3 ވަނަ ބޮޑު ހަނގުރާމަ މިހާރުވެސް ފެށިގެން ކުރިއަށްދާ ކަމަށާއި، ނިއުކްލިއަރ ހަތިޔާރާއި ހަނގުރާމައަކީ، ތިމާވެށީގެ ކާރިސާތަކަށް ވުރެން ސަމާލުވާން ޖެހޭ ބޮޑެތި ނުރައްކާތައް ކަމަށް ޖޭޕީ މޯގަން ޗޭސްގެ ސީއީއޯ ޖޭމީ ޑިމަން ވިދާޅުވެއެވެ.
އޭނާ ވިދާޅުވީ މިހާރުވެސް ފެށިފައިވާ ބޮޑު ހަނގުރާމައިގެ މަލަމަތި އެތައް ގައުމަކުން ފެންނަމުންދާ ކަމަށެވެ. އަދި ކުރިމަގުގައި އެމރިކާއިން ޗައިނާއާއެކު ވަރުގަދަ ހަނގުރާމައެއް ކުރާނެ ކަމަށްވެސް އޭނާ އިއްޔެ އޮތް އިވެންޓްގައި ވާހަކަ ދައްކަވަމުން އިންޒާރު ދެއްވިއެވެ.
ނިއުޔޯކް ޓައިމްސްއިން އޭނާއާ ހަވާލާދީ ބުނެފައި ވަނީ ހުޅަނގާއި އެމެރިކާއިން ހަނގުރާމަ ކުރަން ޖެހޭނީ، ޗައިނާއާއި ރަޝިޔާއާއި އުތުރު ކޮރެއާއާއި އީރާނާ ދެކޮޅަށެވެ.
އިންސްޓިއުޓް އޮފް އިންޓަރނޭޝަނަލް ފައިނޭންސްގެ އަހަރީ ޖަލްސާގައި ވާހަކަ ދައްކަމުން ޑިމަން ވިދާޅުޥީ އޭނާގެ ޓީމުން މިހާރުވެސް ދަނީ ކުރިމަގުގައި ދިމާވާނެ ހާލަތުތަކަށް ތައްޔާރު ވުމަށް އެކިއެކި ސިނާރިއޯތަކަށް މަސައްކަތް ކުރަމުންނެވެ.
