މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯ އިސްލާމްވުމަށް ޝައުގުވެރިވާ ކަމަށް އޭނާއާއެކު ކުރިން އަލްނަސްރަށް ކުޅުނު ކީޕަރު ވަލީދު އަބްދުﷲ ބުނެފިއެވެ.
"އަރަބް ޓީވީ" ޕްރޮގްރާމެއްގައި ވާހަކަ ދައްކަމުން ޢަބްދުﷲ ބުނީ އިސްލާމްވުމަށް ރޮނާލްޑޯ ޝައުގުވެރިކަން ފާޅުކުރި ކަމަށާއި އިސްލާމީ ބައެއް އުސޫލުތަކަށް މިހާރުވެސް ރޮނާލްޑޯ އަމަލުކުރާ ކަމަށެވެ.
"ރޮނާލްޑޯ އަސްލު ބޭނުންވަނީ އިސްލާމްދީނަށް ބަދަލުވާން. އެކަމާ ގުޅޭގޮތުން އޭނާއާ ވާހަކަ ދެއްކިއިރު، ޝައުގުވެރިކަން ފާޅުކުރީ،" އަރަބި ޓީވީ ޕްރޮގްރާމަށް ދިން ބަސްދީގަތުމުގައި އަބްދުﷲ ބުންޏެވެ.
"އޭނާ (ރޮނާލްޑޯ) ވަނީ ގޯލް ޖެހުމަށްފަހު ދަނޑުގައި ސަޖިދަ ޖަހާފައި، އަދި އަބަދުވެސް ކުޅުންތެރިންނަށް ބާރުއަޅަނީ ދުޢާކޮށް އިސްލާމީ ދީނީ ޢަމަލުތަކަށް ތަބާވުމަށް" ޓީވީ ޕްރޮގްރާމުގައި ވާހަކަ ދައްކަމުން ޢަބްދުﷲ ބުންޏެވެ.
އަލްނަސްރުގެ ކުރީގެ ކީޕަރު ޢަބްދުﷲ ކިޔައިދިން ގޮތުގައި ރޮނާލްޑޯ ވަނީ އޭނާގެ ޓީމު މޭޓުން ގޮތުގައި ތިބި މުސްލިމް ކުޅުންތެރިންނާ ގާތްގުޅުމެއް ބޭއްވުމަށްޓަކައި އިސްލާމީ ސަގާފަތް ދަސްކުރުމަށްވެސް ޝައުގުވެރިކަން ފާޅުކޮށްފައެވެ. އަދި ފަރިތަކުރުންތަކުގެ އުޅޭއިރު މުސްލިމް ކުޅުންތެރިންނަށް ނަމާދު ކުރަން ވަގުތު ލިބޭތޯ ވެސް ރޮނާލްޑޯ ކަށަވަރު ކުރި ކަމަށް އަބްދުﷲ ބުންޏެވެ.
"ޓްރޭނިންގެ ހިނގަމުން ދަނިކޮށް ބަންގި ގޮވާ އަޑު އިވުމުން ކޯޗު ގާތު ރޮނާލްޑޯ އެދޭ ބަންގި ގޮވާ ނިމެންދެން ޓްރޭނިންގ ސެޝަން މަޑުޖައްސާލަން،" އިސްލާމް ދީނުގެ އާދަތަކަށް ރޮނާލްޑޯ ސަމާލުކަންދޭ މިންވަރު ކިޔައިދެމުން ޢަބްދުﷲ ބުންޏެވެ.
ރޮނާލްޑޯއަށް ތައުރީފުގެ ބަސްތައް ރައްދު ކުރަމުން ޢަބްދުﷲ ބުނީ ރޮނާލްޑޯއަކީ ހިތްތިރި، އަހްލާގް ރަނގަޅު އިންސާނެއް ކަމަށެވެ.
އިސްލާމް ދީނަށް ރޮނާލްޑޯ ޝައުގުވެރިވާކަން ފާޅުކުރި މިއީ ދެވަނަ ކުޅުންތެރިޔާއެވެ. މީގެ ކުރިން ރޮނާލްޑޯއާއެކު ރެއާލް މެޑްރިޑުގައި ކާމިޔާބު ދުވަސްތަކެއް ހޭދަކުރި ހުނަރުވެރި މިޑްފީލްޑަރު މެސޫޓް އޮޒިލް ބުނެފައި ވަނީ އޭނާ ޤުރުޢާން ކިޔަވާ ވަގުތު ރޮނާލްޑޯ ކަނުލައި އަޑުއަހަން އިންނަ ކަމަށެވެ. އަދި ޤުރުޢާން ކިޔަވަން ހަނދާން ކޮށްދޭ ކަމަށާއި ފެށުމުގެ ކުރިން ދުޢާ ކޮށްދިނުމަށްވެސް ރޮނާލްޑޯ އެދޭ ކަމަށެވެ.
