އަސަދުގެ އާއިލާގެ ވަކިތަކުން ސޫރިޔާ މިނިވަންކުރި ހައިއަތު ތަޙުރީރުއްޝާމްގެ ކޮމާންޑަރު ޖައުލާނީގެ ހަޤީޤަތާ ބެހޭ ގޮތުން ސުއާލު އުފެދިއްޖެއެވެ. ސޫރިޔާގެ ވެރިކަން ލިބުމަށްފަހު ޖައުލާނީ ވަނީ އޭނާގެ އަސްލު ނަމަށް ނަން ބަދަލު ކޮށްފައެވެ. އޭނާގެ އަސްލު ނަން ކަމަށް ބުނެފައި ވަނީ އަޙުމަދު އައްޝަރުޢު އެވެ.
ސޫރިޔާގެ ޚަބަރުތައް ކުރިން އަޑުއަހާފައިވާ ފަރާތްތަކަށް "އައްޝަރުޢު"ގެ ނަމަކީ އައު ނަމަކަށް ނުވާނެއެވެ. ސޫރިޔާގެ ކުރީގެ ފޮރިން މިނިސްޓަރު ފާރޫޤު އައްޝަރުޢު އަކީ ނަން މަޝްހޫރު ބޭފުޅެކެވެ. ފާރޫޤުއް ޝަރުޢުއަކީ 1984ން ފެށިގެން 2006އާ ހަމައަށް ސޫރިޔާގެ އަސަދު އާއިލާގެ ދެ ރައީސުންގެ ވެރިކަމުގައި ޚާރިޖީ ވަޒީރެވެ. އަދި ނާއިބް ރައީސެވެ.
ފާރުޤު އައްޝަރުޢުއަކީ، ސޫރިޔާގެ ހަނގުރާމަވެރި ލީޑަރު ޖައުލާނީ ނޫނީ އަޙުމަދު އައްޝަރުޢުގެ ދެބޭންގެ ދެދަރި ބޭފުޅެކެވެ.
މިހާރު ތިލަވަމުންދާ ޚަބަރުތަކުން އުފެދޭ ސުއާލަކީ ހަގީގަތުގައިވެސް ޖައުލާނީއަކީ މަޝްހޫރު އައްޝަރުޢު ޚާންދާންގެ ބޭފުޅެއްތޯއެވެ؟
ޖައުލާނީ ބުނާ ގޮތުން އޭނާގެ ބައްޕައަކީ ޑރ. ޙުސައިން އައްޝަރުޢު އެވެ. އެއީ، ފަރަންސޭސި އިސްތިއުމާރާ ދެކޮޅަށް މަސައްކަތް ކުރި ބިންވެރި އާއިލާއެއްގެ ބޭފުޅެކެވެ.
ޑރ. ޙުސައިން އައްޝަރުޢުއަކީ، މިސްރުގެ ރައީސް ޖަމާލު ޢަބްދުއްނާސިރުގެ ސިޔާސީ ފިކުރަށް ތާއީދު ކުރެއްވި ބޭފުޅެކެވެ. ސޫރިޔާގައި ސިޔާސީ މައްސަލަތަކެއް ދިމާވެ ޖަލަށް ލައި ހެދުމަށްފަހު، އޭނާ އިރާޤަށް ދިރިއުޅުން ބަދަލު ކުރައްވައި ބަޣުދާދު ޔުނިވަރސިޓީން ތައުލީމު ފުރިހަމަ ކުރެއްވިއެވެ. އޭނާއަކީ އިންޖިނޭރެކެވެ. އަދި އިކޮނޮމިކްސްގެ ރޮނގުން ޕީއެޗްޑީއަށް ކިޔަވައި ވިދާޅުވެފައިވާ ބޭފުޅެކެވެ.
ސައޫދީ އަރަބިއްޔާގެ ޕެޓްރޯލިއަމް މިނިސްޓްރީގައި ރިސަރޗަރެއްގެ ގޮތުން މަސައްކަތް ކުރެއްވިއެވެ. އަދި ބައެއް ފޮތްތައް ތައުލީފު ކުރައްވައި ސައޫދީ މަޝްހޫރު ދުވަހު ނޫސްތަކަށް ވެސް ލިޔުވިއެވެ.
ޖައުލާނީއާ މެދު ސުއާލު އުފެދެނީ، ޑރ. ޙުސައިން އައްޝަރުޢުގެ އެއްބަނޑު އެއްބަފާ ކޮއްކޯ ދައްކަވަމުން ގެންދަވާ ވާހަކަތަކުންނެވެ. ޑރ. ޙުސައިންގެ ކޮއްކޮ، ޑރ. މުއުނިސް އައްޝަރުޢު، ހިޖުރަ ކުރެއްވުމަށްފަހު މިހާރު ދިރިއުޅުއްވަނީ، ސުއިޑެންގައެވެ.
އޭނާ ވިދާޅުވާ ގޮތުގައި އޭނާގެ ބޭބެ ޑރ. ޙުސައިން އައްޝަރުޢުއަށް ލިބިވަޑައިގަތީ އެންމެ ދެ އަންހެން ބޭފުޅުންނެވެ. އެއީ، 1972 ވަނަ އަހަރު އުފަންވި އަސްމަހާން އާއި 1975 ވަނަ އަހަރު އުފަން އުފަންވި އަބްލާ އެވެ.
އެއަށްފަހު ޑރ. ޙުސައިން އައްޝަރުޢުއަށް ދިމާވެވަޑައިގަތް ޓެސްޓިކިއުލަރ ކެންސަރުގެ އާލާސްކަންފުޅުގައި 1978 ވަނަ އަހަރު އިނގިރޭސިވިލާތުގެ ސެއިންޓް ޕީޓާސް ހޮސްޕިޓަލުގައި އޮޕަރޭޝަނެއް ކޮށްފައިވާ ކަމަށް ޑރ. މުއުނިސް ވިދާޅުވެއެވެ. އަދި އެއަށްފަހު ޑރ. ޙުސައިންއަށް ބޭފުޅަކު ލިބިވަޑައިގަތުމަކީ މުސްތަހީލު ކަމެއް ކަމަށްވެސް އޭނާ ވިދާޅުވެއެވެ. އެހެންވެ، 1978 ވަނަ އަހަރަށް ފަހު ޑރ. ޙުސައިންއަށް ބޭފުޅަކު ލިބިވަޑައިގެންފައި ނުވާނެއެވެ.
ހައިއަތު ތަޙުރީރުއްޝާމްގެ ލީޑަރު ޖައުލާނީ ވިދާޅުވާ ގޮތުން އޭނާ އުފަންވެ ވަޑައިގަތީ، 1983 ވަނަ އަހަރުއެވެ. މާނައަކީ ޑރ. ޙުސައިންގެ އޮޕަރޭޝަންގެ 5 އަހަރު ފަހުންނެވެ.
ޖައުލާނީ އަކީ، 2003ވަނަ އަހަރު އިރާގަށް ހަނގުރާމައަށް ދިޔަ މީހެކެވެ. އޭނާ އެންމެ ފުރަތަމަ އުޅުނީ ދިވެހިން ހަނގުރާމަވެރިން އުޅޭ ޖަބުހަތުއްނުސްރާ ގައެވެ. އަފްޣާނިސްތާނުން އައިމަން ޒަވާހިރީގެ އިރުޝާދުތައް އޭނާއަށް ލިބުނު ކަމަށް ޖިހާދީ ފަރާތްތަކުން ބުނެއެވެ. އެއަށް ފަހު އައިސިސް އަށް ބަދަލުވުމަށްފަހު އިރާޤްގައި އަބޫބަކުރު އަލްބަޣްދާދީގެ އިރުޝާދުތައް އޭނާއަށް ލިބެމުން ދިޔައެވެ. އަދި ބަޣްދާދީ މަރާލުމަށްފަހު އޭނާ އަމިއްލަ ހަނގުރާމަވެރި ޖަމާއަތާއެކު ހަރަކާތްތެރި ވިއެވެ.
އިރާޤަށް ހަނގުރާމައަށް ދިއުމުގެ ކުރިން އޭނާ ކުޑަ މާޓެއްގައި އަތްގާތްކޮށްދޭން އުޅުނު ކަމަށް ޖިހާދީއަކު ބުނާ ވާހަކައަކީ އޭނާގެ ޅަފަތުގެ ދުވަސްތަކާ ބެހޭ ގޮތުން އެންމެ ފުރަތަމަ ލިބެން ހުރި ވާހަކަތަކެވެ.
އެއަށްފަހު އޭނާގެ ވާނަކަ އެންމެ ބޮޑަށް ދެކެވިފައި ވަނީ 2016 ވަނަ އަހަރުއެވެ. އެއަށްފަހު އޭނާ ވަނީ ޓެރަރިސްޓެއްގެ ގޮތުގައި ވޯންޓެޑް މީހުންގެ ލިސްޓަށް އަރާފައެވެ.
އޭނާގެ އަސްލު ނަން ހާމަކުރަމުން، މިދިޔަ އަހަރު ފެބްރުއަރީ މަހު، ޖިހާދީ ފަރާތްތަކުގެ ބައެއް މީސްމީޑިއާ އެކައުންޓުތަކުން ބުނެފައި ވަނީ ޖައުލާނީ އަކީ، އަޙުމަދު ޙުސައިން އައްޝަރުޢު ކަމަށެވެ. އެހެން ނަމަވެސް އޭގެ ކުރިން އައިސިސްގެ ހަނގުރާމަވެރިން ދިރާސާކުރި ފަރާތްތަކާއި ހުޅަނގުގެ ޖާސޫސީ ފަރާތްތަކުން ބުނެފައި ވަނީ ޖައުލާނީއަކީ، ދިމިޝްޤް ޔުނިވަރސިޓީގައި މެޑިސިން ކިޔަން އުޅުނު، އުސާމާ އަލްޢީސީ ނަމަކަށް ކިޔާ ޒުވާނެއް ކަމަށެވެ. އަދި އެއީ، އައްޒޫރުގައި 1981 ވަނަ އަހަރު އުފަންވި މީހެއް ކަމަށްވެސް ބުނެފައި ވެއެވެ.
ޖައުލާނީއަކީ، އައްޝަރުޢު ޚާންދާންގެ މެމްބަރެއް ކަމަށް އެންމެ ފުރަތަމަ ބުނި ހުޅަނގުގެ މުހައްލިލަކީ، ޔޫކޭގެ ޗާލްސް ލެސްޓަރއެވެ. އޭނާއަކީ ޖިހާދީ ހަނގުރާމަވެރިނާ ގުޅުން ބާއްވައި އެމީހުން އަތުން ގިނަ މައުލޫމާތު ހޯދާފައިވާ ފަރާތެކެވެ.
ލެސްޓަރ ބުނަނީ، އަހުމަދު އައް ޝަރުޢު (ޖައުލާނީ) އަކީ ފާރޫޤު އައްޝަރުޢުގެ ޚާންދާންގެ މެމްބަރެއް ކަމަށެވެ. އަދި (ޖައުލާނީ) އަކީ ދިމިޝްޤް ޔުނިވަރސިޓީގައި މީޑިއާ ފެކަލްޓީގައި އެއް އަހަރު ކިޔެވި މީހެއް ކަމަށާއި ސޫރިޔާގެ ދަންނަބޭކަލުންގެ މަޖިލީހުގެ މެމްބަރު ޝެއިޚު އަބުލްޚައިރު ޝުކުރީ، ދިމިޝްޤްގެ އިމާމް ޝާފިޢީ މިސްކިތުގައި ދެއްވި ދަރުސްތަކުގައި ބައިވެރިވެފައިވާ މީހެއް ކަމަށެވެ.
ނަމަވެސް "ޢިނަބް ބަލަދީ" ނިއުސް ވެބްސައިޓުން ޝެއިޚު ޝުކުރީއަށް ސުއާލު ދެންނެވުމުން ވިދާޅުވެފައި ވަނީ އަޙުމަދު އައްޝަރުޢު ނަމަކަށް ކިޔާ މީހަކު އޭނާގެ ދަސްރުސްތަކުގައި ބައިވެރިވެފައި ނުވާކަމަށާއި އެއީ އޭނާ ދަންނަ މީހެއް ނޫން ކަމަށެވެ.
ޖިހާދީ މީސްމީޑިއާ އެކައުންޓުތަކުން ޖައުލާނީގެ ނަން މަޝްހުރު ކުރަމުން ބުނެފައި ވަނީ އޭނާއަކީ ދިރްޢާގެ މީހެއް ކަމަށެވެ. ނަމަވެސް ޑރ. މުއުނިސް ވިދާޅުވަނީ ދިރްޢާގައި ދިރިއުޅޭ އައްޝަރުޢު ޚާންދާންގެ އިސް ފަރާތްތަކުން ވަނީ ޖައުލާނީއަށް އެއްވެސް އެހީތެރިކަމެއް ނުދިނުމަށް ޚާންދާންގެ މެމްބަރުންނަށް އަންގާފައެވެ. އަދި އޭނާއަކީ "އެޚާންދާނުގެ މީހެއް ނޫން" ކަމަށެވެ.
އަލްޖަޒީރާގައި އަޙުމަދު އަލްޖައުލާނީ އެންމެ ބޮޑަށް ޕްރޮމޯޓު ކުރާ ފަރާތަކީ އެ ޗެނަލްގެ ޕްރެޒެންޓަރ އަޙުމަދު މަންސޫރެވެ. މަންސޫރަކީ އަސަދުގެ އަނިޔާތަކާ ހެދި ހިޖުރަ ކުރަން މަޖުބޫރުވި ފަރާތެކެވެ.
އޭނާ ބުނާ ގޮތުން ޖައުލާނީ އަކީ އަރަބި ބަހަށް މޮޅު މީހެކެވެ. އަދި އޭނާ އޭނާގެ ބައެއް ޕްރޮގްރާމުތަކުގައި އޭގެ މިސާލުތައް ގެނަސްދީފައި ވެއެވެ. ޖައުލާނީގެ ޓީވީ އިންޓަރވިއުތަކުގައި އޭނާ ވަނީ ކުށެއް ނެތް ސާފު އަރަބި ބަހުން ވާހަކަ ދައްކާފައެވެ. އަދި ދޫފަރިތަކަމާއެކު ތަޤްރީރުވެސް ކުރެއެވެ.
ޖައުލާނީއާ ބެހޭ ގޮތުން އޭނާގެ ބައްޕަ ޑރ. ޙުސައިން އައްޝަރުޢު އަދި އެއްޗެއް ވިދާޅުވެފައެއް ނުވެއެވެ. ޢުމުރުން 78 އަހަރުގެ ޑރ. ޙުސައިން އުޅުއްވަނީ ސޫރިޔާއިން ބޭރުގައެވެ. އަދި އޭނާއަކީ މިހާރުވެސް ލިޔުއްވުމުގައި އުޅުއްވާ ބޭފުޅެކެވެ. އޭނާގެ އެންމެ ފަހު ފޮތަކީ قراءة في القيامة السورية އެވެ. މި ފޮތަކީ ސޫރިޔާގެ ވެރިކަން ބަދަލު ވުމުގެ ކުރިން ލިޔުއްވި ފޮތެކެވެ.
ޖައުލާނީއާ ބެހޭ ގޮތުން މިފަދަ ގޮތަކަށް ނުވިސްނަންވީ ސަބަބެއް ނެތެވެ. ލީބިޔާގެ މިސްކިތެއްގައި މީހުންނަށް ހަރުކަށި އިސްލާމްގެ ދަރުސް ދެމުން ދިޔަ މީހަކު ހައްޔަރުކޮށްގެން ބެލިއިރު އޭނާ ވީ އިޒްރޭލުން އިންދި ޔަހޫދީ އެޖެންޓަކަށެވެ.
މީގެ ކުރިން މިސްރުންވެސް އިޒްރޭލުގައި ރައުފަތުލްހައްޖާނު ނަމަކަށް ކިޔާ މުސްލިމު ޖާސޫސަކު ޔަހޫދީއަކަށް ހަދައި، އިޒްރޭލުގައި އޭނާ އިންދައި އޭނާ މަރުވަންދެން އިޒްރޭލު ސަރުކާރަށް ޖާސޫސް ކުރުވާފައެވެ. އޭނާގެ ހަގީގަތް އެނގުނީ އޭނާ މަރުވުމަށްފަހު މިސްރުން އެކަން އިއުލާން ކުރުމުންނެވެ.
