ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މިއަދު އައު ރިސަރޗް ފައުންޑޭޝަނެއް އިފްތިތާހުކޮށްފިއެވެ.
މި ރިސަރޗް ފައުންޑޭޝަން އިފްތިތާހުކޮށްދެއްވީ ސްޓެލްކޯ ހެޑް އޮފީހުގައި ބޭއްވި ރަސްމިއްޔާތެއްގައި ކުންފުނީގެ މެނޭޖިންގ ޑިރެކްޓަރ ހުސައިން ފަހުމީއެވެ.
ސްޓެލްކޯ ރިސާޗް ފައުންޑޭޝަން (އެސްއާރްއެފް) ގެ މަޤްޞަދަކީ ރާއްޖޭގެ ރިސާޗް އަދި އުފެއްދުންތެރިކަމުގެ ދާއިރާ އައު ހަރުފަތަކަށް ގެންދިއުމެވެ.
މިގޮތުން ސައިންސް، ޓެކްނޮލޮޖީ، އިންޖިނިއަރިންގ، އާޓްސް އަދި މެތެމެޓިކްސް (ސްޓީމް) ދާއިރާތައް ކުރިއެރުވުމަށް އެންމެ ޒަމާނީ ދިރާސާތަކާއި، އަލަށް ތަޢާރަފުވަމުންދާ ޓެކްނޮލޮޖީ ހޯދުމާއެކު، އެއަށް އަހުލުވެރިވެ، ދިވެހި ޤައުމު ތަރައްޤީގެ މަގުގައި ކުރިއަށް ދިއުމަށް ބޭނުންވާ ހަރުދަނާ އަދި ޒަމާނީ ހައްލުތައް ހޯދައިދިނުމެވެ.
މި ރަސްމިއްޔާތުގައި ވާހަކަފުޅު ދައްކަވަމުން މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ ރިސާޗް ފައުންޑޭޝަނެއް އުފައްދަން ޖެހުނު އެންމެ ބޮޑު އެއް ސަބަބަކީ އެކި ދާއިރާތަކުން ކިޔަވައިގެންތިބި ތަޢުލީމީ ޒުވާނުން ކުންފުނީގައި ތިބުމާއި، ކުންފުންޏަކީ ރިސޯސްފުލް ކުންފުންޏަކަށްވެފައި، އެފަދަ މަސައްކަތެއް ކުރާނެ ޤާބިލުކަމާއި، ވަސީލަތްތައް ސްޓެލްކޯގައި ހުރުމެވެ.
"މި ރިސާޗް ފައުންޑޭޝަން މެދުވެރިކޮށް މި ޤައުމަށް، ޤައުމުގެ ކުރިއެރުމަށް މުސްތަޤުބަލަށް ކަންތައްތަކެއް ކޮށްދިނުން އެއީ މަޤްޞަދަކީ. އަޅުގަނޑުމެން ބޭނުންވަނީ ތިބޭފުޅުންލައްވައި ޤައުމަށް ޚިދުމަތްކޮށްދޭން. މިއީ ހަމައެކަނި ޖަލްސާއެއް ބާއްވައި ނިންމާލާ ރިސާޗް ފައުންޑޭޝަނަކަށް ވެގެން ނުވާނެ. ވިސްނުމާއި ފިކުރުކުރުމުގެ ތެރެއިން ޤައުމަށް މިކަމުގެ ފައިދާ ކުރަންވާނެ. އާދައިގެ ގޮތަކަށް ނޫން. އިންތިހާއަށް ފައިދާ ކުރަންވާނެ" ފަހުމީ ވިދާޅުވިއެވެ.
އެސްއާރްއެފްގެ ވައިސް ޗެއަރޕާސަން އަދި ސްޓެލްކޯގެ ޑެޕިއުޓީ މެނޭޖިންގ ޑިރެކްޓަރ ޑރ. ޢަލީ އަޒްވަރު ވިދާޅުވީ، މިއަދަކީ މެނޭޖިންގ ޑިރެކްޓަރ ހުސައިން ފަހުމީގެ އިސްނެންގެވުމާއި ސީދާ ބެއްލެވުމުގެ ދަށުން ކުރަމުންދާ މަސައްކަތްތަކުގެ ތެރެއިން ކުންފުނީގެ ހަޔާތުގައި އަދި މަސައްކަތުގައި އިތުރު ހަރުފަތަކަށް ދިއުމަށް މަގު ކޮށިގެންދާ އުފާވެރި ދުވަހެއް ކަމަށެވެ.
މި ރަސްމިއްޔާތުގައި ސްޓެލްކޯ ރިސާޗް ފައުންޑޭޝަންގެ ވެބްސައިޓް www.srf.mv ވެސް އިފްތިތާހުކޮށްފިއެވެ. ވެބްސައިޓް އިފްތިތާހުކޮށްދެއްވީ ވެސް މެނޭޖިންގ ޑިރެކްޓަރ ހުސައިން ފަހުމީއެވެ.
މި ފައުންޑޭޝަންގެ އުންމީދަކީ ދިވެހިންނަށް އިތުރު ފުރުޞަތުތަކެއް ހޯދައިދިނުމެވެ. ޑރ. އަލީ އަޒްވަރު ވިދާޅުވިގޮތުގައި ރިސާޗަކީ ސްޓެލްކޯއާ ވަރަށް ބޮޑަށް ލާމެހިފައިވާ މަސައްކަތެކެވެ. ކުންފުނިން ފޯރުކޮށްދޭ ޚިދުމަތްތައް އެއް ހަރުފަތަކުން އަނެއް ހަރުފަތަށް ގެންދިއުމުގައި އިޖާދީ ބަދަލުތަކާއި، އަމިއްލަ އިސްނެގުމުގެ ތެރެއިން ކުރެވޭ މަސައްކަތަށް ރިސާޗަކީ ވަރަށް މުހިންމު ބައެކެވެ. އަދި މީގެ ފައިދާ ސްޓެލްކޯއަށާއި، މުޅި ޤައުމަށްވެސް ލިބިގެންދާނެ ކަމަށް އެމަނިކުފާނު ވިދާޅުވިއެވެ.
