އަޒަރުބައިޖާނުން ރަޝިޔާއަށް ދަތުރުކުރި އެމްބްރޭއާ ޕެސެންޖަރު މަތިންދާބޯޓު ވެއްޓުމުން އޭގައި ދަތުރު ކުރި މީޙުންގެ ތެރޭން ބައްތިރީސް މީހުން ސަލާމަތް ވެއްޖެއެވެ. އެބޯޓުގައި ފަސިންޖަރުންނާއި ފަޅުވެރިންނާއެކު ބާހައްޓި މީހުން ދަތުރު ކުރިއެވެ.
ބޯޓު ވެއްޓިފައި ވަނީ، ކަޒަކިސްތާނުގެ އަކްޓާއު ސިޓީ ކައިރި އަށެވެ.
އަޒަރުބައިޖާން އެއާލައިންސްގެ ފްލައިޓް ޖޭ2-8243 ވަނީ އޭގެ ޝެޑިއުލް ރޫޓުން އެތައް ސަތޭކަ މޭލު ދުރަށް ކައްސާލާފައެވެ. ބެލެވޭ ގޮތުގައި އެހެން ދިމާވެފައި ވަނީ ޔުކްރެއިން މިއަދު ދީފައިވާ ޑްރޯންގެ ޓެރަރިސްޓް ހަމަލަތަކާ ގުޅިގެންނެވެ. މިއަދު ޗެޗްނިޔާއާއި އިންގުޝޫތިޔާއާއި ނޯރތު އޮސޭޓިއާއަށް ޔުކްރެއިން އިން ޑްރޯން ހަމަލަތައް ދީފައި ވެއެވެ.
ރަޝިޔާގެ އެވިއޭޝަން އިދާރާއިން ބުނެފައި ވަނީ ބޯޓުގެ މަގުން ކަސިޔާރުވުމާއި ބޯޓު ވެއްޓުމަށް މެދުވެރިވި ސަބަބުތައް ބަލާނެ ކަމަށެވެ. ލަފާ ކުރެވޭ ގޮތުގައި ބޯޓުގެ މަގު ބަދަލުކޮށްފައި ވަނީ ޑްރޯންގެ ނުރައްކަލަކާ ގުޅިގެންނެވެ.
މިހާދިސާ ހިނގާފައި ވަނީ، ރަޝިޔާގެ ދެކުނުގައި ޑްރޯން ހަމަލާތަކެއް ދިންތާ މާގިނައިރުތަކެއް ނުވެ އެވެ. މީގެ ކުރިން ވެސް ޑްރޯން ހަރަކާތުން އެ ސަރަހައްދުގެ އެއާޕޯޓްތައް ބަންދުކޮށްފައި ވެއެވެ.
