ޔޫކްރޭންގައި ހިނގަމުންދާ ފަދަ ހަނގުރާމައެއް ކުރަން އިނގިރޭސިންނަށް މަޖުބޫރުވެއްޖެ ނަމަ ހަ މަސް ދުވަހުގެ ތެރޭގައި އިނގިރޭސި ސިފައިން މަރުވައި އެއްކޮށް ހުސްވާނެ ކަމަށް ޔޫކޭގެ ވަޒީރަކު އިންޒާރު ދެއްވައިފި އެވެ.
އެލިސްޓާ ކޭންސް ވިދާޅުވީ ރަޝިޔާއިން ޔޫކްރޭނަށް އަރައިގަތުމުން ލިބުނު ގެއްލުންތަކާ އެއްވަރުގެ ބާރަކާ އިނގިރޭސިންނާ ކުރިމަތިލާން ޖެހިއްޖެނަމަ އިނގިރޭސި ސިފައިންނަށް ހިފަހައްޓާލެވޭނީ 6 މަސް ދުވަހަށް ކަމަށެވެ.
އިނގިރޭސި ރަސްމީ ހިސާބުތަކުން ދައްކާ ގޮތުގައި 1 އޮކްޓޯބަރާ ހަމައަށް ސިފައިންގެ ތެރޭގައި ތިބީ 109،245 ސިފައިންނެވެ. އޭގެ ތެރޭގައި 25،814 ވޮލަންޓިއަރ ރިޒާވިސްޓުން ހިމެނެއެވެ. ރޯޔަލް މެރިންސްގެ ކުރީގެ ކާނަލް އަދި ރިޒާވިސްޓެއް ވެސް ކަމަށްވާ ކޭންސް ވިދާޅުވީ ރަޝިޔާއަށް ދުވާލެއްގެ މައްޗަށް ގާތްގަނޑަކަށް 1،500 ސިފައިން ގެއްލެމުންދާ ކަމަށެވެ އެއީ މަރުވާ މީހުންނާއި ޒަޚަމް ވާމީހުން އެއްކޮށްލުމުން ޖެހޭ އަދަދެވެ. ޔުކްރެއިންގެ ގެއްލުން އެއަށްވުރެން އެތައް ގުނައަށް ބޮޑުކަމަށް ދައްކައެވެ.
ލަންޑަންގައި ހުންނަ ރޯޔަލް ޔުނައިޓެޑް ސާވިސަސް އިންސްޓިޓިއުޓްގެ ޑިފެންސް ތިންކް ޓޭންކުގައި ސިފައިންނާ ބެހޭ ގޮތުން ދެއްކެވި ވާހަކަފުޅުގައި ވެޓެރަންސް އާ ބެހޭ މިނިސްޓަރު ކޭންސް ވިދާޅުވީ ބޭނުންވަނީ ކާރިސާއެއް ދިމާވާއިރު ކުއްލިއަކަށް ހަތިޔާރު އުފެއްދުމުގެ ގާބުލުކަމާއި ދިފާއީ ކަންކަން ވަރުގަދަ ކޮށްފައި ބާއްވާށެވެ.
