ދުނިޔޭގެ ފުޓްބޯޅައިގެ މައި ޖަމިއްޔާ، ފީފާއިން ހޮވި ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމް (ފީފާ ދި ބެސްޓް) ރެއާލް މެޑްރިޑާއި ބްރެޒިލްގެ ފޯވާޑް ވިނީސިއަސް ޖުނީއާއަށް ލިބިއްޖެއެވެ.
ރޭ ބޭއްވި ފީފާގެ އެވޯޑް ހަފްލާގައި ވިނީސިއަސް އެވޯޑް ހަވާލު ކޮށްދިނީ ފީފާގެ ރައީސް ޖިއައްނީ އިންފަންޓީނޯއެވެ.
ފީފާގެ މޮޅު ކުޅުންތެރިޔާގެ މަގާމް ވިނީސިއަސް ލިބިފައި މިވަނީ "ފްރާންސް ފުޓްބޯލް" އިން މިއަހަރު ހޮވި ދުނިޔޭގެ މޮޅު ފުޓްބޯޅަ ކުޅުންތެރިޔާގެ މަގާމް (ބެލޮންޑިއޯ) ނުލިބުމުގެ ސަބަބުން ވަރަށް ބޮޑު މާޔޫސްކަމެއް ކުރިމަތިވެފައި ވަނިކޮށެވެ. ބެލޮންޑިއޯ އެވޯޑަކީ އެންމެ މަޝްހޫރު އަދި އެންމެ ޝަރަފްވެރި އެވޯޑް ކަމަށް ގިނަ ކުޅުންތެރިން ދެކެއެވެ.
އުމުރުން 24 އަހަރުގެ ވިނީސިއަސްއާ އެންމެ ކައިރިން ފީފާ އެވޯޑަށް ވާދަކުރީ ސްޕެއިނުގެ ރޮޑްރީއެވެ. ރޮޑްރީއަކީ ވިނީސިއަސް ފަހަތަށް ޖައްސާލުމަށްފަހު ބެލޮންޑިއޯ ހާސިލް ކުރި ކުޅުންތެރިޔާއެވެ. ފީފާގެ މޮޅު ކުޅުންތެރިޔާގެ މަގާމް ވިނީސިއަސް ހޯދީ 48 ޕޮއިންޓް ހޯދައިގެންނެވެ. ރޮޑްރީއަށް ލިބުނީ 43 ޕޮއިންޓެވެ. ތިންވަނައަށް ދިޔަ އިނގިރޭސިވިލާތުގެ ޖޫޑް ބެލިންގހަމްއަށް ލިބުނޫ 37 ޕޮއިންޓެވެ. ހަތަރުވަނައަށް ދިޔައީ ރެއާލް މެޑްރިޑާއި ސްޕެއިނުގެ ޑިފެންޑަރު ކަވަހާލްއެވެ. ފަސްވަނައަށް ދިޔައީ ސްޕެއިން ގައުމީ ޓީމާއި ބާސެލޯނާގެ އުއްމީދީ ތަރި ލަމީން ޔަމާލްއެވެ. 25 ޕޮއިންޓާއެކު ހަވަނައަށް ދިޔައީ ދުނިޔޭގައި މިހާތަނަށް އުފެދުނު އެންމެ މޮޅު ފުޓްބޯޅަ ކުޅުންތެރިޔާ ކަމަށް ގިނަބަޔަކު ދެކޭ އާޖެންޓީނާ އާއި އިންޓަރ މަޔާމީގެ ތަރި ލިއޮނަލް މެސީއެވެ.
ފީފާގެ މޮޅު ކުޅުންތެރިޔާގެ މަގާމް ހޮވަނީ ގައުމީ ޓީމުތަކުގެ ކެޕްޓަނުންނާއި ކޯޗުން އަދި ކަނޑައަޅާފައިވާ ނޫސްވެރިންގެ ވޯޓުންނެވެ. މެސީގެ ފުރަތަމަ ވޯޓް ދިނީ ޔަމާލްއަށެވެ. ދެވަނަ ވޯޓް އެމްޕައްބޭއަށް ދިންއިރު، ތިންވަނަ ވޯޓް ދިނީ ވިނީސިއަސްއަށެވެ.
