އިންޑިއާއިން ހަ ހާސް މީޓަރު ފުނަށް އިންސާނަކާއެކު ފޮނުވާ ފުރަތަމަ މިޝަންތައް ތައްޔާރީތައް ކުރިއަށް ގެންދެއެވެ. ރަމޭޝް ރާޖޫގެ އާ އަހަރުގެ ޕްލޭންތަކުގައި ހިމެނެނީ ހަތް ފޫޓު ދިގު ޓައިޓެނިއަމް ކޭސް ޖަހާފައިވާ ޗެމްބަރެއްގައި ދެ ގަޑިއިރުގެ ޑައިވެއް ކުރުމެވެ.
ޗެންނާއީގެ ނޭޝަނަލް އިންސްޓިޓިއުޓް އޮފް އޯޝަން ޓެކްނޮލޮޖީ (އެންއައިއޯޓީ) ގެ ސައިންސްވެރިޔާ އަކީ، އިންޑިއާ އިން ކަނޑު އަޑީ ފުނަށް ފޮނުވާލާ ފުރަތަމަ އަންޑަވޯޓާ މިޝަން "ސަމުދްރަޔާން" ގެ ޕައިލެޓް ގެ ގޮތގައި ތައްޔާރުވާ މީހާއެވެ.
ރާޖޫ އާއި އެންއައިއޯޓީގެ އިތުރު 10 ސައިންސްވެރިން ވަނީ ސަމުދްރަޔާން އަށް ތައްޔާރުވުމަށް ތިން އަހަރު ތަމްރީނަށް ހޭދަކޮށްފައެވެ. އެމީހުން ވަނީ އެމީހުންގެ ހަށިގަނޑު އެކަމަށް ހާނުވާފައެވެ. އަންނަ ހަފްތާގެ ކުރީކޮޅު 28 ޓަނުގެ މި އުޅަނދު ޗެންނާއީގެ ކަނޑުގެ ބަނދަރެއްގައި ތިން ފަޅުވެރިންނާއެކު ޓެސްޓް ދަތުރު ކުރާނެ އެވެ. އަދި ހުރިހާ ކަމެއް ވެސް ރޭވިފައިވާ ގޮތަށް ދާނަމަ، 2026 ވަނަ އަހަރު އެންއައިއޯޓީން އިންޑިއާ ކަނޑުގެ 6،000 މީޓަރުގެ ފުނަށް އިންސާނުންނާއެކު އުޅަނދެއް ފޮނުވާނެ އެވެ.
މިމިޝަން ކާމިޔާބު ވެއްޖެ ނަމަ، 4500 މީޓަރު އަޑިއަށް ފީނާފައިވާ ޤައުމުތަކުގެ ލިސްޓަށް އިންޑިއާވެސް އިތުރުވީއެވެ.
އިންސާނުންނާއެކު އިންޑިއާއިން އިންޑިއާ ކަނޑިގެ ފުނަށް ފީނަނީ، އަގުހުރި ނާދިރު މައުދަންތައް ހޯދުމުގެ މަގްސަދުގައެވެ. ސެންޓްރަލް އިންޑިއަން އޯޝަން ސަރަހައްދަކީ، އިންޓަނޭޝަނަލް ސީބެޑް އޮތޯރިޓީން އިންޑިއާއާ ހަވާލުކޮށްފައިވާ ސަރަހައްދެއް ކަމަށް އިންޑިއާއިން ބުނެއެވެ. އަދި އެތަނުން، ނިކަލް، ކޮޕާ، މެންގަނީޒް އަދި ކޯބަލްޓް ފަދަ މައުދަންތައް ހިމެނޭ އަންޑަވޯޓާ ޕޮލިމެޓަލިކް ނޮޑިއުލްސް (ޕީއެމްއެން) ހޯދުމަށް އިންޑިއާއިން މަސައްކަތް ކުރާނެއެވެ.
މި ޕީއެމްއެންތަކަކީ އިންޑިއާއަށް ދޫކޮށްފައިވާ 75،000 އަކަމީޓަރުގެ ކަނޑުއަޑީގެ ސަރަހައްދުގެ ކަނޑުގެ އަޑިން ފެންނަ ހިލަތަކުގައި ހިމެނޭ މައުދަން ތަކެވެ. އެމައުދަންތައް ގާތްގަނޑަކަށް 380 މިލިއަން ޓަނަށް އަރާނެ ކަމަށް ލަފާކުރެވެ އެވެ.
