ސޫރިޔާގެ ރައީސް ކަމުގެ ދާދިފަހުން ދުރުކުރި ބައްޝާރުލް އަސަދުގެ ވެރިކަމުގެ ދިގު 24 އަހަރުގައި 50،000 ސުންނީ މުސްލިމުން ދަންޖައްސައި މެރިކަމުގެ ރިޕޯޓްތައް ތިލަވެއްޖެއެވެ.
ސުންނީ މުސްލިމުންނަށް ލާއީންސާނީ އެތައް އަނިޔާއެއް ދިނުމަށާއި ދަންޖެއްސުމަށް ބައްޝާރުލް އަސަދު ބޭނުން ކުރި ޖަލަކީ ސެދްނާޔާ ޖަލެވެ. މިއީ މުޅި ދުނިޔޭގައިވެސް އެންމެ އަނިޔާވެރިކަމަށް މަޝްހޫރު ޖަލެވެ.
ބިމު އަޑީގައި ސިއްރު އެތައް ބައިތައް ހިމެނޭ ގޮތައް ފަރުމާކޮށްފައިވާ މި ޖަލު ތެރެއިން ދަންޖެއްސުމަށް ބޭނުން ކުރާ ވާތަކާއި އެތައް ޒަމާނެއްވެފައިވާ ފައިވާނާ ބޫޓުތައް ވަނީ ފެނިފައެވެ.
ސޫރިޔާގެ މިނިވަންކަމަށް ޖިހާދު ކުރި ހަނގުރާމަވެރިން ވަނީ ބައްޝާރުލް އަސަދު ދަންޖައްސައި މަރާފައިވާ ސުންނީ މުސްލިމުންގެ ނަންތައް ހިމެނޭ ފޮތެއް ޖަލު ތެރެއިން ހޯދާފައެވެ. ހަނގުރާމަވެރިން މިހާރު ދަނީ ޖަލުގެ މެޕް ބޭނުންކޮށްގެން ސިއްރު ބައެއް ގޮޅިތައް ހޯދުމުގެ މަސައްކަތް ކުރަމުންނެވެ.
ބައްޝާރުލް އަސަދުގެ އަނިޔާވެރިކަމުން ހަނގުރާމަވެރިން ވެރިރަށް ދިމިޝްގު ސަލާމަތްކުރި ދުވަހުވެސް 28 މީހަކު ދައްޖަންސަން ހަމަޖެހިފައިވާ ކަމުގައިވިއެވެ. މީގެ ތެރޭގައިވެސް ހިމެނެނީ ސުންނީ މުސްލިމުންކަމަށް ސޫރިޔާގެ ޚަބަރުތައް ގެނެސްދޭ ޗެނަލްތަކުން ބުނެއެވެ.
ބައްޝާރަކީ ޝިއައީ އަނިޔާވެރި މަޒްހަބެއް ކަމުގައިވާ އަލަވީތުގެ ކަންކަން ގަބޫލްކުރާ މީހެކެވެ. އަލަވީތުގެ ގަބޫލްކުރުންތަކަށް ބިނާކޮށް ސިފައިންގެ އިސް މަގާމުތަކަށާއި ދީނީ ކަންކަމުގައި އިސް ސަފަށް ނެރެފައިވަނީ އަލަވީތު މަޒްހަބުގެ މީހުންނެވެ.
