ނިދަން މިޔަރަކީ ރާއްޖޭގެ ފަރުފަޅުތަކާއި ވިލުވލުގައި ގިނައިން އުޅޭ މިޔަރެކެވެ. މިއީ ކަނޑުފަޅު ފީނާ އުޅޭ މީހުންނަށް ގިނައިން ފެންނަ މިޔަރެކެވެ. މިއީ ވަރުގަދަ ހަންގަނޑެއް ލިބިފައިވާ ބަރުހެލި މިޔަރެކެވެ. ނިދަން މިޔަރުގެ މަހަކީ ކެއުމަށް ރަނގަޅު މަހެކެވެ. މިއީ ގާތްގަނޑަކަށް 3 މީޓަރަށް ބޮޑުވާ މިޔަރެކެވެ. ނަމަވެސް ޢާންމު ގޮތެއްގައި ފެނިފައި ހުންނަ މި ބާވަތުގެ މިޔަރުގެ ބޮޑު މިނަކީ 2.5 މީޓަރެވެ. މި ބާވަތުގެ މިޔަރު ވިހާ ޅަމިޔަރުގައި ގާތްގަޑަކަށް 40 ސެންޓިމީޓަރު ހުރެއެވެ. ނިދަންމިޔަރުގެ ކާނާއަކީ ހިޔަމަ، ކަކުނި،އިހި، މުރަކަ، ބޯވަ، ބޯވަދިލަމަސް އަދި ކުދި މަހެވެ. މި ބާވަތުގެ ގިނަ ޢަދަދެއްގެ މިޔަރު އެއް ހިސާބެއްގައި ނިދާފައި ތިއްބާ ފެނުމަކީ ޢާންމު ކަމެކެވެ. މިޔަރު ނިދާފައި ތިބޭއިރު ގިނައިން ތިބެނީ އެސޮރުމެންގެ ބޯ ހަރުހަރަށް ވައްދައިގެންނެވެ. މިހެންތިބޭއިރުވެސް ގޯނާކޮށްފިނަމަ ހަމަލަދޭކަމީ ފާހަގަ ކުރެވިފައިވާ ކަމެކެވެ.
މިޔަރުގެ ކުލައަކީ މައިގަނޑު ގޮތެއްގައި މުށި ކުލައެވެ. ބަނޑު ދަށުގެ ކުލަ ބުރަކަށިމަތީގައި ހުންނަ މުށިކުލައަށް ވުރ ފަނޑު ވާނެއެވެ. އަދި އުރަހަތައް ހުންނަނީ އަޅި ކުލައިގައެވެ. މި ބާވަތުގެ މިޔަރުގެ އުރަހައަކީ މިޔަރު އުރަހައިގެ ވިޔަފާރީގައި ބޭނުންކޮށްއުޅޭ އުރަހައެކެވެ.
މަޢުލޫމާތު: މެރިން ރިސާރޗް ސެންޓަރ
