އިންސާނުންގެ ގައިގައި އިންދުމަށް ސުވަރުގެ ގުނަވަންތައް ވިއްކާ ކުންފުނިން ގުނަވަނެއް ވިއްކަނީ މިލިއަން ޑޮލަރަށެވެ. Xenotransplantation އަކީ އެމެރިކާގައި ބާރަށް ކުރިއަރަމުންދާ ދާއިރާއެކެވެ.
ޖީންތަކަށް ބަދަލު ގެނަސްފައިޥާ ސުވަރުގެ ގުނަވަންތަކުގެ ވިޔަފާރިއަށް ތަރުބިއްޔަތު ކުރާ ޚާއްސަ ސުވަރުތަކުގެ ފުރަތަމަ ސުވަރުގެ ކިޑްނީ އިންސާނެއްގެ ގައިގައި އިންދާފައި ވަނީ އަންގާރަ ދުވަހުއެވެ. ޑޮކްޓަރުން ބުނަނީ ތަޖުރިބާ ކާމިޔާބު ކަމަށެވެ.
މި ސުވަރު ގެންގުޅޭ ކުންފުނި "ރިވައިވްކޯ އިންކް"ގެ ރައީސް ޑޭވިޑް އަޔާރިސް، ޅަވަރެއްގެ ސުވަރެއް އުރާލައިގެން ހުރެ މީޑިއާ ވާހަކަ ދައްކަމުން ބުނެފައި ވަނީ އޭނާ ގެންގުޅޭ ސުވަރުތަކަކީ އާންމުކޮށް މީހުން މަސްކާން ގެންގުޅޭ ވައްތަރުގެ ސުވަރުތަކާ ތަފާތު ވައްތަރެއް ކަމަށެވެ. އޭނާ ބުނީ މި ސޮރުމެންގެ ޖީންތަކަށް ބަދަލު ގެނައުމަށް އޭނާ އެތައް މިލިއަން ޑޮލަރެއް ޚަރަދުކޮށްފައި ވާނެ ކަމަށެވެ.
ވަރޖީނިއާގެ ބްލެކްސްބާގްގައި އޭނާގެ ކުންފުނިން، ސުވަރުތަކަށް ބަދަލު ގެނަސްގެން ދިރާސާތައް ކުރަމުން އަންނަތާ 20 އަހަރަށް ވުރެ ގިނަ ދުވަސްވެފައި ވެއެވެ.
އެމެރިކާގައި ގުނަވަން ބަދަލު ކުރުމަށް ބޭނުންވެފައި ލައްކައަށް ވުރެން ގިނަ މީހުން އެބަތިއްބެވެ. އަދި ގުނަވަން ބަދަލު ނުކުރެވުމުގެ ސަބަބުން ދުވާލަކު 18 މީހުން މަރުވެއެވެ.
2021ން ފެށިގެން ކޮށްފައިވާ ތަޖުރިބާތަކުގައި ސުވަރުގެ ހިތާއި ކިޑްނީ ނަގައިގެން އިންސާނުންގެ ގައިގައި އިންދާފައި ވެއެވެ.
