ބައްޝާރުލް އަސަދުގެ ވެރިކަން ވައްޓާލުމަށްފަހު ސީރިއާގެ ވެރިކަމާ ހަވާލުވެވަޑައިގެންނެވި ހައިއަތު ތަހުރީރު އަލްޝާމްގެ ލީޑަރު އަބޫ މުޙައްމަދު އަލްޖައުލާނީ އަކީ، ކަންބަޅިއެއްގެ ސިފައިގައި ހުރި މިނިކާވަގެއް ކަމަށް ޒަޔަނިސްޓުންގެ ޑެޕިއުޓީ ފޮރިން މިނިސްޓަރު ޝެރީން ހަސްކެލް ސިފަކޮށްފިއެވެ.
މީޑިއާއާ ވާހަކަ ދައްކަމުން ހަސްކެލް ވަނީ ޖައުލާނީގެ ފޮޓޯތަކެއް ދައްކާލާފައެވެ. އަދި އެ ފޮޓޯތަކުގައި އޭނާ ހަރުކަށި ޖަމާއަތްތަކަށް ނިސްބަތްވާ ކަން ސާބިތުވާ ކަމަށް ބުނެފައި ވެއެވެ.
ހަސްކެލް މިހެން ބުނާ އިރު، ޖައުލާނީ ބުނެފައި ވަނީ އިޒްރޭލާއެކު ސުލްހަވާން ބޭނުންވާ ކަމަށެވެ. އަދި އިޒްރޭލާ ދެކޮޅަށް ހަނގުރާމަ ކުރުމުގެ ހިތްވަރެއް ސޫރިޔާ މީހުންގެ ކިބައިގައި ނެތް ކަމަށާއި ހަނގުރާމަކޮށްކޮށް އެމީހުން ވަރުބަލި ވެފައިވާ ކަމަށްވެސް އޭނާ ބުނެއެވެ.
ހަސްކެލް ބުނެފައި ވަނީ، ޖައުލާނީ އުޅެފައިވާ ހުރިހައި ޖަމާއަތްތަކަކީ ޓެރަރިސްޓު ހަމަލާތަކުގައި ބައިވެރިވެފައިވާ ޖަމާއަތްތައް ކަމަށެވެ.
2003ން ފެށިގެން އިރާގުގައި ހަނގުރާމަ ކޮށްފައިވާ ޖައުލާނީ ބުނާ ގޮތުން އޭނަގެ އަސްލު ނަމަކީ އަހުމަދު އައްޝަރުޢު އެވެ.
އަލްގައިދާގެ އައިމަން ޒަވާހިރީގެ އިރުޝާދާއެކު ހަނގުރާމަ ކުރުމަށްފަހު އޭނާ ވަނީ އައިސިސްއާ ގުޅިގެން އަބޫބަކުރު އަލްބަޣްދާދީގެ އިޝާދުގެ ދަށުން ޖަބުހަތުއް ނުސްރާ އުފައްދާފައެވެ. 2016ގައި ޖަބުހާ ވަނީ ހައިއަތު ތަހުރީރުއްޝާމްގެ ނަމަށް ބަދަލުކޮށްފައެވެ.
އެމެރިކާއިން ބްލެކްލިސްޓުކޮށްފައިވާ މީހުންގެ ތެރޭގައި އަދިވެސް ޖައުލާނީ ހިމެނެއެވެ. އޭނާއާ ބެހޭ މައުލޫމާތު ދިން މީހަކަށް 10 މިލިއަން ޑޮލަރު ދިނުމަށް އެމެރިކާއިން ހުށަހަޅާފައި ވެއެވެ.
