އޯޕަން ސޯސް ޑޭޓާއަކީ، ބޭރުގެ ޖާސޫސުން އޭގެ ބޭނުން ނާޖާއިޒު ގޮތަށް ހިފާނެ މުހިންމު ޑޭޓާ ކަމަށް ޗައިނާގެ އެންމެ މަތީ ޖާސޫސީ އިދާރާއިން އިންޒާރު ދީފިއެވެ. ޗައިނާއިން އާންމުކޮށް ނެރެފައިވާ އިންޒާރުގައި ބުނެފައި ވަނީ ޙައްސާސް މައުލޫމާތު ޔަގީން ނުކުރެވޭފަދަ ވަސީލަތްތަކުގައި ނުބެހެއްޓުމަށެވެ.
އެފަރާތުން ބުނެފައި ވަނީ، "އޮޕަން ސޯސް އިންޓެލިޖެންސްގެ ވަސީލަތްތައް" ބޭރުގެ ޖާސޫސީ އިދާރާތަކަށް މައުލޫމާތުގެ ޚަޒާނާއަކަށް ވެފައިވާ ކަމަށެވެ.
ޗައިނާގެ މިނިސްޓްރީ އޮފް ސްޓޭޓް ސެކިއުރިޓީ އިން ރަސްމީ ވީޗެޓްގައި އާންމުކުރި އިއުލާނުގައި ރައްކާތެރި ފިޔަވަޅުތައް އަޅާނެ ގޮތާއި އެކަމުގެ މުހިންމު ކަމަށް މީހުން ހޭލުންތެރި ކުރުމަށް މަސައްކަތް ކޮށްފައި ވެއެވެ.
"އޯޕަން ސޯސް މައުލޫމާތުގައި އާންމުކޮށް ލިބެން ހުންނަ، މީސްމީޑިއާގެ ޕޯސްޓުތަކާއި އޮންލައިން ފޯރަމްތަކާއި ބްލޮގް އާޓިކަލްތަކާއި މީޑިއާ ރިޕޯޓްތަކާއި ސެޓެލައިޓް އިމޭޖްތަކަކީ، ސައިބަރ ޖާސޫސީ މަސައްކަތުގެ މުހިންމު މަސްދަރެއް" ކަމަށް ބުނެފައި ވެއެވެ.
މިފަދަ މައުލޫމާތު އެއްކުރުމަށްފަހު، ބިގް ޑޭޓާ އެނަލިސިސް މެދުވެރިކޮށް، އެ އަގުހުރި ޖާސޫސީ މައުލޫމާތު ވަޒަންކޮށް، ގިންތިކޮށް، ޖާސޫސުން ފީނައި ހަދާނެ ކަމަށްވެސް ބުނެފައި ވެއެވެ.
މިފަދަ ކަންކަމަކީ، އިންފޮމޭޝަން ސެކިއުރިޓީގެ މަސައްކަތްތަކަށް ބޮޑެތި ގޮންޖެހުންތަކެއް ކުރިމަތިވާ ކަމެއް ކަމަށާއި، ހައްސާސް މައުލޫމާތު ލީކުވުން ހުއްޓުވުމަށް ހަރުދަނާ ފިޔަވަޅުތަކެއް އަޅަން ޖެހޭކަމަށް ސްޓޭޓް ސެކިއުރިޓީ މިނިސްޓްރީން ބުނެފައި ވެއެވެ.
އެމިނިސްޓްރީން ވަނީ ކަންބޮޑުވާ މުހިންމު 3 ދާއިރާއަކަށް އަލިއަޅުވާލާފައެވެ. އޭގެ ތެރޭގައި، ޕްރޮކިއުމަންޓް ބިޑު ކުރުމާ ގުޅޭ މައުލޫމާތަށް ސަމާލުވުމަށް ޚާއްސަކޮށް އިލްތިމާސްކޮށްފައި ވެއެވެ. އެފަދަ އިއުލާނެއްގައި އަދަދާއި ބާވަތާއި ބޭނުމާ ގުޅޭ ހައްސާސް މައުލޫމާތު ހިމަނާފައި ވުމުން މައުލޫމާތު ތަހުލީލު ކުރާ ފަރާތަކަށް އެކަމުގެ ފުނަށް ފީނައި ގަނެވެއެވެ. އަދި އުމްރާނީ ތަރައްގީގެ މަޝްރޫއުތަކާ ގުޅޭ މައުލޫމާތު ހާމަކުރުމުގައި ހައްސާސް ވުމަށްވެސް އެދިފައި ވެއެވެ.
އެ މިނިސްޓްރީން އިތުރަށް ބުނެފައި ވަނީ ޑޭޓާ މެނޭޖު ނުކުރެވުމާއި، ޑޭޓާގެ މުހިންމު ކަމަށް މަސްއޫލުވެރިންނާއި މުވައްޒަފުން ހޭލުންތެރިކަން ކުޑަވުމަކީ ނާޒުކު ޓެކްނިކަލް ޑޭޓާ ލީކުވެގެން ހިނގައި ދާނެ ސަބަބެއް ކަމަށެވެ.
