ގަވައިދާ ހިލާފަށް އުޅެމުންދަ ބިދޭސީން ހޯދުމަށް ކުރަމުންދާ މަސައްކަތްތަކުގެ ތެރެއިން ލޯކަލް މާރުކޭޓާއި ހީނާމާގޭ ޕާކިންގައި ހިންގި އޮޕަރޭޝަންތަކެއްގައި 25 ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް އެ އިދާރާއިން ބުނެފިއެވެ.
އިމިގްރޭޝަނުން މި ކަން ހާމަކޮށްފައިވަނީ ރޭ 'އެކްސް' ގައި ކުރި ޕޯސްޓެއްގައެވެ.
އެމީހުން މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފައިވަނީ އެ އިދާރާއިން އިއްޔެ އެ ސަރަހައްދުތަކުގައި ކުރިއަށް ގެންދިޔަ ރެއިޑް އޮޕަރޭޝަނުގައެވެ. މިއީ ލޯކަލް މާރުކޭޓްގައި އިމިގްރޭޝަނުން ރެއިޑް އޮޕަރޭޝަން ކުރިއަށްގެންދާ ދެ ވަނަ ދުވަހެވެ.
މީގެއިތުރުން އެ އިދާރާއިގެ ޕޯސްޓުގައި ބުނެފައިވަނީ ލޯކަލް މާރުކޭޓް ސަރަހައްދާއި އަދި ހީނާމާގޭ ޕާކިން ސަަރަހައްދުން 137 ބިދޭސީން ބަލައި ފާސްކޮށް، ގަވާއިދާ ހިލާފަށް އުޅެމުންދާ 25 ބިދޭސީއަކު އިމިގްރޭޝަންގެ ބެލުމުގެ ދަށަަށް ގެނައި ކަމަށެވެ.
އަދި އެ އިދާރާއިގެ ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދުއާއި އަދި ޑެޕިއުޓީ ކޮންޓްރޯލާ، އަހުމަދު އަޝްފާން ވެސް އަމަލީ ގޮތުން މި އޮޕަރޭޝަންގައި ބައިވެރިވެ ވަޑައިގެންނެވި ކަމަށްވެސް އެ އިދާރާއިން ބުންޏެވެ.
އެއިދާރާއިގެ 200 އަށް ވުރެ ގިނަ އޮފިސަރުން ހިމަނައިގެން މާލެ އަދި ހުޅުމާލޭގައި މާސް އިންސްޕެކްޝަންތަކެއް ކުރިއަށް ގެންގޮސްފައިވާ އޮޕަރޭޝަންތަކުގައި 1،300 އަށް ވުރެ ގިނަ ތަންތަން ބަލައި ފާސްކުރިއިރު، ޖުމްލަ 5،012 ބިދޭސީން ވަނީ ފުރުވާލާފައިވާ ކަމަށް އިމިގްރޭޝަނުން އެންމެފަހުން އާންމުކޮށްފައިވާ ތަފާސް ހިސާބުތަކުން ދައްކައެވެ.
ގަވައިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަކީ ސަރުކާރުން ހާއްސަ އިސްކަމެއް ދެއްވައިގެން ކުރިއަށްގެންދާ މަސައްކަތެކެވެ. އަދި ސަރުކާރުން ވަނީ މި ބިދޭސީން ހޯދުމަށް ހިންގާ އޮޕަރޭޝަން ރާއްޖޭގެ ހުރިހާ ރަށަކަށް ފުޅާކޮށްފައެވެ. އަދި ރާއްޖޭގަތިބި ހުރިހާ ބިދޭސީންގެ މައުލޫމާތު އެއް ޑޭޓާބޭސްއަކަށް ގެނެސް ބިދޭސީންގެ މައްސަލަތައް ތިން އަހަރުގެތެރޭ ޖުމްލަ ހައްލެއް ގެނައުމަކީވެސް ސަރުކާރުގެ އަމާޒެކެވެ.
ވަރަށް ރަގަޅު ތިމަސަތް ކަތައް ކާމިޔާބު އެދެން