ލިޔުއްވީ: އައްޝައިޚް މުޙައްމަދު
މައިންބަފައިންނަށް ކިޔަމަންތެރިވުމަކީ ދަރީންގެ މައްޗަށް ވާޖިބެކެވެ. އަދި އެމީހުންނަށް އިހާނެތިކޮށް ހިތައް އެމީހުންނަށް ނުކިޔަމަންތެރި ވުމަކީ އެންމެ ބޮޑެތި ފާފަތަކުގެ ތެރޭގައި ހިމެނޭ ކަމެކެވެ. ނަބިއްޔާ صلى الله عليه وسلم ހަލާކުކުރަނިވި ހަތް ފާފަ ބަޔާންކޮށްދެއްވި އިރު މައިންބަފައިންނަށް ނުކިޔަމަންތެރިވުން ހިމެނުއްވިއެވެ. އަދި ހަމަ މިއާއެކު, މައިންބަފައިންނަށް އިހާނަތްތެރިކޮށް ހިތުމުން އުޚުރަވީ އަޒާބު ލިބުމުގެ ކުރިން މި ދުނިޔެމަތީގައިވެސް އެކަމުގެ ޢުޤޫބާތް ލިބިގެންދާނެ ކަމަށް ރަސޫލާ صلى الله عليه وسلم ޙަދީޘްކުރައްވާފައިވެއެވެ. އެކަލޭގެފާނު ޙަދީޘްކުރެއްވިއެވެ.
(كُلُّ ذُنُوبٍ يُؤَخِّرُ الله مِنْهَا مَا شَاءَ إِلَى يَوْمِ الْقِيَامَةِ إِلَّا الْبَغْيُ وَعُقُوقُ الْوَالِدَيْنِ أَوْ قَطِيعَةُ الرَّحِمِ يُعَجِّلُ لَصَّاحِبِهَا فِي الدُّنْيَا قَبْلَ الْمَوْتِ)
“ފާފަތަކުގެ ތެރެއިން އަނިޔާވެރިކަމާއި މައިންބަފައިންނަށް ނުކިޔަމަންތެރިވުމާއި ގާތްތިމާގެކަމުގެ ގުޅުން ކަނޑާލުން ފިޔަވާ އެންމެހާ ފާފަތަކުގެ ޖަޒާ ޤިޔާމަތާއި ހަމައަށް ﷲ ފަސްކުރައްވައެވެ. ނަމަވެސް މި ތިންކަމުގެ ޖަޒާ ދުނިޔެމަތީގައިވެސް އެކަލާނގެ އެ ފާފަތަކަށް އަރައިގަންނަމީހާއަށް ދެއްވައެވެ.”
އެހެންކަމުން މި ޙަދީޘްގައި މިވަނީ އެކަންކަމުގެ ޖަޒާ ދުނިޔެމަތީގައިވެސް މާތް الله ދެއްވާނެ ތިން ކަމެއް ބަޔާންކުރައްވާފައެވެ. އެއީ:
އަނިޔާވެރިވުންމައިންބަފައިންނަށް ނުކިޔަމަންތެރިވުންރަޙިމުގެ ގުޅުން ކެނޑުންވީމާ, މިފަދަ ނުބައި ފާފަތަކުން ދުރުވެ ރައްކާތެރިވުމަށް އަޅުގަނޑުގެ އަމިއްލަ ނަފްސަށާއި ތިޔަ އެންމެ އަޚުންނާއި އުޚްތުންނަށް ވަޞިއްޔަތްކުރަމެވެ.
މަސްދަރު: އިލްމް.އެމްވީ
