އިންޑިއާގެ ގޯއާގައި ކާގޯ ޓާމިނަލަކާއި، ކްރޫޒު ޓާމިނަލެއް ތަރައްގީ ކުރަން ފަށައިފިއެވެ. އިންޑިއާ ސަރުކާރުން އިއުލާން ކުރިގޮތުގައި މި ޓާމިނަލްތައް ތަރައްގީ ކުރަމުން ދަނީ އިންޑިއާގެ މަރުކަޒީ ސަރުކާރާއި ގޯއާ ސަރުކާރުން ގުޅިގެންނެވެ. މިކަމާ ގުޅޭ މައުލޫމާތު ދެއްވާފައި ވަނީ އިންޑިއާގެ މަތިގޭގައި ޝިޕިންގ މިނިސްޓަރާ ސުއާލު ކުރުމުގެ ތެރޭގައެވެ.
12 މިލިއަން އެމެރިކާ ޑޮލަރު އިންވެސްޓްކޮށްގެން ކުރިއަށް ގެންދާ މަޝްރޫއު އަންނަ އަހަރު މާޗް މަހަށް ނިމޭނެ ކަމަށް ލަފާކޮށްފައި ވެއެވެ.
ޕްރޮޖެކްޓްގެ މަސައްކަތް ނިމޭއިރު، އިންޓަނޭޝަނަލް އަދި ޑޮމެސްޓިކް ކްރޫޒް ޓާމިނަލެއް ތަރައްގީކޮށްފައިވާނެ ކަމަށް ވެސް މައުލޫމާތު ދީފައި ވެއެވެ. މިމަޝްރޫއަކީ އިންޑިއާއިން އައްސޭރި ފަށުގެ ދަތުރުފަތުރާއި ކޯރުތަކުގައި މުދަލާއި މީހުން އުފުލުމަށް މިއަހަރު އިއުލާން ކުރި ސިޔާސަތުގެ ދަށުން ކުރިއަށް ގެންދާ މަސައްކަތެކެވެ.
އިންޑިއާގައި ކްރޫޒް ލައިނަރގެ ހަރަކާތްތައް އިތުރަށް ކުރިއެރުވުމަށް އިންޑިއާގެ މަރުކަޒީ ސަރުކާރުން ވަނީ "ކްރޫޒް ބާރަތު މިޝަން 2024" ގެ ޝިއާރުގެ ދަށުން އައު މަސައްކަތެއް ފަށާފައެވެ.
މިއީ، ދަތުރުފަތުރާއި، ހޮސްޕިޓަލިޓީއާއި، ރީޓެއިލްއާއި، ފަތުރުވެރިކަމުގެ ދާއިރާއިން ވަޒީފާ އުފައްދައި، އަމިއްލަ ވިޔަފާރިތަކުގެ އާމްދަނީ އިތުރުވުން ފަދަ އިގްތިސާދީ ފައިދާތައް އެތައް ގުނައަށް އިތުރު ވެގެންދާނެ ކަމެއް ކަމަށް އިންޑިއާ ސަރުކާރުން ބުނެފައި ވެއެވެ.
