ޗައިނާގެ އިލެކްޓްރިކް ކާރު އުފައްދާ ޖީޑޫ އޮޓޯ އިން މީގެ ދުވަސްކޮޅެއް ކުރިން އެކުންފުނީގެ ދެ ވަނަ މޮޑެލެއް ތައާރަފް ކުރިއެވެ. މިއީ ޗައިނާގައި އަލަށް މާކެޓަށް ވަން ފިޔަ ޖަހަމުން އައި ރީތި ކާރުތަކެއް ދައްކާލި ކުންފުންޏެކެވެ. ނަމަވެސް މިހާރު ކުއްލިއަކަށް އެކުންފުނިން ވަނީ ގިނަ ބަޔަކު ވަޒީފާއިން ވަކިކޮށް އޮޕަރޭޝަންތައް ބަންދުކުރަން ނިންމާފައެވެ.
މިކަމުން ޗައިނާގެ އިލެކްޓްރިކް ވެހިކަލްގެ ދާއިރާއަށް ވަނީ ބޮޑު ހައިރާން ކަމެއް ލިބިފައެވެ. ކުންފުނީގެ ސީއީއޯ ލައިވް ސްޓްރީމެއްގައި ބުނެފައި ވަނީ ކުންފުނި ބަނގްރޫޓުވެފައިވާ ކަމަށެވެ.
ކުންފުނިން ބުނެފައި ވަނީ އިލެކްޓްރިކް ވެހިކަލް އުފެއްދުމުގެ ސިނާއަތަށް ބޮޑު ބަދަލެއް އައިސްފައިވާ ކަމަށެވެ. އަދި ވާދަވެރިކަމާއެކު ބޮޑެތި ގޮންޖެހުންތައް ކުރިމަތިވެފައިވާ ކަމަށެވެ.
ޖީޑޫން ބުނެފައި ވަނީ މިހާރު ވެހިކަލް ގަނެފައިވާ ފަރާތްތަކުގެ ވެހިކަލްތައް ރަނގަޅަށް ބެލެހެއްޓުމާއި، މަރާމާތުކުރުމާއި، ސާވިސް ކުރުން ކުރިއަށް ގެންދާނެ ކަމުގެ ޔަގީންކަން ދޭކަމަށެވެ.
އެކުންފުނިން މުވައްޒަފުންނަށް މުސާރަ ދީފައި ނުވުމާއެކު މުވައްޒަފުން ވަނީ ކުންފުނީގެ މައި އޮފީހަށް ޖަމާވެ، ސީއީއޯ ވަށާލާފައެވެ. އަދި ކުންފުނީގެ އިސްވެރިން ފިލާފާނެ ކަމަށް ބުނެ އަޑު އުފުލާފައެވެ. އަދި މުވައްޒަފުން ވަނީ އެމީހުންނަށް ދޭން ހުރި މުސާރައިގެ ބަދަލުގައި ކުންފުނީގެ ބައެއް ތަކެތި ނަގައިގެން އަމިއްލަ ކޮށްފައެވެ.
