ސާފުކަން ބޮޑު ހަނގުރާމައިގެ ޖަރީމާއެއްގައި އިޒްރޭލު ސިފައިން ޣައްޒާގެ އުތުރުގައި ހުންނަ އިންޑޮނޭޝިއާ ހޮސްޕިޓަލް ހުސްކުރަން މަޖުބޫރުކޮށްފިއެވެ. ޒަޔަނިސްޓު ސިފައިންގެ މި ލާއިންސާނީ އަމަލުގެ ސަބަބުން، ގިނަ ބަލިމީހުންނާއި އެހީތެރިން ވަނީ އެތައް މޭލު ދުރުގައި ހުންނަ އެހެން ހޮސްޕިޓަލަކަށް ގޮސްފައި ކަމަށް ޣައްޒާގެ ހެލްތު މިނިސްޓްރީން ބުނެފި އެވެ.
އިންޑޮނޭޝިއާ ހޮސްޕިޓަލަކީ ޣައްޒާގެ އުތުރުގައި، މަސައްކަތް ކުރާ މަދު ހަސްފަތާލުން އެއް ތަނެވެ. މިތަނަކީ އިޒްރޭލުން ތަކުރާރުކޮށް އަސްކަރީ ވަރުގަދަ އޮޕަރޭޝަންތަކެއް ހިންގި ސަރަހައްދެކެވެ.
އިޒްރޭލުން ބުނާ ގޮތުގައި މި ހަސްފަތާލާއި ހަސްފަތާލުގެ ވަށައިގެންވާ ބައިތު ލާހިޔާ، ބައިތު ހަނޫން އަދި ޖަބަލިއާ ގައި ހިންގާ އޮޕަރޭޝަންތައް އަމާޒުކޮށްފައި ވަނީ ހަމާސްގެ ހަނގުރާމަވެރިންނަށެވެ. ނަމަވެސް ފަލަސްތީނުގެ ރައްޔިތުން ތުހުމަތުކުރާ ގޮތުގައި އިޒްރޭލުން މަސައްކަތް ކުރަމުންދަނީ ޣައްޒާގެ އުތުރުގެ އާބާދީތައް ދައިމީ ގޮތެއްގައި އެތަންތަނުން ނަސްލު ސާފުކޮށްލުމުގެ އޮޕަރޭޝަނެއްގައި ބޭރުކޮށް ޒަޔަނިސްޓުން އާބާދުކުރުމަށް ބަފަރ ޒޯނެއް އުފެއްދުމަށެވެ.
ޣައްޒާގެ ހެލްތު މިނިސްޓްރީގެ ޑިރެކްޓަރު މުނީރު އަލްބުރްޝް ވިދާޅުވީ އިޒްރޭލު ސިފައިން ހޮސްޕިޓަލު ހުސްކުރުމަށް މަސްއޫލުވެރިންނަށް އެންގީ ހޯމަ ދުވަހުއެވެ. އަދި ފަހުން ހަސްފަތާލަށް ވަދެ ހަމަލަ ދިން ހަމަށެވެ.
އޭނާ ވިދާޅުވީ ޣައްޒާގެ އުތުރުގައި ހުރި ދެ ހަސްފަތާލު ކަމަށްވާ އަލްއައުދާ ހަސްފަތާލާއި ކަމާލް އަދުވާން ހޮސްޕިޓަލަށް ވެސް އިޒްރޭލުން ދަނީ ހަމަލަ ދެމުންނެވެ. ޒަޔަނިސްޓޫ ޓެރަރިސްޓް ސިފައިން ދަނީ ހޯމަ ދުވަހުން ފެށިގެން ކަމާލް އަދުވާން ހޮސްޕިޓަލް ކައިރީގައި ހަރަކާތްތެރިވަމުންނެވެ.
މި ތަންތަން ހުސްކުރުމަށް އިޒްރޭލުން މީގެ ކުރިންވެސް މަޖުބުރުކޮށްފައި ވެއެވެ. އަދި ޑޮކްޓަރުންނާއި ނަރުހުންވެސް ހައްޔަރުކޮސްފައި ވެއެވެ. ނަމަވެސް ޑޮކްޓަރުންނާއި މަސްއޫލުވެރިން ވަނީ އިޒްރޭލުން ކުރި އަމުރުތަކަށް ދެކޮޅު ހަދާފަ އެވެ.
އިޒްރޭލުން ހަނގުރާމައިގެ ޖަރީމާތައް ހިންގަމުން ގެންދަނީ އެމެރިކާގެ ފުލް ސަޕޯޓާއެކުގައެވެ. އެމީހުން ބޭނުން ކުރާ ހުރިހައި ހަތިޔާރަކާއި ހުރިހައި ވަޒަނެއް ފޯރުވައި ދެނީ އެމެރިކާއިންނެވެ.
