އެޗްޑީސީގެ އެމްޑީގެ މަގާމުން އިބްރާހިމް ފަޒުލް ރަޝީދު މިއަދު އިސްތިއުފާ ދެއްވައިފިއެވެ.
ފަޒުލް ވަނީ އެ މަގާމުން އިސްތިއުފާ ދެއްވިކަން އަންގަވައި ރައީސް ޑރ. މުއިއްޒަށާއި، ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީބީ) އަށް އަންގަވައި އިއްޔެ ސިޓީއެއް ފޮނުއްވާފައެވެ. އަދި އެ ސިޓީ އެކްސްގައިވެސް ފަޒުލް ވަނީ ހިއްސާ ކުރައްވާފައެވެ.
އެ ސިޓީގައި ފަޒުލް ވިދާޅުވެފައިވަނީ އެކުންފުނީގެ އެމްޑީގެ މަގާމުގައި ހޭދަކުރި މުއްދަތުގައި އެކި ގޮތްގޮތުން ކޮށްފައިވާ އަދި މިހާރު އެކި އެކި ޕްލެޓްފޯމް ތަކުގައި ކުރަމުންދާ ތުހުމަތުތަކަށް އިންކާރުކުރައްވާފައެވެ. އެގޮތުން މިހާތަނަށް ކުންފުނިން ކޮށްފައިވާ ހުރިހާ މުއާމަލާތްތަކަކީ ކުންފުނީގެ ބޯޑުގެ ނިންމުންތަކާއި ކުންފުނީގައި ހެދިފައިވާ ޕޮލިސީތަކުގެ އިމުގެ ތެރެއިން، ކުންފުނީގެ މަސްލަހަތު އިސްކޮށްގެން ކޮށްފައިވާ މުއާމަލާތްތަކެއް ކަމަށް ފަޒުލް ވިދާޅުވިއެވެ.
މީގެއިތުރުން ބިންވެރިޔާގެ ސްކީމާ ގުޅިގެން ކުންފުންޏަށް އަމާޒުވެފައިވާ ތުހުމަތުތަކަކީ ކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫން ކަމަށާއި އަދި އެ ތުހުމަތުތަކުގެ ހަގީގަތް ވީ އެންމެ އަވަސް ފުރުސަތެއްގައި ރައްޔިތުންނަށް ހާމަކޮށްދިނުމަށް ފަޒުލް ވަނީ އެދިވަޑައިގެންފައެވެ. އަދި މިކަމުގެ ސަބަބުން ކުންފުންޏާއި ސަރުކާރުގެ ސިޔާސަތުތައް ހުއްޓިފައި އޮންނަން އެދިވަޑައިނުގަންނަވާ ކަމަށް ފަޒުލް ވިދާޅުވިއެވެ.
ފަޒުލް މި މަގާމުން އިސްތިއުފާ ދެއްވައިފައިވަނީ ބިންވެރިޔާ ސްކީމުން ގޯތި ހައްގު ނޫން ބަޔަކަށް ގޯތި ދިން ކަމަށް ތުހުމަތު ކުރެވޭ މައްސަލައިގައި ސަސްޕެންޑް ކުރުމުންނެވެ. އަދި މި މައްސަލަ އާ ގުޅިގެން ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީން ޑެޕިއުޓީ މިނިސްޓަރުންނާއި ސީނިއާ ޕޮލިޓިކަލް ޑިރެކްޓަރުން ހިމެނޭހެން 9 މުވައްޒަފުން ވަނީ ސަސްޕެންޑްކޮށްފައެވެ
