އިންޑިއާއިން އުފައްދާފައިވާ އަޑަށް ވުރެން ބާރަށް ދަތުރުކުރާ ބްރަހަމޯސް މިސައިލް ގަތުމަށް ވިއެޓްނާމުން ނިންމައިފިއެވެ. ވިއެޓްނާމުން އިންޑިއާއާއެކު ސޮއިކުރާ މިއަސްކަރީ ޑީލްގެ އަގަކީ، 700 މިލިއަން ޑޮލަރު ކަމަށް ލަފާ ކުރެވެއެވެ.
ކުރިއަށް އޮތް ދެތިން މަސްތެރޭގައި ވިއެޓްނާމަށް މި ސައިލްތައް ސަޕްލައި ކުރެވޭނެއެވެ. ލަފާ ކުރެވޭ ގޮތުގައި މި މިސައިލަކީ، ވިއެޓްނާމްގެ އެއްގަމު ސިފައިންނާއި ކަނޑުގެ ސިފައިންނަށް ސަޕްލައި ކުރާނެ ހަތިޔާރެވެ.
ބްރަހަމޯސް މިސައިލަކީ އިންޑިއާގެ ޑިފެންސް ރިސާޗް އެންޑް ޑިވެލޮޕްމަންޓް އޮގަނައިޒޭޝަން (ޑީއާރުޑީއޯ) އާއި ރަޝިޔާގެ އެންޕީއޯ މަޝިނޮސްޓްރޯޔެނިއާ ގުޅިގެން އުފައްދާފައިވާ ބްރަހްމޯސް އެއަރޮސްޕޭސް ކުންފުނިން އުފައްދާފައިވާ މިސައިލެކެވެ.
މި ޑީލް ފައްކާ ވުމާއެކު ވިއެޓްނާމް ވެގެންދާނީ ފިލިޕީންސްއަށް ފަހު އިންޑިއާއިން ބްރަހަމޯސް ސުޕަސޮނިކް ކްރޫޒް މިސައިލް ގަތް ދެވަނަ ގައުމަށެވެ.
