ.
އިތުރަށް ވާހަކަފުޅު ދައްކަވަމުން ފަހުމީ ވިދާޅުވީ، ސްޓެލްކޯގައި މަސައްކަތްކުރާ ނުކުޅެދުންތެރިކަން ހުންނަ މުވައްޒަފުން މި މުޖުތަމަޢުއަށް ސާބިތުކޮށްދެމުންދަނީ، ތަފާތުކުރުމެއްނެތި ފުރުޞަތު ލިބިދީފިނަމަ ކޮންމެ މީހަކީވެސް މަސައްކަތުގެ މާޙައުލާއި މުޖުތަމަޢުގައި ފުރިހަމައަށް ޙިއްޞާވެވޭނެ މީހެއްކަމަށެވެ.
ފަހުމީ އިތުރަށް ވިދާޅުވީ، ނުކުޅެދުންތެރިކަން ހުންނަ މުވައްޒަފުންނަށް ހަމަހަމަ ފުރުޞަތުތައް ދިނުމަކީ ސްޓެލްކޯގެ އަމާޒުތަކުގެ ތެރޭގައި ހިމެނޭ ކަމެއް ކަމަށެވެ. އަދި މި މުވައްޒަފުންގެ ޤާބިލުކަމާއި ހުނަރު ބޭނުންކޮށްގެން ކުންފުނީގެ އުފެއްދުންތެރިކަން އިތުރުކުރުމަށް މަސައްކަތްކުރަމުންދާ ކަމަށްވެސް އޭނާ ވިދާޅުވިއެވެ.
