ޓައިވާނަށް ދިފާއީ އެހީގެ ގޮތުގައި 571.3 މިލިއަން އެމެރިކާ ޑޮލަރު ދިނުމަށް ފާސްކޮށްފައިވާ ކަމަށް ވައިޓް ހައުސްއިން ބުނެފި އެވެ.އެމެރިކާއިން ޑިޕްލޮމެޓިކް ގޮތުން ޓައިވާން ރަސްމީކޮށް ބަލައިނުގަތް ނަމަވެސް އެއީ އަމިއްލައަށް ވެރިކަންކުރާ ޖަޒީރާގެ ސްޓްރެޓެޖިކް އެކުވެރި ގައުމެވެ. އަދި އެންމެ ގިނައިން ހަތިޔާރު ފޯރުކޮށްދޭ ގައުމެވެ.
ފާއިތުވި އަހަރުތަކުގައި ޗައިނާއިން ޓައިވާނަށް ސިޔާސީ އަދި އަސްކަރީ ޕްރެޝަރު ބޮޑުކޮށްފައި ވެއެވެ. ޗައިނާއިން ދެކެނީ ޓައިވާނަކީ ޗައިނާގެ ބާޣީ އަދި ވަކިވެގެންފައިވާ ސަރަހައްދެކެވެ.
ޓައިވާނާ ގުޅޭ ގޮތުން ޗައިނާގެ ނިޔަތާ މެދު ކަންބޮޑުވުން ފާޅުކޮށް އެމެރިކާގެ ޑިފެންސް ޑިޕާޓްމަންޓުން "މިލިޓަރީ އެންޑް ސެކިއުރިޓީ ޑިވެލޮޕްމަންޓްސް އިންވޮލްވިންގް ދަ ޕީޕަލްސް ރިޕަބްލިކް އޮފް ޗައިނާ (ޕީއާރުސީ) 2024" ގެ ނަމުގައި ރިޕޯޓެއް ޝާއިއުކޮށްފި ކަމަށް ޓައިވާން ނިއުސް އިން ބުނެ އެވެ.
އެ ރިޕޯޓުގައި ބުނެފައި ވަނީ ޗައިނާއިން ޓައިވާނަށް އަރައިގަތުމަށް ތައްޔާރުވުމަށް މަސައްކަތަކެއް ކުރަމުންދާ ކަމަށެވެ.
ޓައިވާނުގެ މަސްއޫލުވެރިން ވިދާޅުވަނީ، ޗައިނާއިން މިދިޔަ ހަފްތާގައި ކުރިއަށ ގެންދިޔަ އަސްކަރީ ތަމްރީނަކީ، ޓައިވާންގެ ކައިރީގައި މިހާތަނަށް ޗައިނާއިން ކުރިއަށް ގެންދިޔަ އެންމެ ބޮޑު ކަނޑުގެ އަސްކަރީ ޑްރިލް ކަމަށެވެ.
ޗައިނާއިން ވަނީ ޖަޕާނުގެ ދެކުނު ޖަޒީރާތަކުގެ ކައިރިން ދެކުނު ޗައިނާ ކަނޑާ ހަމައަށް ގާތްގަނޑަކަށް 90 މަނަވަރު ފޮނުވާލާފައެވެ.
