ޗައިނާ ސަރުކާރު މީޑިއާއިން ބުނެފައި ވަނީ ނޯތު އިންނާ މޮންގޯލިއާ އޮޓޮނޮމިކް ރީޖަންގެ ކޯޓުގެ ހުކުމާ އެއްގޮތަށް 3 ބިލިއަން ޔުއާން (412 މިލިއަން ޑޮލަރު) އަށް ވުރެ ގިނަ ފައިސާގެ ކޮރަޕްޝަންގެ ކުށް ސާބިތުވި ކުރީގެ އޮފިޝަލަކަށް މަރުގެ އަދަބު ތަންފީޒު ކޮށްފިއެވެ.
ހޮހޮޓްގެ އިގްތިސާދީ އަދި ޓެކްނޮލޮޖީ ޑިވެލޮޕްމަންޓް ޒޯންގެ ކޮމިއުނިސްޓް ޕާޓީގެ ވޯކިން ކޮމިޓީގެ ކުރީގެ ސެކްރެޓަރީ ލީ ޖިއަންޕިންގެ މައްޗަށް ސާބިތުވީ ރިޝްވަތާއި ބަންޑާރަ ފައިސާ ނަހަމަ ގޮތުގައި ބޭނުންކުރުމާއި ކުށްކުރާ ބަޔަކާ ގުޅިގެން އަމަލުތައް ހިންގުމުގެ ކުށްތަކެވެ.
އުމުރުން 64 އަހަރުގެ ލީއަށް ފުރަތަމަ މަރުގެ ހުކުމް އިއްވާފައި ވަނީ 2022 ވަނަ އަހަރުގެ ސެޕްޓެމްބަރު މަހުއެވެ. އެއީ، ސަރުކާރު މުވައްޒަފެއްގެ މަގާމުގެ ނާޖާއިޒު ފައިދާ ނަގައިގެން ފައިސާއަށް ޚިޔާނާތްތެރިވި ކަމަށް ސާބިތުވުމުންނެވެ.
މި އޮގަސްޓް މަހު ކުރި އިސްތިއުނާފު ވެސް ނިމިފައި ވަނީ އޭނާއާ ދެކޮޅަށެވެ. އޭގެ ފަހުން އެ ހުކުމް ޗައިނާގެ ސުޕްރީމް ޕީޕަލްސް ކޯޓުން ވަނީ ދަމަހައްޓާފަ އެވެ.
