ހުޅުމާލެ ދެވަނަ ފިޔަވައްސާއި ޖެހިގެން އޮންނަ ފަރުކޮޅުފުށީގައި އެޗްޑީސީން ހިންގާ އޮފީހަކުން ގެއްލުނު ފަސް ލެޕްޓޮޕް ހޯދާފައިވާ ކަމަށް ފުލުހުން ރޭ ވިދާޅުވެއްޖެއެވެ.
މި 5 ލެޕްޓް ގެއްލުނީ މީގެ 3 ދުވަސް ކުރިންނެވެ. ފުލުހުން ވިދާޅުވީ ލެޕްޓޮޕްތައް ހޯދީ ސީސީޓީވީ ފޫޓޭޖުގެ އެހީގައި ކަމަށެވެ. އެކަމަކު ލެޕްޓޮޕްތައް ހޯދީ ކޮންތަނެއްގައި ހުއްޓައި ކަމެއް ފުލުހުން ހާމައެއް ނުކުރައްވައެވެ.
ގެއްލުނީ އެޗްޑީސީގެ ފައިނޭންސް ޑިޕާޓްމަންޓުގައި ބޭނުންކުރާ ލެޕްޓޮޕްތަކެއް ކަމަށް ސޯޝިއަލް މީޑިޔާގައި ޚަބަރު ފެތުރުނެވެ. އެހެންނަމަވެސް އެޗްޑީސީއިން އެކަން ދޮގު ކުރެއެވެ.
އެޗްޑީސީގެ އޮފީހެއް ފަޅާލައި 5 ލެޕްޓޮޕް ގެއްލުނީ، ގޯއްޗާއި ފްލެޓް ނުހައްގުން ދީފައިވާ މައްސަލައެއް ފެންމަތިވެ، އެކުންފުނީގެ މެނޭޖިންގ ޑިރެކްޓަރުކަމުގެ މަގާމުން އިބްރާހިމް ފަޒުލް ރަޝީދު އިސްތިއުފާ ދެއްވާފައި ވަނިކޮށެވެ. ގޯއްޗާއި ފްލެޓް ނުހައްގުން ދީފައިވާކަމަށް ބުނާ މައްސަލައިގެ ތަހުގީގެއް ފުލުހުން މިހާރު ގެންދަވަނީ ކުރައްވަމުންނެވެ.
