އަފްޣާނިސްތާނުގެ އިރުމަތީ ޕަކްތިކާ ޕްރޮވިންސްގައި ތިބޭ ޕާކިސްތާނަށް ޙަމަލަދޭ ތަޙުރީކޭ ތާލިބާނޭ ޕާކިސްތާން (ޓީޓީޕީ) ގެ ކޭމްޕްތަކެއް ކަމަށް ބުނާ 7 ޓައުންއަކަށް ޕާކިސްތާނުގެ މަތިންދާބޯޓުތަކުން ހަމަލަ ދީފިއެވެ. މި ހަމަލާގައި ޓެރަރިސްޓުންކަމަށް ޝައްކު ކުރެވޭ ބައެއް މީހުން މަރާލައި ޒަޚަމްވެފައިވާ ކަމަށް އަފްޣާން ސަލާމަތީ އޮފިޝަލުން ބުނެ އެވެ.
މަރުވި މީހުންނަކީ އަފްޣާނިސްތާންގެ ފަރާތްތަކުން ބުނާ ގޮތުގައި ޕާކިސްތާންގެ ވަޒީރިސްތާންގެ ރެފިއުޖީންގެ ބައެކެވެ.
ޕާކިސްތާން މީޑިއާއަށް އަފްޣާން މަސްދަރުތަކުން މައުލޫމާތު ދިން ގޮތުގައި މި ހަމަލަތައް ދީފައި ވަނީ، މުރްޣާ އަދި ލަމާން ސަރަހައްދުގައި ހުރި ޓީޓީޕީ ކޭމްޕްތަކަށެވެ. އެކޭމްޕްތަކަކީ، ޝޭރޭ ޒަމާން ގެ ނަމުން މަޝްހޫރުވެފައިވާ މުޚްލިސް ޔާރާއި ޓީޓީޕީގެ ކޮމާންޑަރ އަބޫ ހަމްޒާ އާއި ކޮމާންޑަރ އަޚްތަރު މުހައްމަދާއި ޓީޓީޕީގެ މީޑިއާ ގްރޫޕު އުމަރު މީޑިއާ ބޭނުންކުރާ ކޭމްޕްތަކެވެ.
އަފްޣާނިސްތާނުގެ ޑިފެންސް މިނިސްޓްރީން އެކްސްގައި ކުރި ޕޯސްޓެއްގައި ވަނީ ޕާކިސްތާނު ސިފައިން ދިން ހަމަލާ ކަށަވަރުކޮށް ދީފައެވެ. ނަމަވެސް މަރުވި މީހުންނާއި ޒަޚަމްވި މީހުންގެ ތެރޭގައި ގިނަ އަދަދެއްގެ ކުޑަކުދިންނާއި އެހެން އާންމުން ހިމެނޭ ކަމަށް އަފްޣާން ޑިފެންސް މިނިސްޓްރީން ބުނެފައިވެ އެވެ.
މި ހަމަލަތައް ދީފައިވަނީ ޕާކިސްތާނުގެ ޚާއްސަ މަންދޫބު، ސަފީރު މުހައްމަދު ސާދިގު އަފްޣާނިސްތާންގެ ވަގުތީ ދާޚިލީ ވަޒީރު ސިރާޖުއްއްދީން ހައްޤާނީ އާއި ފޮރިން މިނިސްޓަރު ޢާމިރު މުއްތަޤީއާ ކާބުލްގައި ބައްދަލު ކުރެއްވި ފަހުންނެވެ. މި ބައްދަލު ކުރެއްވުމަކީ، އަފްޣާނިސްތާނާއި ޕާކިސްތާނާ ދެމެދު އަހަރެއް ވަންދެން ހުއްޓިފައިވާ މަޝްވަރާތައް ފެށުމަށް ބޭއްވި ބައްދަލު ވުމެކެވެ.
ޕާކިސްތާނުން ދަނީ އެތައް ދިމާއަކުން ޓެރަރިސްޓް ހަމަލަތައް ތަހައްމަލު ކުރަމުންނެވެ. ޓީޓީޕީގެ ހަމަލަތައް އަފްޣާނިސްތާނުން އަންނަ އިރު ބަލޯޗް ލިބަރޭޝަން އާމީން ދަނީ ބަލޫޗިސްތާން ޕްރޮވިންސްގައި ހަމަލަތައް ދެމުންނެވެ. އަދި އޭގެ އިތުރުން ވަޒީރިސްތާން ސަރަހައްދުގައި މަޒްހަބީ ހަމަނުޖެހުންތަކާއެކު ޓެރަރިސްޓް ހަމަލަތައްވެސް ބަދަލު ކުރެވެމުން ދެއެވެ. މި ހަމަލަތައް ސިޓީތަކަށްވެސް ފޯރާފައި ވެއެވެ.
