ކޮރަޕްޝަންގެ ތަހުގީގާ ގުޅިގެން ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) ގެ މެނޭޖިންގ ޑައިރެކްޓަރަށް އިސްތިއުފާ ދެއްވުމަށް މަޖުބޫރުވެވަޑައިގަތުމުން، އައު އެމްޑީއަކަށް މ. ދޫރެސް މަޢުރޫފް ޖަމީލު ހަމަޖައްސަވައިފިއެވެ. މައުރޫފަކީ، ރައީސް މައުމޫނުގެ ވެރިކަމުގައި ކޮންސްޓްރަކްޝަން މިނިސްޓަރުގެ މަގާމު އަދާކުރައްވާފައިވާ ބޭފުޅެކެވެ. އަދި މައުރޫފަކީ އެޗްޑީސީގެ އެންމެ ފުރަތަމަ ސީއީއޯވެސް މެއެވެ.
ހުޅުމާލެ ހިއްކުމާއި ޕްލޭން ކުރެއްވުމުގައި މައުރޫފް ވަނީ އިސް ދައުރެއް އަދާކުރައްވާފައެވެ. ފަހުން ހުޅުމާލެ ހިއްކައި ނިމިގެން އެތަން، ރައީސް އޮފީހުގެ ދަށުން ހިންގާ އިދާރާއެއްގެ ގޮތުގައި ރައީސް މައުމޫނުގެ ވެރިކަމުގައި ހަމަޖައްސައި، ހުޅުމާލެ ޑިވެލޮޕްމަންޓް ޔުނިޓް އުފެއްދުމާއެކު އެ އިދާރާގެ ޑިރެކްޓަރ ޖެނަރަލަކަށްވެސް ހުންނެވީ މައުރޫފެވެ.
މައުރޫފަކީ ރާއްޖޭގެ އިމާރާތް ކުރުމާ ބެހޭ ގޮތުން ފޮތްތައް ލިޔުއްވާފައިވާ ބޭފުޅެކެވެ. އަދި އޭނާއަކީ އިސްލާމީ މަރުކަޒު ބިނާ ކުރި ދުވަސްވަރު އެމަސައްކަތުގައިވެސް އިސްކޮށް އުޅުއްވި ބޭފުޅެކެވެ. ފަންނުވެރި ކަމަށް ލޯބިކުރައްވާ އާޓިސްޓެއްވެސް މެއެވެ.
ފުޅާދާއިރާއެއްގައި ކޮރަޕްޝަންގެ ތުހުމަތުތަކާއެކު މޯލްޑިވްސް ޕޮލިސް ސާވިސްއާއި އޭސީސީން ދަނީ ޕީޖީގެ އެންގެވުމަކަށް އެޗްޑީސީގެ މައްސަލަ ތަހުގީގު ކުރަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެމަނިކުފާނުގެ ސަރުކާރުގައި ކޮރަޕްޝަނަށް ޖާގަ ނުދެއްވާނެ ކަމުގެ ޔަޤީންކަން ދެއްވާފައެވެ.
އެޗްޑީސީގެ މައްސަލާގައި ކުރީގެ އެމްޑީ ފަޒުލު ރަޝީދާއެކު، ހައުސިންގ މިނިސްޓްރީއާއި އެޗްޑީސީއާއި ކުރީ ސަރުކާރުގައި ހައުސިންގ މިނިސްޓްރީގައި އުޅުއްވި ވިއްސަކަށް ބޭފުޅުންގެ ޕާސްޕޯޓު ވަނީ ހިފަހައްޓާފައެވެ.
