އެއީ އެންމެ ފަހުން ބޭއްވި ގޯލްޑަން ފުޓްސަލް މުބާރާތުގައި އޭދަފުށްޓާއި، ލ. ގަން ވާދަކުރި ވައިނަލް މެޗު ހިނގަމުންދިޔަ ވަގުތެވެ. މެޗު ބެލުމަށްޓަކައި ގޮސް ތިބި މީހުންނައިގެން ހުޅުމާލެ ރެހެންދި ފުޓްސަލް ދަނޑު ހިމެނޭ ސަރަހައްދު އޮތީ ފުރިފަ އެވެ. ފޯރިގަދަ ކުޅުމެއް ފެނުނު އެ މެޗުގެ ނަތީޖާ އޭދަފުށިން 2-4 އަށް ބަދަލުކޮށްލުމާއެކު އެތަނުގައި ތިބި އޭދަފުށިގެ ސަޕޯޓަރުންގެ އަޑު ވަރަށް ގަދަވި އެވެ. މުޅި ސަރަހައްދު އެވަގުތު ގުގުމާލާފައި އޮތީ އޭދަފުށީގެ ސަޕޯޓަރުން އެއް ރާގަކަށް “ހޮނިހިރު ބަތްޕެން” މިހެން ގޮވަމުން ދިޔަ އަޑުންނެވެ. އޭދަފުށްޓަށް ނިސްބަތްކޮށް މިހާރުވެސް ގިނަ ބަޔަކު ކިޔަމުން އަންނަ އެ ނަން އެ ރަށުގެ ސަޕޯޓަރުން އެރޭ ބޭނުންކުރީ ފަހުރުވެރިވަމުންނެވެ.
އެކަމަކު އޭގެ ގާތްގަނޑަކަށް 56 އަހަރު ކުރިން ހާލަތު މުޅިން ތަފާތެވެ. އެއީ ރާއްޖޭގެ ގައުމީ ފުޓްބޯޅަ މުބާރާތުގައި އޭދަފުށިން ވާދަކުރި ދެވަނަ ފަހަރެވެ. ބަހިއްޔާ ސާދާ މުސްކުޅި ދަރިވަރުންގެ ޖަމިއްޔާގެ ނަމުގައި ބައިވެރިވި އޭދަފުށި ޓީމު ވާދަކުރީ މާލޭ ރާނީ ކްލަބާ އެވެ. މުބާރާތުގެ ތަށި މިލްކުކުރަން ނުކުތް އެ ކުލަބުން އޭދަފުށީގެ ޓީމާ ވާދަކުރަން މެޗަށް ނުކުތްއިރު މުޅި ހެންވޭރު ދަނޑު ވަށައިގެން ތިބީ އެޓީމުގެ ސަޕޯޓަރުންނެވެ. ހޮނިހިރު ބަތްޕެން، ހުތް ބަތްޕެން ފިނި ބަތްޕެން މިހެންގޮސް އެކި ޒާތްޒާތުގެ ބަތްޕެނުގެ ނަން ބޭނުންކޮށްގެން އޭދަފުށީގެ ކުޅުންތެރިން ރޭރުކޮށްލަން އެތައް ހަޅޭކެށް ރާނީ ކްލަބްގެ ސަޕޯޓަރުން ދިޔައީ ލަވަމުންނެވެ. އެކަމަކު އިދިކޮޅު ސަޕޯޓަރުން ކުރަމުން އައި މަލާމާތާއި ފުރައްސާރައަކުން އޭދަފުށީ ކުޅުންތެރިންގެ އަޒުމަކަށް ގުޑުމެއް ނޭރި އެވެ. އޭގެ ބަދަލުގައި އެ ކުޅުންތެރިން ވިއްސިވިހާލިކޮށްލީ އިދިކޮޅުން ކުޅުނު ރާނީ ކްލަބުން ތަށްޓަށް ކުރި އުންމީދެވެ. 0-1 އިން އެދުވަހު މެޗު ކާމިޔާބުކުރީ އޭދަފުށީގެ ޓީމެވެ.
އޭދަފުށިން ރާނީ ކްލަބާ ބަލިކުރި މެޗު ކުޅުނީ ހޮނިހިރު ދުވަހެއްގަ އެވެ. އެއީ އިއްތިފާގަކަށްވިޔަސް އިދިކޮޅު ސަޕޯޓަރުން ދުށީ އެއީ އޭދަފުށްޓަށް ހާއްސަ ދުވަހެއްގެ ގޮތުގަ އެވެ. އެ ދުވަހުގެ ނަތީޖާ އޭދަފުށި ކޮޅަށް ބުރަވުމާއެކު އޭދަފުށީގެ ފުޓްބޯޅައާއި ހޮނިހިރު ބަތްޕެނާ ގުޅުވައިގެން ދެކެވޭ ވާހަކަ މުޅި ރާއްޖެއަށް އާންމުވި އެވެ.
“އެދުވަހު ހަމަ ވަރަށް ގިނަ މީހުން ކުޅި ބަލަން އައިސް ތިބި، ބަތްޕެނޭ ކިޔައިގެން އެ ޓީމުގެ ސަޕޯޓަރުން އަޅުގަނޑުމެންނާ ވަރަށް ދިމާކުރި. މެޗު ނިންމާފަ ބައެއް ކުޅުންތެރިން އެކަމާ ލަދުން ފިލަފިލައިގެން ދަނޑުން ނުކުމެގެން ދިޔަ ކަމަށްވެސް ވޭ” މާލޭ ރާނީ ކްލަބާ ދެކޮޅަށް ކުޅެ އޭދަފުށިން ކުރި ހޯދި މެޗުގައި ޓީމުގެ ސެންޓަ ފޯވާޑެއްގެ ރޯލު އަދާކުރި އަދި ފަހުން ބ. އަތޮޅު އޮފީހުގެ އިސް މަގާމުތަކެއް ފުރުއްވި އިބްރާހީމް އަހުމަދު މެޗުގެ ހަނދާންތައް އައުކުރައްވަމުން ވިދާޅުވި އެވެ.
ފަސްދޮޅަހުގެ އަހަރުތަކުގެ ތެރޭގައި ގައުމީ ފުޓްބޯޅަ މުބާރާތުގައި އޭދަފުށިން ވާދަކުރަން ފެށީއްސުރެ އޭދަފުށީގެ ފުޓްބޯޅަ ޓީމަށް ބަތްޕެނާ ގުޅުވައިގެން މަލާމާތް އައީ ރައްދުވަމުންނެވެ. 1985 ވަނަ އަހަރު އޮތް ގައުމީ ފުޓްބޯޅަ މުބާރާތުގެ ދެވަނަ ޑިވިޝަންގެ ތަށި އޭދަފުށިން ކާމިޔާބުކޮށް އެއްވަނަ ޑިވިޝަންގައި ވާދަކުރިއިރުވެސް އެ މަލާމާތަކަށް ބަދަލެއް ނާދެއެވެ. “އަހަރުމެން ކުޅުނު ދުވަސްވަރުވެސް ވަރަށް ދިމާކުރޭ ބަތްޕެނޭ ކިޔައިގެން. އޭގެ ސަބަބުން އަހަރެމެންނަށް ލިބެނީ އިތުރު ހިތްވަރެއް” ގައުމީ ފުޓްބޯޅަ މުބާރާތުގެ ދެވަނަ ޑިވިޝަންގެ ތަށި އޭދަފުށިން ހޯދިއިރު ޓީމުގެ ކެޕްޓަންކަންކުރި އަބްދުލްމަޖީދު ހަސަން ބުނެފައިވެ އެވެ.
މަޖީދުގެ ވާހަކައަށް ބާރުދެމުން ރާއްޖޭގެ ގައުމީ ފުޓްބޯޅަ ޓީމުގައި ހިމެނުނު އޭދަފުށީގެ ފުރަތަމަ ކުޅުންތެރިޔާ އަބްދުލްވާހިދު ހުސައިން ބުނެފައިވަނީ މުބާރާތް ކުޅޭ ދުވަސްވަރު ދަނޑު ބޭރުންވެސް ބަތްޕެނޭ ކިޔައިގެން ދިމާކޮށް ހަދާކަމަށެވެ. “ހަމައެކަނި ދަނޑުގަ ކުޅޭއިރުއެއް ނޫން ދިމާކުރަނީ. ސައި ހޮޓަލަކަށް ވަނަސް އެކަން އޮވޭ. އެންމެ ގިނައިން ދިމާކޮށް ހަދަނީ ނިއުރޭޑިއަންޓްގެ ސަޕޯޓަރުން” ސާކު ސަރަހައްދުގެ ފުޓްބޯޅަ މުބާރާތުން އެންމެ ފުރަތަމަ ރިހި މެޑެލް ހޯދި ރާއްޖޭގެ ގައުމީ ޓީމުގައިވެސް ހިމެނުނު ވާހިދު ބުންޏެވެ.
ހޮނިހިރު ބަތްޕެނާއި އޭދަފުށީގެ ފުޓްބޯޅައާ ގުޅުވައި ވާހަކަދެކެވޭއިރު އިއްތިފާގަކަށްވިޔަސް އެއްކަމެއް ވަރަށް ގިނަ ފަހަރު ތަކުރާރުވެފައި އެބަހުއްޓެވެ. އެއީ ހޮނިހިރު ދުވަހު އޭދަފުށި ޓީމުން ކުޅޭ މެޗުތައް ކާމިޔާބުކޮށްފައި ހުރިލެއް ނިސްބަތުން އިތުރު ކަމެވެ. އޭދަފުށީގެ ޓީމު އެއްވަނަ ޑިވިޝަނަށް ޕްރޮމޯޓްވުމަށްފަހު އޭރު ދިވެހި ފުޓްބޯޅައިގެ ރަސްގެފާނުގެ ގޮތުގައި ބެލެވުނު ވިކްޓަރީ ސްޕޯޓްސް ކްލަބާ ވާދަކުރި ފުރަތަމަ މެޗު އޭދަފުށިން ކާމިޔާބުކުރިއިރު އެދުވަސްވީ ހޮނިހިރަކަށެވެ. އޭދަފުށީގެ ފުޓްބޯޅަ ކުރިއެރުވުމަށްޓަކައި ގިނަ މަސައްކަތްތަކެއް ކޮށްފައިވާ އަހުމަދު ނާސިރު މި ސަޕްލިމެންޓަށް މަޢުލޫމާތުދެމުން ހިއްސާކުރި ތަފާސް ހިސާބުތަކުން އެނގެން އޮތް ގޮތުގައި އެއްވަނަ ޑިވިޝަންގައި އޭދަފުށީގެ ފުޓްބޯޅަ ޓީމު ވާދަކުރިއިރު ހަތް ހޮނިހިރެއްގައި ކުޅުނު މެޗުން މޮޅުވެފައިވެ އެވެ. މުޅި ރާއްޖެއަށް ހުޅުވާލައިގެން ބާއްވަމުން އައި މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ތަށި 2016 ވަނަ އަހަރު އޭދަފުށިން އުފުލާލީ އެ އަހަރުގެ ނޮވެމްބަރު މަހުގެ 12 ވީ ހޮނިހިރު ދުވަހުގެ ރޭ ތިމަރަފުށްޓާ ދެކޮޅަށް ކުޅުނު ފައިނަލް މެޗަށް ފަހު އެވެ.
ބަތްޕެނަކީ އިހުގައި އޭދަފުށީގައި އާންމުކޮށް ކެއުމުގައި ބޭނުންކުރި ބާވަތެކެވެ. ބައެއް ތަދު ދުވަސްވަރު އެއް ހޮނިހިރުގައި ތައްޔާރުކުރާ ބަތްޕެން އަނެއް ހޮނިހިރާ ހަމައަށް ބޭނުންކުރަމުން ގޮސްފައިވާ ކަންވެސް އެއީ ހަގީގަތެކެވެ. އެކަމަކު އެއާއެކުވެސް ސާފުކޮށް އެނގެން އޮތް އެއް ކަމަކީ އޭދަފުށީގެ ފުޓްބޯޅަ ޓީމުތައް ގައުމީ ފުޓްބޯޅަ ދަނޑަށް އެންމެ ފުރަތަމަ ނުކުތް އިރުވެސް މެޗަށް ތައްޔާރުވުމުގެ ގޮތުންވެސް ބަތްޕެން ބޭނުންކޮށްފައި ނެތްކަމެވެ. ހޮނިހިރު ދުވަހު ކިތަންމެ ގިނައިން މޮޅުވެފައި ހުއްޓަސް އަދި ބަތްޕެން ހޮނިހިރަށް ހާއްސަވިޔަސް އެދުވަސްތަކުގައިވެސް ކުޅުންތެރިން ބުންވަރު ހޯދީ ބަތްޕެން ބޮއިގެނެއް ނޫނެވެ. އެކަމަކު އޭދަފުށީގެ ފުޓްބޯޅަ ޓީމަށް އެންމެ ކުރިއްސުރެ އަމާޒުވަމުންދިޔަ މަލާމާތުން ޓީމަށް ލިބުނީ ހިތްވަރުކަމެވެ. އޭދަފުށީގެ ނަން ދިވެހި ފުޓްބޯޅައިގައި ވިދައިގެން ދިއުމުގައި ހޮނިހިރު ބަތްޕެނޭ ކިޔައިގެން ކޮށްފައިވާ މަލާމާތުގެ ހިއްސާ ޔަގީނުންވެސް ކުޑައެއް ނުވާނެ އެވެ.
މަސްދަރު: އޭދަފުށީ ޓައިމްސް
