ވައިގެ މަގުން ރާއްޖެ އެތެރެކުރަން އުޅުނު 235 ގުރާމުގެ މަސްތުވާތަކެތި މޯލްޑިވްސް ކަސްޓަމްސް ސާރވިސްއިން އަތުލައިގެންފިއެވެ.
ކަސްޓަމުން މި ކަން ހާމަކޮށްފައިވަނީ ރޭގައި އެ އިދާރާއިން އެކްސްގައި ނެރުނު ޕޯސްޓެއްގައެވެ.
އެ ޕޯސްޓްގައި ކަސްޓަމުން ބުނެފައިވަނީ އިންޑިއާއިން ރާއްޖެ އައި 31 އަހަރުގެ ފިރިހެނެއްގެ ލަގެޖުގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކު ކުރެވިގެން އެމީހާ ބަލާ ފާސްކޮށްފައިވާ ކަމަށެވެ. އެމީހާ ރާއްޖެ އައިސްފައިވަނީ މި މަހުގެ 13 ވަނަ ދުވަހުއެވެ.
އަދި އެމީހާ ފާސްކުރުމުގެ ތެރޭގައި އެ ތަކެތި ފުރަތަމަ މަރުހަލާގައި ތަހުލީލުކުރި އިރު، މަސްތުވާތަކެތީގެ ބާވަތެއް ކަމަށްވާ ކެނަބިސް އަށް ޕޮޒިޓިވްވެފައިވާ ކަމަށެވެ. އަދި އެތަކެތީގެ ބަރުދަނުގައި ޕެކިން އާއެކު ޖުމުލަ 235 ގުރާމު ހުރި ކަމަށެވެ. އަދި މިތަކެތީގެ މަގުމަތީގެ އަގަކީ 100،000.00 ދިވެހި ރުފިޔާ ކަމަށް ލަފާ ކުރެވޭ ކަމަށްވެސް ކަސްޓަމުން ވަނީ ބުނެފައެވެ.
ކަސްޓަމްސްއިން ބުނީ އެ މައްސަލަ އިތުރަށް ތަހުގީގު ކުރުމަށްޓަކައި، އަތުލައިގަނެވުނު މަސްތުވާތަކެއްޗާއި ފަސިންޖަރު ފުލުހުންނާ ހަވާލުކޮށްފައިވާ ކަމަށެވެ.
