ނިމިދިޔަ ނޮވެމްބަރ މަހު ރިސޯޓުތަކުގެ އެންމެ މަތީ ސަރވިސް ޗާޖުތަކުގެ ލިސްޓް ސްޓޭންޑް މޯލްޑިވްސްއިން އާންމުކޮށްފިއެވެ. މި ލިސްޓުން ފާހަގަކޮށްދެނީ ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންގެ އާމްދަނީއަށް ލިބޭ ކޮންޓްރިބިއުޝަންއެވެ،
މި ލިސްޓުގެ އެންމެ މަތީގައި ވަނީ ދަ ރިޓްޒް-ކާލްޓަން މޯލްޑިވްސް، ފަރި އައިލެންޑްސްއެވެ. މި ރިސޯޓުގައި މުވައްޒަފަކަށް 1,498 އެމެރިކާ ޑޮލަރުގެ ސަރވިސް ޗާޖު ލިބިފައިވެއެވެ. މި ރިސޯޓާ ޖެހިގެން އޮތް ދެ ރިސޯޓަކީ ޑަބްލިއު މޯލްޑިވްސް (1,494 އެމެރިކާ ޑޮލަރު) އަދި ވެލާ ޕްރައިވެޓް އައިލެންޑް މޯލްޑިވްސް (1,312 އެމެރިކާ ޑޮލަރު) އެވެ.މި ލިސްޓުން ދައްކުވައިދެނީ އެކި ރިސޯޓުތަކުގައި ލިބޭ އާމްދަނީގެ ތަފާތުތަކެވެ.
އެންމެ މަތީ 20 ރިސޯޓުގެ ތެރެއިން އެންމެ ފަހުގައިވަނީ ދަ ވެސްޓިން މޯލްޑިވްސް މިރިއަންދޫ ރިސޯޓެވެ. މި ރިސޯޓުގައި މުވައްޒަފަކަށް 541 އެމެރިކާ ޑޮލަރު ލިބިފައިވެއެވެ. އެހެނިހެން ފާހަގަކޮށްލެވޭ ރިސޯޓުތަކުގެ ތެރޭގައި ވައްކަރު މޯލްޑިވްސް (1,098 އެމެރިކާ ޑޮލަރު)، ސިކްސް ސެންސަސް ކަނުހުރާ (859 އެމެރިކާ ޑޮލަރު)، އަދި ހާޑް ރޮކް ހޮޓެލް މޯލްޑިވްސް (664 އެމެރިކާ ޑޮލަރު) ހިމެނެއެވެ.
ސްޓޭންޑް މޯލްޑިވްސްއިން ވަނީ ހާމަކަން ބޮޑު ގޮތެއްގައި މަޢުލޫމާތު ހިއްސާކުރުމާއި، ފަތުރުވެރިކަމުގެ ސިނާޢަތުގައި މަސައްކަތްކުރާ މުވައްޒަފުންގެ ޙައްޤުތައް ކުރިއެރުވުމަށް މަސައްކަތްކުރުމުގެ މުހިންމުކަން ފާހަގަކޮށްފައެވެ. ފުރިހަމަ ރިޕޯޓެއް އެކުލަވާލުމަށްޓަކައި، ސްޓޭންޑް މޯލްޑީވްސްއިން ވަނީ މުވައްޒަފުންނާއި މަޢުލޫމާތު ހިއްސާކުރާ ފަރާތްތަކަށް މި ރިޕޯޓުގައި ނުހިމެނޭ ނުވަތަ އިތުރު މަޢުލޫމާތު ހުރިނަމަ، އެ މަޢުލޫމާތު ޓެލެގްރާމް ޕްލެޓްފޯމް މެދުވެރިކޮށް (@StandMaldives) ހިއްސާކުރުމަށް އެދިލައްވާފައިއެވެ.
